دویم قورنتییل 1 - کتاب مقدس به زبان کردی جنوبی - گویش کلهوری

¹ له پولوس که وه خاست خودا ڕەسول عیسا مەسیحه و براگەمان تیموتاوس، وه کلیساێ خودا وەناو شار قورنتوس و گشت ئیمانداریل وه مەسیح وەناو سەرئانسەر ناوچەێ ئەخائیه:

² فیز و ئاشتی و سڵامەتی لەلاێ خودا، باوگمان و خوداوەند عیسا مەسیح، وەملدانەو بود!

خوداێ گشت دڵنەواییل

³ پڕ بمارکه خودا، باوگ خوداوەندمان عیسا مەسیح، که باوگ بەزەیێل و خوداێ گشت دڵنەواییله؛

⁴ که وه ئیمه وەناو گشت بەردیلمان دڵنەوایی دەێ تا بتویەنیمن وەگەرد ئەو دڵنەواییه که لەلێ گردیمنه، ئەوانه که هانه ناو بەرد، دڵنەوایی بێیم.

⁵ چوینکه هەر ئەوجورە که وەناو عەزاویل مەسیح، وه فراوانی هاوبەشیم، له ڕێ مەسیح له دڵنەوایی فرەێگەو هاوبەشیمن.

⁶ ئەگەر تویش بەرد تێیمن، وەبونەێ دڵنەوایی و نجات ئیوەس، جا ئەگەر دڵنەوایی چەوەڕێمانه، ئیەیشه باێه بوده بایس دڵنەواییدان، یانێ وەختێ که ئیوەیش جور ئیمه تویش ئەو عەزاویله تێین، سەور و تاموڵ بیاشتوین.

⁷ ئمیدمان له باوەت ئیوه بەردەوامه، چوینکه زانیمن هەر ئەوجورە که وەناو عەزاویلمان هاوبەشین، وەناو دڵنەواییمانیش هاوبەشەو بوین.

⁸ ئێ برایل، نیەتوایم که ئیوه له بەردیلی که له ناوچەێ ئاسیا وه سەرمان هات، بی خەوەر بوین. چوینکه فرەتر له تویەنایمان وەناو تەنگێ بویمن، ئەوقره که له زنەییمانیش دەس شوردیم.

⁹ وه ڕاسیش گومان کردیایم حوکم وه مردنمان دانه. وەلێ ئیانه گشتێ هەڵکەفت تا نه وه خوەمان، بەڵکەم وه خوداییگ پشت بوەسیم که مردگیل زنیەو کەێد.

¹⁰ ئەیو ئیمه له ئیجور خەتەر متڵەقبڕێگ ڕزگار کرد و یەێ جارتریش ڕزگار کێ. ئیمه ئمید وه ئەیو بەسایمنه که هەر ئیجوره ڕزگارمان کێ،

¹¹ ئیوەیش وەگەرد دوعایلدان مەیەتمان بێين. تا قێر فرەێگ وەبونەێ ئیمه ئەڕا فیزێگ که وه جواو دوعای فره کەس بەخشریاسە پێمان، سپاسیل بویشن.

گویڕیاین نەخشەێ پولوس

¹² شانازی ئیمه شاێەتی وژدانمانه که کردەوەمان وەناو جهان، وەتاێبەتی لەباوەت ئیوه، وەگەرد سادەی و ڕویڕاسی خودایی بی. ئیمه نه وه ڕوی زانیاری ئنسانی، بەڵکەم وه پێ فیز خودا کار کردیمنه.

¹³ چوینکه ئەو چشته وەپێدان نویسیمن درس هەر ئەوەسه که خوەنین و فامین. ئمیدوارم وه تەمامی بفامین

¹⁴ هەر ئەوجورە که تا ئەنازەێگ ئیمه فامینه، وەناو ڕوژ خوداوەندمان عیسا هەر ئەوجورە که ئیمه وه ئیوه شانازی کەیمن، ئیوەیش وه ئیمه شانازی بکێن.

¹⁵ ئەڕا ئیه که له ئی باوەته دڵنیا بیم، تواسم وەرجه هەر چشتێ بام بوینمەدان تا ئەڕا دوێم جار فیز بگرینەوەر.

¹⁶ تواسم که هەم له وەخت چیێنم وەر‎و مقدونیه و هەم وەختێگ که له مەقدونیه تیەمەو، سەری بیەمه لێدان تا مەێەتم بێین و ڕێ یەهودیه بگرمەوەر.

¹⁷ ئێ وەختێگ تواسیام ئی کاره بکەم، شک وه دڵ بیم؟ یا ئیه که تواسنم مینێده‎ ئایەمیل مامولی، وه لەونێگ که له یەێ ئان بویشم ’ئەرێ ئەرێ‘ و بویشم ’نه نه‘؟

¹⁸ قەسەم وه وەفاداری خودا که قسیەگەمان وەگەرد ئیوه ’ئەرێ‘ و ’نه‘ نویه.

¹⁹ چوینکه کوڕ خودا، عیسا مەسیح، که من و سیلاس و تیموتاوس وەناودان وه ئەیو بانگەوازی کردیم، ’ئەرێ‘ و ’نه‘ نوی، بەڵکەم وەناو ئەیو هەر ’ئەرێه‘.

²⁰ چوینکه گشت وادەیل خودا وەناو مەسیح ’ئەرێه‘ و وەئی بونه وەناو ئەوەسه که ئیمه ’ئامین‘ وه زوان تیەرێم، تا خودا جەڵاڵ پەێا بکێ.

²¹ جا ئیه خوداس که ئیمه وەگەرد ئیوه وه یەکەو بوین وەناو مەسیح بەردەوام کێ. ئەیو مەسح و دەسنیشانمان کردێه

²² و مور خوەێ کوتاسه ملمانا که هن خوەێ بویمن و روح خوەێ جور بەیانه وەناو دڵمان جێ داس.

²³ خودا شاێەته که تەنیا وەبونەێ بەزەیی وه ئیوه بی که ناتمەو ئەڕا قورنتوس.

²⁴ نه ئیەک وه سەر ئیماندان زاڵ بویم، بەڵکەم وەگەرددانەو، ئەڕا خوەشیدان تەقالا کەیمن، ئەڕا ئیەک وەناو ئیمان بەردەوامین.