یەکم نامەێ تیموتاوس 4 - کتاب مقدس به زبان کردی جنوبی - گویش کلهوری

ڕێنمایێلیگ ئەڕا تیموتاوس

¹ وەلێ روح خودا، ئاشکرا فەرمایش کەی که له زەمانیل ئاخر، بڕێگ له ئیمان هەڵوگەردیەن و کەفنه شون روحیل سەر له ئایەم شیون و تالیمیل دێویل.

² دروزنیل و دوڕوییل ئی تالیمیله تیەرن که وژدانێان خاس کار نیەکێ.

³ ئیانه ئویشن ژن نەخوازین و وه پارێز له خواردەمەنیێلێ فەرمان دەن که خودا درس کردێه تا ئیمانداریلێگ که وه ڕاسی ئیمان دێرن و ناسنێ، وەگەرد شوکر کردن له ئەوه نسیو بوەن.

⁴ چوینکه هەر چی خودا درس کردێه، خاسه و ئەو وەخته هویچ چشتێگ نەبایه ڕەد کرد که وەگەرد شوکر کردن قەبوڵ بود،

⁵ ئەڕا ئیه که له ڕێ کەڵام خودا و دوعا پاکەو بود.

⁶ ئەگەر ئی کاریله بخیدەێ هویر برایل، بیده خزمەتکار خاس مەسیح عیسا، گەورا بی وەناو کەڵام ئیمان و تالیم خاسێگ که کەفتیدەسه شونێ.

⁷ توی وه مەسلەتیل پویچ و هامیته وه کفر و حکایەتیل کێوانویل کارد نود، بەڵکەم خوەد له خوداپەرەسی تەربیەت بکه.

⁸ چوینکه هەرچەن تەربیەت جەسه توزێگ فایده دێرێد، وەلێ خوداپەرەسی ئەڕا گشت چشتێگ فایده دێرێد و هەم زنەیی ئێرنگه واده دێ، هەم زنەیی وەرەڕویش.

⁹ ئی قسیه شایسەێ دڵنیایی و قەبوڵ بوینه کامڵه

¹⁰ که ئیمه ئمید خوەمان وه مل خوداێ زنی نایمنه که نجات دەر گشت ئایەمیل وه تایبەتی ئیمانداریله؛ و هەر ئەڕا ئیەیشه زامەت کیشیم و زور زمەکی کیم.

¹¹ ئی کاریله حوکم بکه‎ و تالیم بیه.

¹² مەیل با هویچکەسێگ توی وه سەوەو جاێەلێد وه سوک حساود بکێد، بەڵکەم وەناو وتار و کردەوه و مابەت و ئیمان و پاکێ، ئەڕا گشت ئیمانداریل بوه نمونه.

¹³ تا هاتنم، خوەد بنه ئەڕا ئیه که نویسریایل موقەدەس ئەڕا جەماێەت بخوەنید و ئاموژیاریان بکێ و تالیمیان بێی.

¹⁴ ئەو خەڵاتی خودا که ها ناود‎ مەخه پشت گوش، خەڵاتی خودا که وه وەسلەێ نەبوەت پەێا کردی، ئەو وەخته که خێل شێخیل وه ملدەو دەس هیشتن.

¹⁵ ئی چشتیله وه جێ بار و خوەد وه تەمامی ئەڕا ئەوه بنه تا پێش کەفتند ئەڕا گشتیەکی ئاشکرا بود.

¹⁶ خاس خاس، هوشده رێ رەوشت زنەیی و تالیم خوەد بو. وەناو ئەوانه بەردەوام بو، که ئەگەر ئیجوره بکێد هەم خوەد و هەم ئەوانه که وه‎ لێد شنەفن نجات دەێ.