یەکم نامەێ تیموتاوس 3 - کتاب مقدس به زبان کردی جنوبی - گویش کلهوری

هێوەتکەریل و خزمەتکاریل کلیسا

¹ ئی قسیه درسه که ئەگەر کەسێگ له تاسەێ کار هێوەتکەری وه مل کلیساوه‎ بود، ها له شون کار خاسێگەو.

² و ئی بونه، هێوەتکەر کلیسا نەبایه وەناو زنەیی چشتێگ بیاشتوی که بوده بایس سەرزەنشتێ، شوی وەفادار یەێ ژن بود، هوشیار بود، وەسەرخوێا زاڵ بود، ئاوڕویدار و مێواندار بود و تویەناێ تالیم بیاشتوید؛

³ نه سەرخوەشکەر یا زورگو، بەڵکەم دڵنەرم، نه مرافەکەر یا پویل دوس.

⁴ هەرئیجوره باێه بتوانێ بنەماڵەگەێ خوەێ خاس بخێده ڕێ و مناڵیلی وه کەماڵ سەنگین ڕەنگینی، گوش تەکن گەورا بکێد.

⁵ چوینکه ئەگەر کەسێگ نەزانید چوی بنەماڵەگەێ خوەێ بخێده ڕێ، ئێ چوی تویەنێ هوشی وه کلیساێ خوداوه‎ بود؟

⁶ جا نوئیمانیش نود، نەخواێ لویتبەرز بود و جور ئبلیس تویش ماکومیەت باێد.

⁷ جا باێه وەناو مەردم دەیشت کلیسا هەر ئیجوره ناوێ وه خاسێ دەر چوی تا ئیه که وه پەنی گیر دام ئبلیس ناید.

⁸ هەر ئیجوره شەماسەیل باێه سەنگین ڕەنگین بون؛ نه دوڕوی، یا گیرودەێ شراوخوەری یا وەشون مەمەر نا پەسەن بون.

⁹ باێه راز ئیمان وەگەرد وژدان پاکێگەو بپارێزنن.

¹⁰ جا باێه یەکم جار ئەزمون بون و ئەگەر ڕوشنەو بی که دویر له گلەیێن، له جیگەێ شەماس کلیسا خزمەت بکەن.

¹¹ هەر وه ئیجور، ژنیلیانیش باێه سەنگین ڕەنگین بون و نه بختکەر، بەڵکەم هوشیار بون و وه گشت چشتێگ وەفادار بون.

¹² هەر شەماسێگ باێه شوی وەفادار یەێ ژن بود هەر ئیجوره باێه مناڵیل و بنەماڵەگەێ خوەێ وه خاسێ بخێده‎ ڕێ.

¹³ شەماسێلێگ که خاس خزمەت کردوین، وه جیگەێ بان رەسن له ناو ئیمان خوێان وه مەسیح عیسا وه ئازای فرەگەوراێگ دەس پەێا کەن.

¹⁴ هەر چەن ئمید ئەوه دێرم که و ئی زویه بامه ئەڕا لاد، وەلێ ئیانه ئەڕاد نویسم،

¹⁵ تا ئەگەر ماتەڵی پیش هات، بزانێ که له ناو ماڵ خودا که کلیساێ خوداێ زنیه و کوڵەکه‎ و بنیان ڕاسیه، رێ رەوشتمان باێه چوی بود.

¹⁶ بێ گومان که راز خوداپەرەسی فره فره گەوراس: عیسا له جەسه دیار دا، له ڕێ روح خودا ڕاس بوینی مور کریاد، فریشتەیل دینەێ، وه ملەتیل بانگەوازی کریا، مەردم جهان وه ئەیو ئیمان هاوردن، وەگەرد جەڵاڵەو، بەرزەو کریا.