یەکم تسالونیکییل 1 - کتاب مقدس به زبان کردی جنوبی - گویش کلهوری

¹ له پولوس و سیلاس و تیموتاوس، وه کلیساێ شار تسالونیکی که هانه ناو خوداێ باوگ و خوداوەند عیسا مەسیح: فیز و ئاشتی و سڵامەتی وه ملدانەو بود.

شوکرکردن و دوعا

² ئیمه هەمویشه وه خاتر گشتدان شوکر خودا کیم و یەێ‌سەر له دوعایلمان ناودان تیەرێم،

³ و له لاێ خودا، باوگ ئاسمانیمان، کار ئیوه که له ئیمانه و مەینەت ئیوه که له مابەته و بەردەوامیدان که له ئمید وه خوداوەندمان عیسا مەسیحه، تیەرێمنه هویر.

⁴ چوینکه ئێ برایل زانیمن که خودا دوسدان دێرێ و هەڵدانوژاردیه.

⁵ ئەڕا ئیه که ئینجیلێگ که ئیمه جار دایمنه نه تەنیا وەگەرد کەلیمەیل، بەڵکەم وەناو هێز و وەناو روح‌القودوس و وەگەرد دڵنیایی کامڵ وه پێدان رەسێ، ئیوه زانين که وه خاتر ئیوه رێ رەوشتمان وه‌ناودان چوی بی.

⁶ ئیوه له ئیمه و له خوداوەند نمونه گردین، چوینکه له ناو بەرد فره، کەڵام خودا وه خوەشی که له روح‌القودوسه قەبوڵ کردین.

⁷ وەئیجوره ئیوه بینه نمونه ئەڕا گشت ئیمانداریل ناوچەێل مەقدونیه و ئەخائیه،

⁸ چوینکه کەڵام خوداوەند له لاێ ئیوه نه تەنیا له مەقدونیه و ئەخائیه دەنگ داسەو، بەڵکەم ئیمان ئیوه وه خودا له گشت کوره کەفتیەسه سەر زوانیل، ئەوجورە که دیتر هەوەجی نێری ئیمه چشتێگ بویشیم.

⁹ چوینکه ئەوانه خوێان تاریف کەن که چوی ئیوه وه ڕوی خوەش له بین خوەدان قەبوڵمان کردین و له ئیەک چوی له بتیل دەس کیشاین و وەر‎و خودا هەڵوگەردیاین تا خوداێ زنی و ڕاسەکانی خزمەت بکێن

¹⁰ و تا چەوەڕێ هاتن کوڕ خودا له ئاسمان بوین، هەر ئەوه که خودا له مردگیل زنیەو کرد، یانێ عیسا، که ئیمه له خەزەوێگ که ها له وەرەڕوی ڕزگاری بەخشێد.