دویم قورنتییل 3 - کتاب مقدس به زبان کردی جنوبی - گویش کلهوری

خزمەتکاریل پەێمان نو

¹ ئێ بو یەێ جارتر دەس بکێمنه تاریف کردن له خوەمان؟ یا جور بڕێگ، هەوەجی وه سفارش نامەێگ دێریم تا بێیمنه دەسدانەو یا سفارش نامەێگ لەلێدان بسێنیم تا گشتیەکی ئەوه بناسن و بخوەنن؟

² ئیوه خوەدان سفارش نامەێ ئیمەین، نامەیگ که وەناو دڵمان نویسریاس تا گشتیەکی بخوەنن و بفامن.

³ ئیوه نیشان داینه که نامەێ مەسیحین و بەر خزمەت ئیمه، نه وه مرەکەو، بەڵکەم وه روح خوداێ زنی نویسریاس، نه وه سەر تەخته کوچگیگ، بەڵکەم وه سەر تەخته دڵیل بەشەری.

⁴ ئیمه ئیجور دڵنیاییگ له ڕێ مەسیحەو لەلاێ خوداوه دێریم.

⁵ نه ئیەک خوەمان لیاقەت بیاشتویمن تا چشتێگ بنیمنه حساو خوەمان، بەڵکەم لیاقەتمان له خوداس.

⁶ ئەیو لیاقەت بەخشیەسه پێمان تا خزمەتکاریل پەێمان نو بویمن، پەێمانێگ که وه کار روح خودا بەردەوامه، نه وه ئەو چشته که نویسریایگ فرەتر نیه. چوینکه ’نویسریای‘ کوشێد، وەلێ روح خودا زنەیی بەخشێد.

⁷ ئێرنگه، ئەگەر خزمەتێگ که بویاده بایس مردن و وه کەلیمەیل هەڵکەنریاێ وه سەر کوچگ بەردەوامه، وه جەڵاڵەو ئاشکرا بوی، وه لەونی که قەوم ئێسرائیل وەبونەێ جەڵاڵ دەمچەو موسای پەێخەمەر نیەتویەنسیان بنوڕنه پێەو، هەر چەن ئەو جەڵاڵه وەرەو نابودی چیاد،

⁸ ئێ خزمەتی که له ڕێ روح خوداس، جەڵاڵ فرەترێگ نێری؟

⁹ چوینکه ئەگەر خزمەتی که تاوانبار کردیا وەگەرد جەڵاڵەو بی، چەنێ فرەتر خزمەتی که بوده بایس سالح بوین، پڕ له جەڵاڵه!

¹⁰ چوینکه ئەو چشته که یەێ وەختێگ پڕ له جەڵاڵ بی، ئێرنگه وه بەراورد ئی جەڵاڵ سەرتره، دیتر هەر دیاری نیه.

¹¹ جا ئەگەر ئەو چشته که وەر‎و نابودی چود وەگەرد جەڵاڵەو هات، ئێ ئەوه که هەمویشەییه چەنێ فرەتر جەڵاڵ دێرێ.

¹² جا چوینکه ئیجور ئمیدێگ دێریم، وەئازاییەو قسیه کەیمن؛

¹³ نه جور موسا که ڕوی‎بەنێگ بەساده دەمچەوی تا قەوم ئێسرائیل نەنوڕنه ئەو چشته که دێرێ تەمام بود.

¹⁴ وەلێ زەینێان تیەریکەو بی. چوینکه تا وه ئیمڕو، هەر وەخت پەێمان کویەنه خوەنن ئەو ڕویبەنه مەنیه و لا نەوریاس، چوینکه تەنیا وه وەسلەێ مەسیح لاچود.

¹⁵ ئەرێ، تا وه ئیمڕو، هەر وەخت تەورات موسا خوەنن، ئەو ڕویبەنه، دڵیان داپوشنرید؛

¹⁶ وەلێ هەر وەخت کەسێگ ڕوی کەێده خوداوەند، ڕویبەنەگه لا چود.

¹⁷ خوداوەند، روحه و هەر کوره روح خوداوەند بود، وه ئەوره ڕزگاری هەس.

¹⁸ گشتمان‎ وەگەرد دەمچەویل بی ڕویبەن، هەر جور نوڕین وەناو جامەک نوڕێیمنه جەڵاڵ خوداوەند. جور وێنەێ که وەناو جامەک دوینیم له یە جەڵاڵ وه جەڵاڵ گەوراتر گویڕێیم. چوینکه ئیه له لاێ خوداوەند سەرچاوه گری هەر ئەو خوداوەند که روحه.