دویم قورنتییل 10 - کتاب مقدس به زبان کردی جنوبی - گویش کلهوری

دەفای پولوس له خزمەتەگەی

¹ من، پولوس، وه ڕوی نەرمی و مێرەبانی مەسیح له لێدان توام - وه پێ وتار بڕێگیدان، وەختێ لەلادان نیم بێ فیسم و وەختێ هامه لادان تنم! -

² و لاڵکمه پێدان ناچار نەوم وەختێ هامه لادان، وەگەرد کەسیلێ که فکر کەن ئیمه وەگەرد پەێمانەیل ئی جهانه زنەیی کيمن، وه تنیەو مامڵه بکەم.

³ چوینکه هەر چەن وەناو ئی جهان دێمنێ سەر، وەلێ وه ڕێ رەوشت جهان شەڕ نیەکیم.

⁴ ئەڕا ئیه که چەک شەڕ ئیمه هن ئی جهانه نیه، بەڵکەم وه هێز خوداییه که تویەناێ خاپور کردن قەڵایل هەس.

⁵ ئیمه هەر باسێگ و هەر گومان قوڕات قویگ که وەنواێ ماریفەت خودا وسێد له بین بیمن و هەر فکرێگ ئەڕا گوش تەکانن له مەسیح وه بەن کیشیم و

⁶ وه گورجیم تا هەر ملچەفتەوکەرێگ سزا بێیم، وەختێ که گوش تەکاننەگەدان کامڵەو بود.

⁷ بنوڕن و سەێر بکەن. ئەگەر کەسێگ دڵنیاس که هن مەسیحه، با بزانێ که هەر ئەوجورە که ئەوه هن مەسیحه ئیمەیش هەر وه ئەو ئەنازه هن مەسیحیم.

⁸ چوینکه شەرمزار نیوم تەنانەت ئەگەر قرتکیگ فرەتر شانازی وه ئەو دەسڵاتی بکەم که خوداوەند داسه پێم ئەڕا بنیاد نایندان نه ئەڕا له بین بردندان.

⁹ نیەتوام وەگەرد نامەیلم ڕخدان بوەم،

¹⁰ چوینکه بڕێگ ئویشن: «نامەیلی قورس و وه هێزن، وەلێ بیێنەگەی بی هازه و قسیەگانی سوکه.»

¹¹ ئەوانه که ئیجوره ئویشن با بزانن که هەر چی وه دویرەو وەناو نامەگانم ئویشم، وەختێ بامه ئەڕا لادان هەر ئەو کاره کەم .

¹² نه ئیه که ئیمه جرئەت کیم خوەمان وەگەرد کەسیلێ که له خوێان تاریف کەن یەکی بکێم یا خوێان وەگەرد یەکترەکی هەڵسەنگنن. وەلێ وەختێ خوێان وەگەرد یەکترەکی بەراورد کەن، دیاره که چەنێ نەزانن.

¹³ وەلێ ئیمه فره وه خوەمان شانازی نیەکيمن بەڵکەم ئەوقره که خودا ئەڕامان دیاری کردێه، ئیه ئیوەیش گریده وەر.

¹⁴ ئەڕا ئیه که ئیمه له ئەنازەێ خوەمان فرەتر نەچیمنەسه نوا، چماێ هەراێهەر خزمەتدان نەکردیمنه. چوینکه یەکمین کەسیلێ بیمن که ئینجیل مەسیح رەسانیمنه پێدان.

¹⁵ ئیمه حەد خوەمان پارێزنیم و وه کاریلێ که کەسیلتر کردنه شانازی نیەکیم. وەلێ ئمیدمان ئیەسه که هەر چ ئیماندان فرەتر بود، پاناێ خزمەتمان وەناو ئیوەیش فرەترەو بود،

¹⁶ تا بتویەنیمن مزگانی بێیمنه ئەو وڵاتیلێ که له ئیوه دویرترن. چوینکه نیەتوایم شانازی بکێم وه ئەو کارێ که وەرجەوە وەناو میلکان یەکیگتر ئەنجام دریاس.

¹⁷ جا «هەر کەس شانازی کێ، وه خوداوەند شانازی بکێ.»

¹⁸ چوینکه نه ئەوه که له خوەێ تاریف بکێ قەبوڵ کریەێ، بەڵکەم ئەوه که خودا تاریفی بکێ.