دویم قورنتییل 12 - کتاب مقدس به زبان کردی جنوبی - گویش کلهوری

رویاییل پولوس و دڕگ جەسەێ

¹ باێه شانازی بکەم؛ هەرچەن وەناو ئی شانازیه نەفێگ ئەڕام نیه، رویاییل و وەحیێلێ که له خوداوەند داشتمه، ئویشم.

² یەکیگ ناسم که ها ناو مەسیح، چوارده ساڵ وەرجه ئیه ڕفیاده ئاسمان سێیەم. نيەزانم وەگەرد جەسەوه چیه ئاسمان یا بی جەسه، خودا زانی.

³ جا زانم که بڕیاده ئەڕا بەهیشت - وەگەرد جەسەوه یا بی جەسه، خودا زانی -

⁴ و چشتیلێگ شنەفت که نیود تاریفێ بکی، که قسیه کردن له ئەوانه ئەڕا ئایەم ڕەوا نیه.

⁵ مه وه ئیجور کەسێگ شانازی کەم. وەلێ له باوەت خوەم، بێجگه وه بی هازییلم شانازی نیەکەم.

⁶ تەنانەت ئەگەر بتوام شانازی بکەم، گیلگەوج نیم، چوینکه ڕاسەگەی ئویشم. وەلێ خوەم پارێزنم تا نەخواێ کەسێگ فرەتر له ئەو چشته که له منا دوینی و شنەفێ فکر بکێ.

⁷ وەلێ ئەڕا ئیه که گەورایی بی ئەنازەی ئی وەحیێله لویتبەرزم نەکێ، دڕگیگ وەناو جەسه دریاسه پێم، جور کل کریاێ شەیتان، تا عەزاوم بێی، تا که لویتبەرز نەوم.

⁸ سێ جار لاڵکیامه خوداوەند تا له لێم دویریەو‎ بکێ،

⁹ وەلێ وەپێم وەت: «فیز من ئەڕا تو بەسه، چوینکه هێز من وەناو بی هازی کامڵەو بود.» جا وه شادی فرەێگ وه بی هازییلم شانازی کەم تا هێز مەسیح باێده سەرم.

¹⁰ جا وەبونەێ مەسیح، وه بی هازییل، دشمینیل، سەختییل، عەزاویل و بەردیل، خوەشاڵم، چوینکه هەر وەخت بی هازم ئەو وەخته تویەنام.

نگرانی پولوس ئەڕا کلیساێ قورنتوس

¹¹ گیلگەوج بیمه! ئیوه ناچارم کردین. باێه تاریفم بکردیاین، ئەڕا ئیه که هەر چەن مه هویچم، وەلێ له ئەوانه که خوێان وه ’گەورا ڕەسولەیل‘ خوەنن چشتێ کەم نێرم.

¹² نیشانەيل ڕەسول ڕاسەکانی وەناودان، وه تەمام سەور و وەگەرد نیشانەیل و چشتیل ئەڵاجوی و موجزەیل ئاشکراوه بی.

¹³ وه بەراورد وەگەرد باقی کلیسایل، چ ستەمێگ له حەقدان بیه، بێجگه ئیەک هەراێهەر بارێگ وه سەر کوڵدان نویمه؟ ئەڕا ئی هەڵەمه بوەخشینەم!

¹⁴ ئێرنگه ئەڕا سێیەم جار گورجم بام ئەڕا لادان، نیومه بار گرانێگ وه سەر کوڵدان. چوینکه نیمه شون داراێیدان، بەڵکەم هامه شون خوەدانەو. ئەڕا ئیه که مناڵیل نین که باێه ئەڕا داڵگ و باوگ خوێان گردەو بکەن، بەڵکەم داڵگ و باوگن که ئەڕا مناڵیل خوێان گردەو کەن.

¹⁵ جا مه وه خوەشی فرەێگەو هەر چه دێرم دەم تەنانەت گیانمیش دریخ نیەکەم. ئەگەر من ئی هەمگه دوسدان دێرم، ئێ ئیوه باێه کەمتر دوسم بیاشتوین؟

¹⁶ وەلێ تەنانەت ئەگەر قەبوڵ بکێن که بارێگ وه سەر کوڵدان نویمه، هاتێ ئویشین مه ئایەم فێڵبازێگم و وه فێڵبازیەو گولدان دامه.

¹⁷ ئێ وه وەسلەێ ئەوانه که کل کردمه ئەڕا لادان لەلێدان سودجویی کردمه؟

¹⁸ مه له تیتوس تواسم تا باێه ئەڕا لادان و براگەمانیش وەگەردیەو کل کردم. ئێ تیتوس لەلێدان سودجویی کردێه؟ ئێ ئیمەیش هەر وه ئی ڕێ رەوشته زنەیی نەکردیم و هەر ئی کاره نەگردیمنه وەر؟

¹⁹ ئی هەمگه وەخته فکر کردیاین که ئيمه له خوەمان وەنوادان دەفا کردیمنه؟ نەخیر، ئیمه لەلاێ خوداوه جور کەسیلێگ قسیه کەیمن که هانه ناو مەسیح، هەر چی کيمن، ئێ عەزیزەیل، ئەڕا بنیاد ناین ئیوەس.

²⁰ چوینکه له ئەوه ڕخم چود وەختێ بامه ئەڕا لادان ئەوجورە که توام، نوینمەدان و ئیوەیش ئەوجورە که تواین، نوینینەم. نەکێ وەناودان مرافه، حەسویی، توڕه بوین، دشمەنی، بخت کردن، خوسپ کردن، لویتبەرزی و شل شێویایی بوینم.

²¹ هەر ئیجوره ڕخم چود وەختێ بامه ئەڕا لادان، خودا یەێ جارتر من له لاێ ئیوه بی فیسەو بکێ و ئەڕا بڕێگ که له جاران گونا کردن و له ناپاکی، خیزی و هەرزەیی خوێان توبه نەکردنه، خەمبارەو بوم.