یەکم پتروس 4 - کتاب مقدس به زبان کردی جنوبی - گویش کلهوری

زنەیی ئەڕا خودا

¹ جا چوینکه مەسیح وه جەسه رەنج کیشا، خوەدان هەر وه ئەو فکره چەکدار و گورجەو بکەن، چوینکه هەر کەسێگ که وەناو جەسه رەنج کیشاس، دیتر وەگەرد گونا کارێگ نێرید و

² وەئی بونه باقی ژیانی وه جەسه ئەڕا خاست خودا زنەیی کێ، نه ئەڕا هەواوهەوەسیل بەشەری.

³ ئەڕا ئیه که جاران وه ئەنازەێ کافی ژیان خوێان له وه جێ هاوردن ئەو چشته که قەومیل بتپەرەس خوەشیانه لێ تێد، خەرج کردینه و ڕوژگار وه هەرزەی و هەواوهەوەس و سەرخوەشی و عەێاشی و بەزمەیل شراوخوەری و بتپەرەسی قیزهاوەر داینەسەێ سەر.

⁴ وه ئی بونه، وەختێ که وەناو ئی بی بەن و باریەل بی حساو وەگەرد ئەوانه هاوبەش نیەوین، سەریان سڕ مەنیه و دژمین دەنه پێدان.

⁵ وەلێ ئەوانه وه خوداێگ که ‎گورجه تا وه مل زنییل و مردگیل داوەری بکێد، حساو دەنەو.

⁶ وه ئی بونەسه که تەنانەت وه مردگیلیش ئینجیل مزگانی دریاس تا ئیه که ئەوانه هەر چەن وەناو جەسه جور گشت ئایەمیل داوەری بینه، وەلێ وەناو روح هەر ئەو جوره که خودا تواێ، زنەیی بکەن.

⁷ ئاخر گشت چشتێگ نزیکه؛ جا وه سەر خوەدان زاڵ بون و وه بونەێ دوعایلدان هوشیار بون.

⁸ گرنگتر له گشتێ، یەکترەکی وه گیان و دڵ مابەت بکێن، چوینکه مابەت، گونایل فرەێگ داپوشنێ.

⁹ یەکترەکی بی خوتەخوت مێوانی بکێن.

¹⁰ هەر جور کار وه دەسیل خاسێگ که فیز جورواجور خودا سپاریاسه ئەوانه، هەر کام له ئیوه، خەڵاتی که دینەسەو، ئەڕا خزمەت وه یەکترەکی وه کار بوەن.

¹¹ هەر کەسێگ قسیه کەێد، با قسیەێ جور قسیەيل خودا بود؛ هەر کەسێگ خزمەت کەێد، وەگەرد هێزێگ که خودا وه پێ بەخشێد خزمەت بکێد، تا له گشت چشتێگ، خودا له ڕێ عیسا مەسیح جەڵاڵ پەێا بکێ. جەڵاڵ و حوکمرانی تا ئەبەد و تا ئەبەد وه ئەیو بود. ئامین.

رەنج کیشاین وەبونەێ ئیمان

¹² ئێ عەزیزەیل، له ئی ئاگرێگه که ئەڕا ئەزمون ئیوه له ناودان ها پاوه، ئەڵاجویدان ناید، جوری که چماێ چشت غەریوێگ وه سەردان هاتێه.

¹³ بەڵکەم خوەشاڵ بوین له ئیەک وەناو رەنجیل مەسیح بەشدار بوین، تا له وەخت ئاشکرابوین جەڵاڵ ئەیو هەم دڵشاد بوین و هەم خوەشی بکێن.

¹⁴ ئەگەر وەبونەێ ناو مەسیح خراو دانه پێدان، خوەش وه حاڵدان، چوینکه روح جەڵاڵ که هەر ئەو روح خوداسه، وه ملدانەو نیشتەجێ بود.

¹⁵ وەلێ نێلین که هویچکامدان وه ناو خوینکەرێگ یا دزێگ یا بەێ کردەوەێگ یا تەنانەت فتفاتکەرێگ، عەزاو بکیشێ.

¹⁶ وەلێ ئەگەر کەسێگ وە ناو مەسیحییگ رەنج کیشێد، شەرمزار نود، بەڵکەم خودا وەناو ئی ناوه جەڵاڵ بێید.

¹⁷ چوینکه وەخت ئەوه ڕەسیه که داوەری له ئاڵ ماڵ خودا شرو بود؛ ئەگەر شروی له ئیمەس، جا ئاخر ئەوانه که گوش له ئینجیل خودا نیەتەکنن، بوده چه؟

¹⁸ جا «ئەگەر ئایەم سالحان وە سەختی نجات پەێا کێ، ئێ ئایەم خودانەناس و گوناکار چه وەسەرێ تێد؟»

¹⁹ جا بیل کەسیلێگ که وه پێ خاست خودا رەنج کیشن، گیانیل خوێان بسپارنه دەس ’درسکەر ئەمین‘ و لەناو کاریل خاس بەردەوام بون.