دویم قورنتییل 11 - کتاب مقدس به زبان کردی جنوبی - گویش کلهوری

پولوس و ڕەسولەیل دروەکانی

¹ خوەزگەو یەێ قێر گیلگەوجی مه تاموڵ بکێن. تاموڵم بکێن!

² ئەڕا ئیه که مه وە ئیوه غیرەت دێرم و ئیه له لاێ خوداس، چوینکه ئیوه دەزویران یە شوی کردمه تا جور دویەتازەوێگ پرچ پاک پیشکەشدان بکەمه مەسیح.

³ وەلێ ڕخم چود هەر ئەوجورە که حەوا فریو فێڵبازی مارەگه خوارد، فکریلدانیش له ئەو سەرسپردەیی ڕاسەکانی و خاڵسه که ئەڕا مەسیح دێرین، له ڕێ وه دەر بچود.

⁴ چوینکه ئەگەر کەسێگ باێ ئەڕا لادان و عیساێ تر بێجگه ئەوه که ئیمه بانگەوازی کردیمنه پێدان، بانگەوازی بکێ، یا ئەگەر روحێگ جیا له ئەو روحه که گردینەسەوەر یا ئینجیلێگ تر له ئەو ئینجیله که شنەفتینه بویشێده پێدان، وه ئاسانی تاموڵی کین.

⁵ وەلێ گومان نیەکەم مه له ئەوانه که خوێان وه ’گەورا ڕەسولەیل‘ خوەنن چشتێگ کەمتر بیاشتوم.

⁶ هاتێ قسیەکەر ماهریگ نەوم، وەلێ وەناو ماریفەت چشتێگ کەم نێرم؛ ئیه وه تەمامی له هەر باوەت نیشاندان دامه.

⁷ ئێ گونا کردمه که خوەم بویچگەو کردمه تا ئیوه سەربەرزەو بوین چوینکه ئینجیل خودا وه پەتی جار دامه پێدان؟

⁸ من وەگەرد قەبوڵ کردن مەیەت پویلی، کلیسایلتر تاڵان کردم تا بتویەنم خزمەتدان بکەم.

⁹ جا وەختێ وەگەرددان بیم و هەوەجیم وه چشتێگ کەفتوی، بارێگ نەناویمه سەر کوڵ کەسێگ، ئەڕا ئیه که برایلێ که له مەنتەقەێ مەقدونیەوه هاتوین هەوەجییەلم پەرچەو کردن. جا مه بێ گومان بارێگ وه سەر کوڵدان نویمه و وەشون ئیەیشه نیوم.

¹⁰ وه ئەو ڕاسی مەسیحه که ها ناو من قەسەم، هویچکەس وەناو مەنتەقەیل ئەخائیه ئی شانازی منه له لێم نیەسیندێ.

¹¹ ئێ ئەڕا چه؟ وەبونەێ ئیەسه که دوسدان نێرم؟ خودا زانی که دوسدان دێرم!

¹² له ئی کاره که کەم بەردەوامم تا دەرفەت له ئەوانەیگ بگرم که قوڕاتی دەن که هەر ئەوجورە که ئیمه خزمەت کیم خزمەت کەن.

¹³ چوینکه ئیجور کەسیلێ، ڕەسولەیل دروەکانی و کارکەریل فێڵبازن که خوێان وه وێنەێ ڕەسولەیل مەسیح دەر تیەرن.

¹⁴ جا ئیه چشت ئەڵاجویێگ نیه، وەبونەێ ئیه که شەیتانیش خوەێ وه وێنەێ فریشتەێ نویر دەر تیەرێ؛

¹⁵ چشت ئەڵاجویێگ نیه که خزمەتکاریل خویشێ بکێده جور خزمەتکاریل ڕێ سالحان. دەسئاخر سزاێگ که حەقیانه گرن.

شانازی پولوس وه رەنجیلێ

¹⁶ وەدواره ئویشم: کەسێگ مه وه گیلگەوج نەزانی. وەلێ ئەگەر ئیجوره کین، دەسکەم جور یە گیلگەوجێگ قەبوڵم بکەن، تا منیش بتویەنم قێرێ وه خوەم شانازی بکەم.

¹⁷ قسیەیلی که ئویشم جور قسیەیلی نیه که له دەم خوداوەندەو دەر تێد، بەڵکەم جور قسیەیلێگه که له دەم یە ئایەم گیلگەوج دەر تێد.

¹⁸ وەبونەێ ئەوه که قێر فرەێگ وه پێ بنەماێ جهان شانازی وه خوێان کەن، منیش شانازی کەم.

¹⁹ ئەڕا ئیه که ئیوه وه خوەشیەو گیلگەوجیل تاموڵ کین، نه که فره زاناین!

²⁰ وه ڕاسی ئەگەر یەکیگ ئیوه بکێده خوڵام خوەێ، یا قویرتدان بێی، یا وەگەردانەو مامڵەێ خراو بکێ، یا وه ملدانەو گەورایی بکێ، یا وه چەپاڵه بیده ناو گوشدان، وه خاسێ تاموڵ کین.

²¹ وه شەرمزاری تەمام باێه ئێقرار بکەم که ئیمه بی هازتر له ئەوه بیمنه که بتویەنیم ئیجور کاریلێ بکێم! ئەگەر کەسێگ وه خوەێ ئجازه دی وه چشتێ شانازی بکێ، هەم وەدواره جور گیلگەوجێگ قسیه کەم، منیش وه خوەم ئجازه دەم وه ئەوه شانازی بکەم.

²² ئێ عبرانێن؟ منیش هەم! ئێ ئێسرائیلین؟ منیش هەم! ئێ له نەتەوەێ ئێبراهیمن؟ منیش هەم!

²³ ئێ خزمەتکار مەسیحن؟ جور شێتیل قسیه کەم، مه فرەتر هەم! له گشت سەختتر کار کردمه، چەن جار فرەتر له ئەوانه کەفتمەسه زندان، له گشت فرەتر قەمچی خواردمه، چەن جار وەگەرد مەرگ ڕوی وه ڕوی بیمه.

²⁴ پەنج جار له جویلەکەیل، سی و نو گله قەمچی خواردمه.

²⁵ سێ جار چوێم دانه، یە جار کوچگواران بیمه، سێ جار کەشتی گەردیانم چیه ژێر ئاوا، یە شەوانەڕوژ وەناو دەریا دامەێ سەر.

²⁶ هەمویشه وەناو گەردیان بیم و له هەر لاێگەو تویش خەتەر هاتیام: خەتەر گوزیشتن له چەمیل، خەتەر ڕێگریل؛ خەتەر له لاێ قەومەگەم، خەتەر له لاێ ناجویلەکەیل؛ خەتەر وەناو شار، خەتەر وەناو بیاوان، خەتەر وەناو دەریا؛ خەتەر له لاێ برایل دروەکانی.

²⁷ وەناو سەختی و مینەت، وەناو شەو نەخەفتەنیل فرەێگ؛ وەناو ورسیایی و تیەنیایی، فره وەختیل بی نان، وەناو سەرما و ڕویتی.

²⁸ جیا وه ئی چشتیله، بار نگرانی ئەڕا گشت کلیسایلەسه که هەر ڕوژ وه سەر کوڵمەو سەنگینی کێ.

²⁹ کیه که له لێدان بی هازه و مه وەگەرد بی هازیەگەێ بەشدار نەوم؟ کیه که له لێدان بکەفێ و من ئەڕاێ نەسوزیەم؟

³⁰ ئەگەر باێه شانازی بکەم، وه چشتیلی شانازی کەم که بی هازی مه نیشان دێ.

³¹ خودا، باوگ خوداوەند عیسا، که وه ئەیو تا ئەبەد بەرەکەت بود، زانی که درو نیویشم.

³² وه شار دەمشق، فەرمانرەواێ دەسنیشان شا حارس، نگابانیلی هیشته سەر شار دەمشق تا بخەنەمه گیر.

³³ وەلێ وەناو سەوەتەێگ، له دەروەچەێگ که وه سەر دیوار شارەگه بی، مه شوڕەو کردنه خوار و ئیجوره له چنگێ دەرچیم.