یەکم تسالونیکییل 5 - کتاب مقدس به زبان کردی جنوبی - گویش کلهوری

¹ وەلێ له باوەت وەختیل و تاریخیل، ئێ برایل، هەوەجی نێری چشتێگ ئەڕادان بنویسم.

² چوینکه خوەدان خاس زانين که ڕوژ هاتنەوەێ خوداوەند عیسا هەر جور دزێگ که شەوەناو تێد، رەسێد.

³ ئەو وەخته که مەردم ئویشن: «ئاشتی و سڵامەتی و ئەمنیە»، ئمجا له ناکاوه نابودی ڕشێیده ملێانەو، هەرئەوجوره که ژن ئێمڵه تویش ژان زایێن تێد؛ ئەوانه دەرچینێگ له لێ نێرن.

⁴ وەلێ ئیوه ئێ برایل، له ناو تیەریکی نين تا ئەو ڕوژه، جور دز لەناکاوه گیردان بارێ.

⁵ چوینکه ئیوه گشتدان مناڵیل نویر و مناڵیل ڕوژین؛ ئیمه هن شەو یا تیەریکی نیمن.

⁶ جا بان تا جور ئەوباقی مەردم خەو نەکەفێه پێمانەو، بەڵکەم وه خەوەر و هوشیار بویمن.

⁷ چوینکه ئەوانه که خەفن، شەوەناو خەفن و ئەوانه که سەرخوەش بون، شەوەناو سەرخوەش بون.

⁸ وەلێ ئیمه چوینکه هن ڕوژيم، بان تا هوشیار بویمن و ئیمان و مابەت هەر جور زرەێگ که سینه پوشنێد بکێمنه وەرمان و ئمید نجات هەر جور کڵاوخود بنیمنه بان سەرمان.

⁹ چوینکه خودا ئیمه نه ئەڕا خەزەو، بەڵکەم ئەڕا وه دەس هاوردن نجات له ڕێ خوداوەندمان عیسا مەسیح دیاری کردێه،

¹⁰ که وەبونەێ ئیمه مرد، تا چ وەخەوەر بویمن و چ وەناو خەو، وەگەرد ئەیو زنەیی بکێم.

¹¹ جا یەکان هان بێەن و بەنا بکەن، ئەو جوره که ئێرنگەیش ئی کاره کین.

ئاموژیاریێل ئاخر

¹² ئێ برایل، له لێدان توایم ئەوانه که له ناودان زامەت کیشن و له لاێ خوداوەندەو ڕابەريل ئیوەن و ئاموژیاریدان کەن، حرمەتیان بگرن و

¹³ وه مابەتەو ئەڕا کارێگ که کەن، خاس حرمەتیان بگرن. وەگەرد یەکترەکی له ئاشتی و سڵامەتی زنەیی بکەن.

¹⁴ ئێ برایل، لاڵکێيمنه‎ پێدانەو که لەمتیەیل ئاموژیاری بکەن؛ کەم جرئەتیل هان بێەن؛ وه بی هازیل مەیەت بێەن؛ وەگەرد گشتێان سەور بیاشتوین.

¹⁵ هوشدان بود، کەسێگ خراوی وەگەرد خراوی جواو نید، بەڵکەم هەمویشه وەشون خاسێ کردن وه یەکترەکی و وه گشت مەردم بوین.

¹⁶ هەمویشه دڵشاد بوین؛

¹⁷ یەێ‌سەر دوعا بکێن؛

¹⁸ له هەر وەز و حاڵێگ سپاس خودا بکەن، چوینکه ئیه ئەڕا ئیوه خاست خوداس وەناو مەسیح عیسا.

¹⁹ ئاگر روح خودا مەکوشننەو؛

²⁰ نەبوەتیل سوک وه حساو نارین.

²¹ بەڵکەم گشت چشتێگ ئەزمون بکێن؛ قورس بلچکێینه ئەو چشته که خاسه.

²² له هەر جور خراوی دویرەو بکەفن.

²³ با خوداێ ئاشتی و سڵامەتی، خوەێ ئیوه وه تەمامی تەقدیس بکێد و گشت روح و گیان و لەشدان وه ڕوژ هاتنەوەێ خوداوەندمان عیسا مەسیح، بی نەخس بپارێزیەد.

²⁴ ئەیو که ئیوه دەنگ کەی ئەمینە و بی خەڵاف ئی کاره کەی.

²⁵ ئێ برایل، ئەڕا ئیمه دوعا بکەن.

²⁶ وه ماچێ موقەدەس وه گشت برایل سڵام برەسنن.

²⁷ له لاێ خوداوەند، قەسەمدان دەم که ئی نامه ئەڕا گشت برایل بخوەنین.

²⁸ فیز خوداوەند ئیمه عیسا مەسیح وەگەرددانەو بود.