یەکم نامەێ تیموتاوس 5 - کتاب مقدس به زبان کردی جنوبی - گویش کلهوری

ئاموژیاریێلێگ له باوەت بێوه ژنيل، شێخیل کلیسا و خوڵامیل

¹ پیاێ سن ساڵ دار مەگره گازتاوە، بەڵکەم ئەوه هەر جور باوگ خوەد هان بیه و جوانیلیش هەر جور برایل خوەد

² و ژنيل سن ساڵ دار هەر جور داڵگيل و ژنيل جوانتر هەر جور خویشگیل خوەد، له پاکێ تەمام.

³ بێوه ژنیل که وه ڕاسی بێ کەس کارن، حرمەت بگر.

⁴ وەلێ ئەگەر بێوه ژنێگ مناڵیل و مناڵزایلێگ دێرێ، ئەوانه باێه یەکم جار یاێ بگرن که وه پارێزانن له بنەماڵەگەێ خوێان، خوداپەرەسی خوێان له کردەوه نیشان بێەن و ئیجوره قەرد خوێان وه داڵگ و باوگ و باپیرێان بیەنەو، ئەڕا ئیه که ئیه خودا خوەشنودەو کەید.

⁵ وەلێ ئەوه که وه ڕاسی بێوه ژنه و بێ کەس مەنیه، ئمیدی یەێ‌سەره وه خوداس و شەو و ڕوژ وه دوعا و داوا کردن مەێەت له خودا دەێده سەر.

⁶ وەلێ بێوه ژنێگ که له ناو زنەیی خوەێ هەر ها شون خوەشیەو، هەر چەن هێمراێ زنیه وەلێ، مردگه.

⁷ وەئی کاریلیشه حوکم بکه‎ تا له هەر سەرزەنشتێگ دویر بون.

⁸ ئەگەر کەسێگ له شون مەمەر زنەیی خاوخێزان و وه تایبەتی بنەماڵەگەێ خوەی نەود، دەێده ژێر ئیمان و خراوتر له بی ئیمانه.

⁹ تەنیا کەسیلێگ وه حساو بێوه ژنيل ناوێان بنویس که فرەتر له شەس ساڵ بیاشتوین و وه شویەگەێ خوێان وەفادار بینه.

¹⁰ هەر ئیجوره باێه وه خاسێ ناوێان دەرچوی، یانێ مناڵیل خوێان خاس تەربیەت کردوین، غەریونەواز بون، پایل ئیمانداریل وه مەسیح شوردوین و وه مەیەت کەسیلێ که تویش بەردیل هاتنه دەوین و خوێان ناوینه ئەڕا وه جا هاوردن هەر جور کار خاسێگ.

¹¹ وەلێ بێوه ژنيل جوانتر ‎ناونویسی مەکه، ئەڕا ئیه که وەختێ مەیلیل هەواوهەوەس له مەسیح دویریانەو بکێد، کەفنه فکر شوی کردنا.

¹² وەئیجوره، چوینکه ئیمان ئەوساێ خوێان نەنه ژێر پا، وه مل خوێانا ماکومیەت تیەرن.

¹³ بێجگه ئیه، فێر لەمتیکەری و ئی ماڵ ئەو ماڵ گەردین بون و نه تەنیا ڕوژگار وه لەمتیگەری دەنه سەر، بەڵکەم خوسپکەر و فتنیش بون و قسیەيل گە‎ن وه زوان تیەرن.

¹⁴ جا باوەڕم ئیەسه که بێوه ژنیل جوانتر شوی بکەن و مناڵ بارن و بونه ماڵداریکەر و دەرفەت خراو وەتن وه دشمەن نیەن.

¹⁵ چوینکه هەر ئێرنگەیش بڕێگ وەشون شەیتان له ڕێ دەرچینه.

¹⁶ ئەگەر ژن ئیماندارێگ، بیوەژنێگ له کەسوکاری بیاشتوید، باێه خوەێ مەیەتێان بێید تا بارێگ وه مل کلیسا نود و کلیسا بتویەنێ وه بیوەژنیلێگ مەیەت برەسنێ که وه ڕاسی بێ کەس کارن.

¹⁷ شێخیلێگ که خاس ڕابەری کردوین، شایسەێ حرمەت دو ئەوقرەنه، وه تایبەتی ئەوانه که له کار بانگەوازی و تالیم زامەت کیشن.

¹⁸ چوینکه تەورات ئویشێد: «دەم گاێگ که خەرمان کوتید، مەوەس» و «کارکەر باێه، حەق‎دەسەگەی خوەێ بگرێد.»

¹⁹ هویچ بختێگ وه مل یەکیگ له شێخیل قەبوڵ مەکه، مەر وه شاێەتی دو یا سێ شاێەت.

²⁰ وەلێ ئەوانه که وه گونا کردن بەردەوامن، وه نوای گشتیەکی بگره گازتاوه تا ئەو باقی زاورێان بچود.

²¹ وه نوای خودا و مەسیح عیسا و فریشتەیل هەڵوژاریای، گوشد جەڕەو دەم که ئی دەستوریله بی ئیه که له سەر کەسێگ بکێد یا دوچەوەکی بکێ، وه جێ بارید.

²² ئەڕا دەس ناین وه مل کەسێگ پەله مەکه وەناو گونایل ئەو باقی مەردم هاوبەش مەو، بەڵکەم خوەد وه پاکێ بپارێزن.

²³ دیتر تەنیا ئاو مەخوه، بەڵکەم وه خاتر گەێەد و نەخوەشیێلێگ که فره وەخت ديری، یەێ توزێگیش شراو بوخوه.

²⁴ گونایل بڕێگ ئاشکراس و وەرجه ئەوانه کڕنێدیانه ئەڕا داوەری، وەلێ گونایل بڕێگ تر له شون ئەوانه تێد.

²⁵ هەر وه ئیجوره، کاریل خاس ئاشکراس و تەنانەت ئەوانه که ئاشکرا نیه، کەس نیەتویەنی بشاریدێەو.