دویم قورنتییل 13 - کتاب مقدس به زبان کردی جنوبی - گویش کلهوری

هەرەشەیل ئاخر

¹ ئیه سێیەم جاره که تیەمه ئەڕا لادان. «هەر بختێگ باێه وه شاێەتی دو یا سێ شاێەتیدەر مور بود.»

² مه وەختێگ ئەڕا دویم جار سەر دامه لێدان، کەسیلێ که له جاران گونا کردوین، هەر ئیجوریشه وه هەر کەسێگ‎تر هەڕەشه کردم و ئێرنگەیش که لەلادانەو نیم وەدواره هەڕەشه کەم که وەختێ بامه ئەڕا لادان، وه کەسێگ ئاسان نیەگرم.

³ چوینکه ئیوه هاینه شون مدوێگ وه ئیه که مەسیح وه وەسلەێ منەو قسیه کێ. ئەیو وه نوادان بی هاز نیه، بەڵکەم وەناودان تویەناس.

⁴ وەبونەێ ئیه که هەر چەن وەناو بی هازی وه سەلیب کیشریا، وەلێ وه هێز خودا زنەیی کێ. هەر ئیجوره، ئیمەیش وەناو ئەیو بی هازیم، وەلێ وەگەردیەو وه نوای ئیوه وه هێز خودا زنەیی کەیمن.

⁵ خوەدان ئەزمون بکێن تا بزانین هاینه ناو ئیمان یا نه. وردەو بونه خوەدان. ئێ نیەزانین که عیسا مەسیح ها ناودان؟ مەر ئەوەکه وەناو ئی ئەزمونه ڕفوزه بوین!

⁶ جا ئمیدوارم بزانین که ئیمه ڕفوزه نویمنه.

⁷ دوعای ئیمه وه پێشگاێ خودا ئیەسه که هەڵه نەکێن؛ نه تا مالوم بود که ئیمه له ئەزمون سەربەرز هاتیمنەسه دەیشت، بەڵکەم تا ئیوه ئەو چشته که درسه، وه جێ بارین، تەنانەت ئەگەر ئیجوره نیشان بێی که ئیمه شکەس خواردیمنه.

⁸ چوینکه نیەتویەنیم هویچ کارێ وه چەواشەێ ڕاسی بکێمن، بەڵکەم هەر چی کيمن ئەڕا ڕاسیه.

⁹ چوینکه هەر وەخت ئیمه بی هاز بویمن و ئیوه هێزدار، بایس خوەشیمانه، جا دوعای ئیمه ئیەسه که ئیوه کامڵەو بوین.

¹⁰ هەر وه ئی بونه، چوینکه خوەم له لادان نیم ئی چشتیله ئەڕادان نویسم، تا وەختێگ هاتمه ئەڕا لادان، ناچار نەوم دەسڵات خوەم وه تونی وه کار بوەم، ئەو دەسڵاته که خوداوەند بەخشیەسه پێم نه ئەڕا خاپور کردن، بەڵکەم ئەڕا بنیاد ناینه.

دەس ئاخر

¹¹ دەس ئاخر، ئێ برایل، شاد بوین؛ ئەڕا کامڵ بوین و تەمامی تەقالا بکەن؛ ئاموژیاری بگرن؛ یەدەنگ بوین؛ وەناو ئاشتی و سڵامەتی زنەیی بکەن، که خوداێ مابەت و ئاشتی و سڵامەتی وەگەرددانەو مینێد.

¹² وه ماچێگ موقەدەس سڵام یەکترەکی بکەن.

¹³ گشت ئیمانداریل وه مەسیح، سڵامدان رەسنن.

¹⁴ فیز خوداوەند عیسا مەسیح، مابەت خودا و هاوبەشی روح‌القودوس وەگەرد گشتدانەو بود.