یەکم تسالونیکییل 4 - کتاب مقدس به زبان کردی جنوبی - گویش کلهوری

زنەیی که خودا خوەشنودەو کەی

¹ جا دەس ئاخر، ئێ برایل، ئیوه لەلێمان یاێ گردین که ڕێ رەوشتدان باێه چوی بود تا خودا خوەشنود بکێن، هەر ئەوجورە که ئیجوریشه کین. ئیسه وەناو خوداوەند عیسا لەلێدان توایمن و لاڵکێیمنه پێدان که له ئی باوەتەو هەر چی فرەتر تەقالا بکێن.

² چوینکه ئاگادارین که له ڕێ خوداوەند عیسا، چ حوکمیلێگ دایمنه پێدان.

³ چوینکه خاست خودا ئیەسه که موقەدەس بوین: خوەدان له خیزی دویرەو بکەن.

⁴ هەر کامدان باێه بزانێ که چوی وەناو موقەدەس بوین و حرمەت، جەسەێ بگرێه ژێر فەرمان خوەێ.

⁵ نەبایه هەر جور ناجویلەکەیلێگ که خودا نیەناسن، دەسخوەشەێ هەواوهەوەس شاوەت بوین.

⁶ هویچکەسێگ نەبایه له ئی باوەته وه حەق براگەێ خوەێ خەتا و دەس‎دریژی بکێ. چوینکه خوداوەند سزاێ گشت ئی کاريله دێ، ئەو جوره که وەرجه ئیه وەتیمنه پێدان و حساوی هەڕەشه له لێدان کردیم.

⁷ چوینکه خودا ئیمه نه وه ناپاکی بەڵکەم وه قودوسیەت دەنگ کردێه.

⁸ جا، هەر کەسێگ که ئی تالیمه ڕەد بکێ، نه ئنسان، بەڵکەم خوداێگ ڕەد کردێه که روح قودوس خوەێ دەێده ئیوه.

⁹ ئێرنگه له باوەت مابەت براێانەدان هەوەجی نێرین تا کەسێگ چشتێ ئەڕادان بنویسێ، چوینکه خوەدان له خودا یاێ گردینه که یەکترەکی‎ مابەت بکێن و

¹⁰ وه ڕاسی که وه گشت برایل له سەرئانسەر مەنتەقەێ مەقدونیه مابەت کین. وەلێ ئێ برایل، لاڵکێیمنه پێدان که ئی کاره فرەتر و فرەتر وه جێ بارین.

¹¹ تاسەێ ئیه داشتوین که زنەیی ئارامێگ بیاشتوین و سەردان خەریک کار خوەدان بود و وه دەسيل خوەدان کار بکەن، هەر ئەوجورە که وه ئیوه حوکم کردیم،

¹² تا وه نوای مەردم دەیشت کلیسا ڕێ رەوشتدان وه درسی بود و هەوەجیدان وه کەسێگیش نەکەفێ.

هاتن خوداوەند عیسا

¹³ وەلێ ئێ برایل، نیەتوایم له حاڵ ئیمانداریلێگ که مردنه بی خەوەر بوین، نەخواێ جور ئەوباقی مەردم که ئمیدێگ نێرن، بنیشینه ئازیەتی.

¹⁴ چوینکه ئەگەر ئیمان دێریم که عیسا مرد و وەدواره زنیەو بی، جا هەر وه ئیجوره، خودا ئەو ئیمانداریلێگ که مردنه، له ڕێ عیسا تیەرێدەو.

¹⁵ ئیه وه وەسلەێ کەڵام خود خوداوەند جار دیمنه پێدان: ئیمه که زنیمن و تا هاتن خوداوەند باقی مینیم، نیەکەفیمنه نوای ئەو ئیمانداریلێگ که مردنه.

¹⁶ چوینکه خوداوەند خوەێ وه فەرمانێگ که وه دەنگ بەرزه، وەگەرد دەنگ سەروک فریشتەیل و دەنگ شەیپور خودا، له ئاسمانەو تێدە خوار. ئەو وەخته یەکم جار ئیمانداریل وه مەسیح که مردنه، زنیەو بون.

¹⁷ جا ئیمه که زنیمن و باقی مەنیمنه، وەگەرد ئەوانه وەرەو ناو هەوریل کیشیمنه بان تا وەناو هەواوه خوداوەند‎ بوینیم، وەئیجوره هەمویشه هایمنه گەرد خوداوەندەو.

¹⁸ جا وەئی قسیەيله، یەکترەکی هان بێەن.