یەکم نامەێ تیموتاوس 2 - کتاب مقدس به زبان کردی جنوبی - گویش کلهوری

ئاموژیاری له باوەت دوعا و پەرەسش

¹ جا، وەرجه هەر چشتێگ، ئاموژیاری کەم که داواکارییل، دوعایل، ناوجێ کردنیل و شوکر کردنیل ئەڕا گشت مەردم وه جێ باێد،

² ئەڕا حاکمیل و گشت دەسڵاتداریل، تا بتویەنیمن زنەیی ئارام و ئاسودەێگ بیاشتویمن و له هەر باوەتەو وه خوداپەرەسی و سەنگین ڕەنگینی بێمنێ سەر.

³ ئەڕا ئیه که کار خاس و دڵخواز نجات دەر ئیمه خودا هەر ئیەسه

⁴ که تواێد گشتیەکی نجات پەێا بکەن و وه ماریفەت ڕاسی برەسن.

⁵ چوینکه تەنیا یەێ خودا هەس و له بین خودا و ئایەمیلیش تەنیا یەێ ناوجێکەر هەس، یانێ ئەو ئنسانه که مەسیح عیساس؛

⁶ ئەیو که وه کەفارەت گیان خوەێ، تاوان ڕزگاری گشت ئایەمیل دا. وه ئی ڕاسیه له وەخت مناسو شاێەتی دریاس،

⁷ ئەڕا ئیه که مه هەر وه ئی بونه هەڵوژاریامه تا بانگەوازیکەر و ڕەسول و ماموستاێ ئیمان ڕاسەکانی ئەڕا ناجویلەکەیل بوم، ڕاس ئویشم و درو نیویشم.

⁸ جا ئاوەختیم ئیەسه که پیاێل وه هەر شونێگ، بی ئیه که توڕه بون و بی قەپقاڵ، دەسیل موقەدەس ئەڕا دوعا کردن هەڵوڕنن.

⁹ هەر ئیجوره توام که ژنيل دڵنگیل شایسه بکەنه وەریان و خوێان وەگەرد حەیا و حرمەت و وەسەرخوێان زاڵ بوین بڕەژننەوه، نه وه قژیل چنیاێ یا تەڵا و مرواری یا دڵنگیل گران قیمەت،

¹⁰ بەڵکەم وه تەرکی کاریل خاس بڕەژیەنەو، ئەو جورەکه شایسەێ ژنیلێگه که ئویشن خودا پەرەسن.

¹¹ ژن وەختێ تالیم گرید باێه ئارامی بگرێ و خاس گوش بتەکنێ.

¹² نێیلم ژن تالیم بێید یا وه مل پیاێەو دەسڵات بیاشتوید؛ بەڵکەم باێه ئارام بود.

¹³ چوینکه یەکم جار ئایەم درس بی له شونێ حەوا.

¹⁴ جا ئایەم گول نەخوارد، بەڵکەم ژن بی که گول خوارد و خەتاکار بی.

¹⁵ وەلێ ژنيل وەگەرد مناڵ هاوردن ڕزگار بون، ئەگەر ئەوانه وەگە‎رد وەسەرخوێان زاڵ بوین وەناو ئیمان و مابەت و موقەدەس بوین، بەردەوام بمینن.