یەکم یوحەنا 5 - کتاب مقدس به زبان کردی جنوبی - گویش کلهوری

زاڵ بوین وه جهان

¹ هەر کەسێگ ئیمان وه ئیه دێرێ که عیسا هەر ئەیو مەسیح وادەدریاێەسه، ئەوه له خودا هاتیەسه دنیا. هەر کەسێگ باوگ دوس دێرێ، کەسێگیش که له لێ هاتیەسه دنیا دوس دێرێ.

² له ئیه زانیمن که ڕوڵەیل خودا دوس دێریم، که خودا دوس بیاشتویم و حوکمیلێ وه جێ باریم.

³ چوینکه دوس داشتن خودا ئیەسه که حوکمیلێ وه جێ باریم، حوکمیل ئەیو بار قورسیگ نیه.

⁴ چوینکه هەر کەسێگ له خودا هاتیەسه دنیا وه ئی جهانه زاڵ بود. ئیمانمان ئەو سەرکەفتنەسه که وه جهان زاڵ بویه.

⁵ کیه که وه جهان زاڵ بود؟ بێجگه ئەوه که ئیمان دێرێ عیسا کوڕ خوداس؟

⁶ ئیه هەر ئەوەسه که وه ئاو و خوین هات، یانێ عیسا مەسیح. نه تەنیا وه ئاو، بەڵکەم وه ئاو و خوین. روح خوداس که شاێەتی دەێ، چوینکه روح خودا ڕاسیه.

⁷ چوینکه ئەوانەێ که شاێەتی دەن سێیانن:

⁸ روح خودا و ئاو و خوین. شاێەتی ئی سێیانه وەگەرد یەکا جور دەر تێد.

⁹ ئەگەر شاێەتی ئایەمیل قەبوڵ بکێم، شاێەتی خودا فره گەوراتره، چوینکه ئیه شاێەتی خوداس که له باوەت کوڕەگەێ داس.

¹⁰ ئەوه که ئیمان وه کوڕ خودا بارێ، ئی شاێەتیه وەناو خوەێ دێرێ. ئەوه که ئیمان وه خودا نارێ، خودا وه دروزن داسەقەلەم، چوینکه ئەو شاێەتیه که خودا له باوەت کوڕەگەێ داس، باوەڕ نەکردیه.

¹¹ ئەو شاێەتێیشه ئیەسه که خودا ژیان ئەبەدی دا پێمان و ئی ژیانه هاناو کوڕەگەێ.

¹² ئەوه که کوڕ بیاشتود، ژیان دێرێ و ئەوه که کوڕ خودا نیاشتود، ژیان نێری.

دەس ئاخر

¹³ ئی چشتیله ئەڕا ئیوه نویسم که وه ناو کوڕ خودا ئیمان دێرین، تا بزانین که ژیان ئەبەدی دێرین.

¹⁴ ئیەسه ئەو دڵنیاییه که له وه ئەیو دێریم که ئەگەر وه پێ خاست ئەیو داواێ چشتێ له لێ بکێم، شنەفیدەمان.

¹⁵ ئەگەر زانیم که هەر چی له لێ داوا بکێم، شنەفیدەمان، جا ئیه زانیم که ئەو چشتیله له لێ داوا کردیمنه، دێریم.

¹⁶ ئەگەر کەسێگ بوینی براگەێ گوناێگ کەێد که بایس مردن نیود، دوعا بکێ و خودا ژیان بەخشیده پێ، ئیه له باوەت کەسیلێگ ئویشم که گونایلێگ کەن که بایس مردن نیود، گوناێگ هەس که بوده بایس مردن. له باوەت ئیجور گوناێگ نیویشم که باێه دوعا کرد.

¹⁷ هەر کار نادرسێگ گوناس، وەلێ گوناێگیش هەس که بایس مردن نیود.

¹⁸ ئیمه زانیمن که هەر کەسێگ له خودا هاتیەسه دنیا وه گونا کردن بەردەوام نیەمینێ، بەڵکەم ’ئەو کوڕ خودا که له خودا هاتیەسه دنیا‘ پارێزنێدێ و دەس ئەو شەڕئاشوه نیەرەسێده پێ.

¹⁹ ئیمه زانیمن که له خودایمن و گشت جهان پاڵەو داسه ژێر هێز ئەو شەڕئاشوه.

²⁰ هەر ئیجوره ئیمه زانیمن که کوڕ خودا هاتێه و فام داسه پێمان تا ئەیو بناسیم که ڕاسه، ئیمه هایمنه ناو ئەیو که ڕاسه. یانێ وەناو عیسا مەسیح کوڕ ئەیو. ئەیو خوداێ ڕاسەکانی و زنەیی ئەبەدیه.

²¹ ئێ ڕوڵەیل ورد، خوەدان له بتەگان بپارێزنن.