یەکم پتروس 2 - کتاب مقدس به زبان کردی جنوبی - گویش کلهوری

¹ جا هەر جور دڵپێسی و هەر جور فێڵ و دوڕویی و حەسویی و هەر جور بختێگ له خوەدان دویرەو بکەن.

² هەر جور مناڵه کوڕپەیل، تاسەێ شیر ناب روحانی بوین تا وه مەیەت ئەوه ئەڕا نجات، گەوراوه بوین،

³ ئەگەر وه ڕاسی تام ئیه کردینه که خوداوەند خاسه.

کوچگ زنی و قەوم هەڵوژاریای

⁴ وه نزیکەو بوین وه ئەیو، یانێ وه ئەو کوچگ زنیه که ئایەمیل دانەێ لا وەلێ له چەو خودا هەڵوژاریای و گران قیمەتە،

⁵ ئیوەیش خوەدان جور کوچگیل زنی وێنەێ ماڵێگ روحانی نرێینه سەرپاوه تا کاهنیلێگ موقەدەس بوین و وه وەسلەێ عیسا مەسیح، قوروانییل روحانی که خودا قەبوڵێ کەێد، پیشکەش بکێن.

⁶ چوینکه له ناو کتاو ئەشعەیاێ پەێخەمەر هاتێه که:‏ «بنوڕ، له بان کویەێ سەهیون کوچگیگ دا نەم، کوچگیگ که گرنگترین کوچگ بنەواس، هەڵوژاریای و گران قیمەت؛ هەر کەس که ئیمان بارێده پێ شەرمزار نیود.»

⁷ جا ئی کوچگه ئەڕا ئیوه که ئیمان هاوردینه، حرمەته؛ وەلێ ئەڕا ئەوانه که ئیمان ناوردنه، «کوچگیگ که بەناگان ڕەدێ کردن بیەسه گرنگترین کوچگ بنەوا،»

⁸ هەر ئیجوره، «کوچگیگ که سەوەو زەوی خواردن بود و تاش کەمەرێگ که بایس کەفتن بود.» ئیانه دەنه زەویا چوینکه له کەڵام خودا گوش نیەتەکنن، هەر ئەوجورە که ئەڕا ئی کاره دیاری کریانه.

⁹ وەلێ ئیوه نەتەوەێگ هەڵوژاریای و کاهنيلێگین که وێنەێ پادشا کاهنی کەن؛ ملەتێگ موقەدەسێگین و قەومێگین که مێلکان خود خوداین؛ تا سفەتیل بەرز ئەیو جار بێین که ئیوه له تیەریکی وەرەو نویر سەرسڕهاوەر خوەێ دەنگ کرد.

¹⁰ وەرجه ئیه قەومێگ نوین، وەلێ ئێرنگه قەوم خوداین؛ زەمانێگ له بەزەیی ماروم بوین، وەلێ ئێرنگه بەزەیی هاتیەسه پێدانەو.

¹¹ ئێ عەزیزەیل، وه ئیوه که وەناو ئی جهانه بێگانه و غەریوین لاڵکمه پێدانەو، له هەواوهەوەسیل جەسەیی که وەگەرد گیاندان شەڕ کەن، خوەدان بپارێزنن.

¹² کردەوەدان وەناو بی ئیمانیل وه حرمەتەو بود تا وه ئیجوره وەختێگ که وه زد ئیوه قسیه کەن و ئویشن کردەوەدان خراوه، کاریل خاسدان بوینن و وەناو ڕوژی که خودا دوینن، جەڵاڵی بێەن.

گوش تەکانن له دەسڵاتداریل

¹³ وەبونەێ خوداوەند، له هەر دەسڵاتدارێگ گوش بتەکنن که له ناو ئنسانیل دیاری کریاس، تواێ پادشا که بانتر له گشت یەکێگە،

¹⁴ تواێ حاکمیل بون، که له لاێ ئەوه کل کریانه تا بەێ کاریل سزا بێەن و ئەوانه که کردەوەێان خاسه، هان بێەن.

¹⁵ چوینکه خاست خودا ئیەسه که وەگەرد خاسێ کردن، نەفامی مەردم گیلگەوج، بێدەنگەو بکێن.

¹⁶ هەر جور ئایەمیل ڕزگار زنەیی بکەن، وەلێ ڕزگاری خوەدان مەکەنه سەرپوشێگ ئەڕا شەڕئاشویی، بەڵکەم هەر جور خوڵامیل خودا زنەیی بکەن.

¹⁷ حرمەت گشتیەکی بگرن، برایل مابەت بکەن، له خودا ڕخدان بچود و حرمەت پادشا بگرن.

¹⁸ ئێ خوڵامیل، وه کەماڵ حرمەتەو له ئەرواویلدان گوش بتەکنن، نه تەنیا ئەرواویلێگ که خاس و نەرمن، بەڵکەم ئەوانیش که ستەمکەرن.

¹⁹ چوینکه ئیه کار پڕ له فیزێگه که کەسێگ وەئەو بونه که خودا ها وەر چەویا، وەختێ وه نا‎حەق دێرێ رەنج کیشێد، سەختییله تاموڵ بکێد.

²⁰ چوینکه ئەگەر گوناێگ بکێن و وه بونەێەو بێەنه لێدان و تاموڵ بکێن، چ شونێگ ئەڕا شانازیه؟ وەلێ ئەگەر خاسێ بکێن و له جێ ئەوه رەنج بوينین و تاموڵ بکێن، له وەر چەو خودا کار پڕ له فیزێگه.

²¹ چوینکه وه ئیه دەنگ کریاینه، ئەڕا ئیه که مەسیحیش ئەڕا ئیوه رەنج کیشا و نمونەێگ ئەڕادان هیشت تا پا بنینه شونه پاگەێ.

²² «ئەیو هویچ گوناێگ نەکرد و فریوێ وه ناو دەمێ پەێا نوی.»

²³ وەختێ خراو دانه پێ، خراوەگه نێادەوپێان و ئەو وەخته که رەنج کیشا، هەڕەشه نەکرد، بەڵکەم هەر ئەوجورە خوەێ سپارده دەس خوداێگ که وه دادپەروەری حوکم کێ.

²⁴ مەسیح خوەێ گونایل ئیمه وەناو جەسەێ خوەێ کیشاده بان سەلیب، تا له باوەت گونا بمریم و ئەڕا سالح بوین زنەیی بکێم. ئیوه وه زامیلێ شەفا پەێا کردینه.

²⁵ چوینکه هەر جور پەسیل ڕێ گوم کریاێگ بین، وەلێ ئیسه وەرەو شوان و هێوەتکەر گیانیلدان هەڵوگەردیاینه.