یەکم پتروس 5 - کتاب مقدس به زبان کردی جنوبی - گویش کلهوری

شێخیل و جوانیل

¹ من که خوەم یەکی له شێخیلم و شاێەت رەنجیل مەسیح و هاوبەش جەڵاڵێگ که وه ئی زویه ئاشکرا بود، شێخیلێگ که هانه ناودان ئاموژیاری کەم که:‏

² ریەنەگەێ خودا که هانه ناودان شوانی بکەن و هێوەتێان بکەن، وەلێ نه وه زور بەڵکەم وه مەیل و دڵ خوەدان، ئەوجورە که خودا تواێ؛ نه وه تەمای نەف خوەدان بەڵکەم له ڕوی شوق و زوق.

³ نه ئەوه که وه مل کەسیلێگ که وه دەس ئیوه سپاریانه گەورەێ بکێن، بەڵکەم ئەڕا ڕیەنەگه نمونه بوین.

⁴ وەختێگ گەورەێ شوانیل ئاشکرا بود، تاج جەڵاڵێگ که له بین نیەچود، گرین.

⁵ هەرئیجوره ئیوه ئێ جوانیل، له شێخیل گوش بتەکنن. گشتدان وەناو ڕێ رەوشتدان وەگەرد یەکترەکی دڵنگ بێ فیسی بکەنه وەردان چوینکه، «خودا وه نوای لویتبەرزەیل وسێد، وەلێ وه بێ فیسیل فیز بەخشێد.»

⁶ جا خوەدان له ژێر دەس تویەناێ خودا بێ فیسەو بکێن تا له وەخت مناسو سەربەرزدان بکێد.

⁷ گشت نگرانییلدان بسپارنه ئەیو چوینکه ئەیو ها له فکردان.

⁸ جا هوشیار بوین، هوشدان بود. دشمەندان ئبلیس هەر جور شێرێگ که قیڕنێد و خڕ خوێد وەشون کەسێگ گەردێد تا قویرتی بێید.

⁹ جا وه نوای ئەوه بوسین، وەناو ئیماندان قورس بون، چوینکه زانین برايلدان وەناو دنیا هەر ئی زامەتیله کیشن.

¹⁰ وەشون ئیه که توزێگ زامەت دین، خوداێ گشت فیزیل که ئیوه وەناو مەسیح وه جەڵاڵ ئەبەدی خوەێ دەنگ کردێه، خوەێ ئیوه له سەر نو نێده پاوه و قورس و تویەنا و بەردەوام کەێد.

¹¹ تا ئەبەد و تا ئەبەد حوکمرانی وه ئەیو بود. ئامین.

دورودیل ئاخر

¹² وه وەسلەێ سیلاس که ئەوه هەر جور براێ ئەمینێگ زانم، ئی چەن خەته کوڵ و کوڵبڕ ئەڕا ئیوه نویسامه تا هاندان بێەم و شاێەتی بێەم که هەر ئیەسه فیز ڕاسەکانی خودا. وەناو ئی فیزه قورس بوسن.

¹³ خویشکێ که ها شار بابڵ که هەر جور ئیوه هەڵوژاریایه، هەرئیجوره کوڕەگەم، مەرقوس، سڵامدان رەسنن.

¹⁴ یەکان وەگەرد ماچێگ له سەر مابەت سڵام بویشن. وه گشتدان که هاینه ناو مەسیح ئاشتی و سڵامەتی بود.