یەکم تسالونیکییل 3 - کتاب مقدس به زبان کردی جنوبی - گویش کلهوری

¹ جا وەختێ دیتر نەتویەنسیم تاموڵ بکێم، رازی بیمن که له شار ئاتن تەنیا بیلنەمان.

² جا تیموتاوس که براێ ئیمه و هاوکار خودا له کار ئینجیل مەسیحه، کل کردیمنه ئەڕا لادان تا ئیوه له ئیماندان بەردەوام بکێد و هاندان بێید،

³ تا هویچکەسێگ وه بونەێ ئی بەردیله نەکەفیه ڕکه، چوینکه ئیوه خوەدان خاس زانين که ئیمه ئەڕا ئیه دیاری کریایمنه.

⁴ چوینکه وەختێگ که وەگەرد ئیوه بیمن، هەر ئیجوره وەرجەوە وەپێدان وەتیایم که ئیمه باێه عەزاو و بەرد بوینیمن، هەر ئەوجورە که ئاگادارین، ئیجورەیشه بیه.

⁵ وه ئی بونه، وەختێ دیتر تویەنا نیاشتم، تیموتاوس کل کردم تا له ئیماندان ئاگادارەو بوم، چوینکه ڕخم چیاد که ئەو خەڵەتنه یانێ ئبلیس وه لەونێ ئیوه بخەڵەتنی و زامەت ئیمه له کیس بچود.

خەوەر دڵگەرمکەر تیموتاوس

⁶ وەلێ ئێرنگه تیموتاوس لەلادان هاتیەسەو ئەڕا لامان و مزگانی ئیمان و مابەت ئیوه ئەڕامان هاوردێه. ئەوه خەوەر داسه پێمان که ئیوه هەمویشه له ئیمه وه مێرەبانی یاێ کین و هەر ئەوجورە که ئیمه تاسەێ دیندان دێریم، ئیوەیش تاسەێ دین ئیمه دێرین.

⁷ وه ئی بونه، ئێ برایل، ئیمه وەناو گشت پەشێویل و بەردیلمان، وەبونەێ ئیماندان له باوەت ئیوه دڵگەرمەو بیمنه.

⁸ چوینکه ئێرنگه ئەگەر ئیوه وەناو خوداوەند بەردەوام بمینێن ئەو وەختەسه که ئیمه زنەیی کەیمن.

⁹ ئەڕا ئیه که ئێ چوی تویەنیمن وەبونەێ ئیوه سپاس خودا بکێم، وەبونەێ ئی هەمگه خوەشیه که له لاێ خودامان ئەڕادان دێریم؟

¹⁰ ئیمه شەو و ڕوژ وه دڵ و گیان دوعا کيمن که ڕوی وه ڕوی بوینیمنەدان و هەر کەم کوتی ئیماندان پەرچەو بکێم.

¹¹ با ئێرنگه خودامان یانێ باوگ ئاسمانیمان خوەێ و خوداوەندمان عیسا، ڕێ ئیمه وەر‎و لادان هامار بکێد

¹² و هەر ئەوجورە که مابەت ئیمه وه ئیوه فرەوه بود، خوداوەند مابەتدان وه یەکترەکی و وه گشت مەردم فرەوه بکێ و فراوانیەو بکێد.

¹³ تا دڵدان قورسەو بکێ تا ئەو وەخته که خوداوەندمان عیسا وەگەرد گشت موقەدەسیل خوەێ تێد، وه لاێ خودامان یانێ باوگ ئاسمانیمان، بی نەخس و موقەدەس بوین.