یەکم نامەێ تیموتاوس 1 - کتاب مقدس به زبان کردی جنوبی - گویش کلهوری1 له پولوس که وه حوکم نجات دەر ئیمه خودا و ئمیدمان مەسیح عیسا، ڕەسول مەسیح عیساس؛ 2 وه تیموتاوس، ڕوڵەێ ڕاسەکانیم وەناو ئیمان: فیز و رامەت و ئاشتی و سڵامەتی وه لاێ خوداێ باوگ و خوداوەندمان مەسیح عیسا وه ملدەو بود. هەڕەشه له باوەت تالیمیل نادرس 3 ئەو جورەکه له وەخت هاتنم وه مەنتەقەی مەقدونیه پاملد بیم، وه دواره له لێد توام وەناو ئەفسوس بمینێ تا وه بڕێگ فەرمان بێید که تالیمی تر نیەن 4 و سەر خویان وەگەرد مەسلەتیل و بنەچەکیلێ که بنێ نیەتێی گەرمەو نەکەن، چوینکه ئیانه له جێ بڵاو کردن کار خودا که له ڕێ ئیمان تێدە دی، دامەن دەنه قسیه و باسیل. 5 ئامانج ئی فەرمانه دوس داشتنه، دوس داشتنێگ که له دڵ پاک و وژدان درس و ئیمانێگ بی دوڕویی هەڵساس. 6 بڕێگ له ئایەمیل له ئی کاریله هەڵوگەردیانه و ڕوی هاوردنەسه قسیەیل مفت و 7 توان بونه ماموستایل شەریعەت، وه حاڵێگەو نیەزانن چه ئویشن یا له چ چشتێگ ئیجوره وه دڵنیایی قسیه کەن. 8 ئیمه زانیمن که شەریعەت خاسه، هەڵبەت ئەگەر کەسێگ وه درسی وه کار بویدەێ. 9 هەر ئیجوره زانیمن که شەریعەت نه ئەڕا درسکاریل، بەڵکەم ئەڕا یاسا شکەنیل و ملچەفتەوکەریل نویسریاس، ئەڕا خودانەناسیل و گوناکاریل، ناپاکیل و کفرچییل؛ قاتڵیل باوگ و قاتڵیل داڵگ؛ ئایەم کوشیل، 10 خێزیل و نیربازیل؛ بەرده فروشیل، شاێەتیدەریل دروەکانی، هەر ئیجوره ئەڕا هەر کارێگ که وه پێچەوانەێ تالیم درس بود، 11 تالیمێگ وه ڕوی ئینجیل پڕ جەڵاڵ خوداێ بمارک که وه مه سپاریاس. فیز خوداوەند ئەڕا پولوس 12 سپاس خوداوەندمان مەسیح عیسا که وه مه تویەناێ داس و شایسەێ دڵنیایی وه حساو هاورد و وه خزمەت خوەێ هەڵوژارد. 13 هەر چەن له جاران، کفرچی و ستەمکەریل و زورگو بیم، وەلێ بەزەیی وە مه کریا، چوینکه له ڕوی نەزانی و بی ئیمانی بی که ئیجوره کردیام. 14 فیز خوداوەند ئیمه له ڕێ ئیمان و مابەتێگ که وەناو مەسیح عیسا پەێا بود، فره فره ڕشیاده ملمانا. 15 حەقه ئی قسیه تەمام و کەماڵ قەبوڵ بود که مەسیح عیسا هاته جهان تا گوناکاریل نجات بێید، که مه گەوراترین ئەوانەمە. 16 وه ئی بونه، بەزەیی وەپێم کریا تا مەسیح عیسا سەور بێ پاێان خوەێ ئەڕا مه که گەوراترین گوناکاریل بیم، نیشان بێید، تا نمونەێگ بوم ئەڕا گشت ئەوانه که له ئیەولا وه ئەیو ئیمان هاوردنه و زنەیی ئەبەدی پەێا کەن. 17 وه ئەو خوداێگ که یەکێگە، پادشاێ دەورەیله، نەمر و نادیاریه، تا دنیا دنیاس حرمەت و جەڵاڵ بود؛ ئامین! 18 کوڕەگەم، تیموتاوس، ئی حوکمه وه ڕوی نەبوەتیلێگ که وەرجه ئیه له باوەت تنەو بیه، سپارمه پێد تا وه مەیەت ئەوانه وه خاسێ جەنگین ئەڕا خودا، بویده نوا، 19 و سفت هەڵبکیده قێ ئیمان و وژدان پاکێگ، ئەڕا ئیه که کەشتی ئیمان بڕێگ وه خاتر ژێر پا ناین ئەوانه شکیاسه ناو یەکەو. 20 هیمنائوس و ئەسکەنەر له ئی دەسەنه، که ئیانه دامه دەس شەیتانەو تا بوده مایەێ عبرەتێان و دیتر کفر نەکەن. |
@ 2024 Korpu Company