دویم قورنتییل 2 - کتاب مقدس به زبان کردی جنوبی - گویش کلهوری

¹ جا پشت ئەڕاێ بەسام تا وه دواره نام ئەڕا لادان تا بایس خەمباریدان بوم.

² چوینکه ئەگەر خەمباردان بکەم، دیتر کیه که خوەشاڵمەو بکێ، بێجگه ئیوه که خەمباردان کردمه؟

³ مه ئەوجورە ئەڕادان نویسام تا وەختێگ هاتمه ئەڕا لادان، ئەوانه که باێه دڵشادمەو بکەن، بایس خەمباریم نەون. ئەڕا ئیەک دڵنیام که شادی من گشتدان شادەو کەێد.

⁴ چوینکه من وه دڵ خەمبار و پەشێو و چەویل پڕ له ئەسر ئەڕادان نویسام، نه ئەڕا ئیه که خەمباردان بکەم، بەڵکەم تا بزانین مابەتم وه ئیوه چەنێ بنێ قویله.

بەخشین ئایەم گوناکار

⁵ ئێرنگه ئەگەر کەسێگ بیەسه بایس خەمباریم، نه تەنیا مه خەمبارەو کردێه، بەڵکەم - ئەگەر تن نەچویم - تا ئەنازەێ گشتدان خەمبارەو کردێه.

⁶ ئەدەو کردنێگ که قێر فرەێگدان ئەڕاێ داشتینه، ئەگەر حەێا داشتوی بەسێه دی.

⁷ ئێرنگه دی باێه بوەخشینێ و دڵی بێینەو، نەخواێ خەم فره له پا بخیدێ.

⁸ جا لاڵکمه پێدان تا مابەت خوەدان له سەر نو نیشانی بێین.

⁹ سەوەو نویساینم ئیه بی تا ئەزموندان بکەم بزانم له هەرچێ چشته گوشە لێم تەکنین یا نه؟

¹⁰ ئەگەر ئیوه کەسێگ بوەخشین، منیش بەخشمەێ. ئەگەر کەسێگ بەخشیمه - هەڵبەت ئەگەر چشتێ ئەڕا بەخشین بود - له لاێ مەسیح و وەبونەێ ئیوه ئیجوره کردمه،

¹¹ تا شەیتان فرێومان نێی، چوینکه له فێڵەگانێ بی خەوەر نیمن.

سەرکەفتن وەناو مەسیح

¹² جا وەختێ ئەڕا جارداین مزگانی مەسیح چیمه تروئاس، زانستم که خوداوەند وه ئەوره دەر گەوراێگ وه ڕویم واز کردێه.

¹³ وەلێ وەدواره ئارام و قەرار نیاشتم چوینکه براگەێ خوەم تیتوس نیمەو. جا وەگەرد نیشتەجێیل ئەوره ماڵ‎ئاوایی کردم و چیمه ئەڕا مەنتەقەێ مەقدونیه.

¹⁴ وەلێ سپاس ئەڕا خودا که هەمویشه ئیمه وەناو مەسیح، وەناو ڕز سەرکەفتێیل خوەێ بید و هەویرات خوەش ماریفەت له ڕێ ئیمه وه گشت‎کوره پەخشەو کێ.

¹⁵ چوینکه ئەڕا خودا هەویرات خوەش مەسیحم، چ وەناو نجات دریایل و چ وەناو ئەوانه که له بین چن.

¹⁶ وەلێ ئەڕا یەکی هەویراتێگ له مەرگ که وەر‎و مەرگ چود و ئەڕا یەکیگتر هەویرات ژیان وەرەو ژیان. جا کیه که لیاقەت ئیجور کارێگ بیاشتود؟

¹⁷ ئەڕا ئیه که ئیمه جور قێر فرەێگ که ئەڕا نەف خوێان خەریک دەسفروشی کەڵام خودان، نیمن، بەڵکەم له لاێ خودا وەناو مەسیح قسیه کەیمن، هەر جور مەردم ڕویڕاسێگ که له لاێ خودا مامور بینه.