یەکم نامەێ تیموتاوس 6 - کتاب مقدس به زبان کردی جنوبی - گویش کلهوری

¹ ئەوانه که هانه ژێر هویەێ خوڵامی، باێه ئەرواویل خوێان خاس حرمەت بگرن تا مەردم لەباوەت ناو خودا و تالیم ئیمه خراو نویشن.

² ئەوانه که ئەرواوەگانێان وه مەسیح ئیمان دێرن، نەبایه وه بونەێ ئیه که بینەسه براێ یەکان، کەمتر وه پێان حرمەت بیلن. بەڵکەم وه چەواشه، باێه تەنانەت خاستر خزمەت بکەن، چوینکه فایدەێ خزمەتێان وه کەسیلێگ رەسێد که ئیماندار و عەزیزن. ئیه تالیم بێه و ئەڕا وەجێ هاوردنێ هانێان بیه.

چه ها شون پویل دوسی؟

³ ئەگەر کەسێگ جورێگ تر تالیم بێید وەگەرد وتار درس خوداوەندمان عیسا مەسیح و تالیم خوداپەرەسانه یەکی نود،

⁴ مەس لویتبەرزی بیه و هویچ نیەفامێ. ئیجوره کەسێگ خودپەسەن و نەفامه و خوەشی تێ له سەر کلیمەیل دەمقاڵ و باس و مرافه بکێد، که له لێ حەسویی و دەسەبەنی و دشمین داین و بەێ گومانی هەڵسێده پا

⁵ بوده بایس کیشکاش هەمویشەی له بین ئایەمیلێگ که فکریلێان گە‏نیاس و له ڕاسی دویرەو کەفتنه، گومان کەن خوداپەرەسی ڕێگه ئەڕا نەف کردنێان.

⁶ وەلێ خوداپەرەسی وەگەرد قەناعەت، فایدەێ فره گەوراێگ دێرێد.

⁷ ئەڕا ئیه که وه ئی جهانه هویچ ناوردیمنه و له ئەویشه هویچ نیەویمن.

⁸ جا ئەگەر خواردەمەنی و دڵنگ و سەرپەناێگ دێریم، قانێیمن.

⁹ وەلێ ئەوانه که خەیاڵ دەوڵەمەنی دێرن، خەڵەتیەن و تویش دام مەیلیل پویچ و زیانباری تیەن که بایس وێرانی و له بین چین ئنسان بود.

¹⁰ چوینکه تەما وه پویل ریشەێگه که گشت جور خراوی له لێ تێدە بار و بڕێگ له تاسەێ ماڵ و دارایی، له ئیمان دویرەو کەفتنه، خوێان تویش ژانیل فره زام‎دار کردنه.

ئاموژیاری پولوس وه تیموتاوس

¹¹ وەلێ توی ئێ پیاێ خودا، له گشت ئیانه دەر بچو، له شون سالح بوین و دینداری و ئیمان و مابەت و بەردەوامی و دڵنەرمی بو.

¹² له جەنگ خاس ئیمان تەقالا بکه و بلچکیه ئەو زنەیی ئەبەدی که ئەڕا ئەوه دەنگ کریایه، ئەو وەخته که وه نوای شاێەتیل فرەێگ، ئێقرار خاسەگه کردی.

¹³ جا له نوای خوداێگ که وه گشت چشتێگ زنەیی بەخشێد و له لاێ مەسیح عیسا که له شاێەتی خوەێ له لاێ پونتیوس پیلاتوس ئێقرار خاسەگه کرد، ئاموژیارید کەم

¹⁴ که ئی حوکمه تا وەخت ئاشکرابوین خوداوەندمان عیسا مەسیح، بی لەک و پێس و دویر له هەر سەرزەنشتێگ هەڵبگرێ،

¹⁵ که خودا ئیه له وەخت خوەێ وه جێ تیەرێد، هەر ئەو خوداێ بمارک و حاکمێگ که یەکێگە و شاێ شاێیل و خوداێ خوداییله

¹⁶ وه ئەیو که تەنیا وجود نەمریگه و له ناو نویریگ نیشتەجێه که کەس نیەتویەنێ وه ئەیو نزیکەو بود، ئەیو که هویچکەسێگ نێە‎سەێ و نیەتویەنێد بوینێدەێ، وه ئەیو حرمەت و حوکمرانی ئەبەدی بود. ئامین.

¹⁷ وه دەوڵەمەنیل ئی دنیا حوکم بکه که قتقوز نەون وه ماڵ ئی دنیا که بەردەوام نیه پشت نەوەسن. بەڵکەم وه مل خوداێگ پشت بوەسن که گشت چشتێگ وه فراوانی ئەڕا ئیمه گورجەو کەێد تا له ئەوانه لەزەت بویم.

¹⁸ وه ئەوانه دەستور بیه که خاسێ بکەن و ئەڕا کاریل خاس، دەوڵەمەن بون و بەخشەنه و دەسدڵواز بون.

¹⁹ و ئیجوره، گە‎نجیگ ئەڕا خوێان خەنه پشت دەس که بوده بنەواێ قورس ژیان وەرەڕوییان و لچکینه ئەو ژیانه که ژیان ڕاسەکانیه.

²⁰ ئێ تیموتاوس، ئەمانەتێگ که وه پێد سپاریاس، بپارێزن. له قسیەیل مفت دنیایی و فکریل خەڵافێگ که وه درو، ناوێ نانەسه ماریفەت، دویرەو بگر؛

²¹ بڕێگ که ئویشن ئەو ماریفەته دێریم؛ له ئیمان دویرەو کەفتنه. فیز وەگەرددا بود.