یەکم تسالونیکییل 2 - کتاب مقدس به زبان کردی جنوبی - گویش کلهوریخزمەت کردن پولوس له تسالونیکی 1 ئێ برایل، چوینکه خوەدان زانين که هاتن ئیمه له لاێ ئیوه وه هویچ پەتی نوی، 2 بەڵکەم ئەو جوره که زانين، هەر چەن وەرجەوە له شار فیلیپی عەزاو دیمن و وه خراوی ڕێ رەوشت وەگەردمانا کریاد، وەلێ وەناو خوداێ خوەمان، ئازای دایمنه خەرج تا وەناوڕاس ئی هەمگه ناکوکیه ئینجیل خودا وەپێدان جار بێیم. 3 چوینکه ئەگەر هاندان دیم، له ڕوی هەڵه یا خاستەیل ناپاک نیه و نیەتوایم فریودان بێیم، 4 بەڵکەم جور کەسیلێگ قسیه کیم که خودا وه ملێانەو مور قەبوڵێ کوتاس و ئینجیل سپاریاسه پێان. ئیمه وەشون خوەشنود کردن مەردم نیمن، بەڵکەم خوەشنودی خوداێگ توایم که دڵمان دەێده تەفرەنج. 5 چوینکه ئیوه خاس زانين و خودا شاێەته که ئیمه هەراێهەر زوانبازی نەکردیمنه و نقاویگ نەنایمنەسه بان دەمچەومان تا تەما بپوشنێ. 6 هەر ئیجوره وه شون ئیه نویمنه که ئیوه یا کەسیلێگ تر جەڵاڵمان بێەن. هەر چەن له جیگەێ ڕەسولەیل مەسیح حەق وه ملدانەو داشتیم که ئیه وه لێدان بتوایم، 7 وەلێ هەر جور داڵگێگ که هێوەت مناڵیلی کەی، وەگەرددانەو وه نەرمی رێ رەوشت کردیمنه. 8 ئەوقره خوەشمانه لێدان هات که گورجەو بیمن نه تەنیا ئینجیل خودا وەپێدان برەسنیم، بەڵکەم گیانمانیش له ڕێ ئیوه بێیم، وەبونەێ ئیه که ئیوه ئەڕامان فره عەزیزەو بوین. 9 چوینکه ئێ برایل، مێنەت و سەختیمان ها هویردان، که شەو و ڕوژ کار کردیایم تا وەختێگ ئینجیل خودا وەپێدان جار دايمن، سەربار هویچ کامدان نویمن. 10 ئیوه شاێەتین و خودایش خوەێ شاێەته که رێ رەوشتمان وەگەرد ئیوه ئیمانداریل چەنێ موقەدەس و سالحان و بی نەخس بی. 11 ئەڕا ئیه که زانين که چوی، هەر جور ڕێ رەوشت باوگێگ وەگەرد مناڵیلێ، 12 ئیمەیش هەر کام له لێدان هان دایمن و دڵنەوایی کردیمن و سپاردیمنه پێدان تا ڕێ رەوشتدان ئەوجورە بود که شایسەێ خوداس، خوداێگ که ئیوه وه پادشایی و جەڵاڵ خوەێ دەنگ کەێد. 13 هەر ئیجوره ئیمه یەێ‌سەر وه ئی بونه سپاس خودا کەیمن که ئیوه له وەخت قەبوڵ کردن کەڵام خودا، که له ئیمه شنەفتین، ئەوه نه جور قسیەيل ئنسان، بەڵکەم جور کەڵام خودا قەبوڵ کردین، که وه ڕاسی هەر ئیجورەسه؛ هەر ئەو کەڵامه که وەناودان که ئیمان دێرین، کار کەێد. 14 چوینکه ئێ برایل، ئیوه له کلیسایل خودا له ناوچەێ یەهودیه که وەناو مەسیح عیسان، نمونه گردین: چوینکه ئیوه له هاووڵاتییل خوەدان، هەر ئەو عەزاویله دین که ئەوانه له جویلەکەیل دین، 15 هەر له ئەو جویلەکەیلی که هەم خوداوەند عیسا و هەم پەێخەمەریل کوشتن و ئیمەیش دەرکردن. ئەوانه خودا خوەشنودەو نیەکەن و وەگەرد گشت ئایەمیل دشمەنی کەن 16 و نێیلن ئیمه وەگەرد ناجویلەکەیل قسیه بکێم تا نجات پەێا بکەن. وەئیجوره هەمویشه پەێمانەی گونایلێان نیقەڵتوزەو کەن. وەلێ خەزەو خودا دەس ئاخر وه ملێانەو ڕشیاس. ئەزرەت پولوس ئەڕا سەر داین وه ئیمانداریل تسالونیکی 17 وەلێ ئێ برایل، چوینکه ماوەێ کەمێگ له ئیوه دویرەو کەفتیم، هەڵبەت وه جەسه نه وه دڵ، وه ئەزرەت و تاسەێ فرەترێگ تەقالا کیم تا ئیوه ڕوی وه ڕوی بوینیم. 18 ئەڕا ئیه که تواسیایم بایمنه ئەڕا لادان - خود خوەم، پولوس، چەن جار تەقالا کردم - وەلێ شەیتان نوامان گرد. 19 چوینکه چەس ئمید یا خوەشی یا تاج شانازی ئیمه له نوای خوداوەندمان عیسا له وەخت هاتنێ؟ مەر ئیوه نیين؟ 20 چوینکه ئیوەین جەڵاڵ و خوەشی ئیمه. |
@ 2024 Korpu Company