یەکم یوحەنا 4 - کتاب مقدس به زبان کردی جنوبی - گویش کلهوری

روحیل ئەزمون بکەن

¹ ئێ عەزیزەیل، وه هەر روحێگ باوەڕ نەکێن، بەڵکەم روحیل ئەزمون بکەن تا بوینین له خودان یا نه. چوینکه نەبوەتکەریل دروەکانی فرەێگ وەناو جهان تەفرتویناوه بینه.

² روح خودا ئیجوره تویەنین بناسین: هەر روحێگ وه زوان بارێ عیسا مەسیح وەناو جەسەێ بەشەری هاتێه، ئەوه له خوداس.

³ هەر روحێگیش وه زوان نارێ عیسا وەناو جەسەێ بەشەری هاتێه، له خودا نیه. ئیه هەر ئەو روح ”زد مەسیحەسه“ که شنەفتینه تێد و ئێرنگەیش ها ناو جهان.

⁴ ئێ ڕوڵەیل ورد، ئیوه له خوداین و وه سەر ئەو نەبوەتکەریل دروەکانیه زاڵەو بوینه، چوینکه ئەوه که ها ناو ئیوه له ئەوه که ها ناو ئی جهانه گەوراتره.

⁵ ئەوانه له جهانن و وەبونەێ ئیه له جهان قسیه کەن، جهانیش گوش گرێه قسیەیان.

⁶ ئیمه له خودایمن و هەر که خودا بناسێ، وه ئیمه گوش گری. هەر که له خودا نیه، وه ئیمه گوش نیەگرێ. له ئی ڕێه روح ڕاسی له روح گومڕایی ناسیم.

خودا مابەته

⁷ ئێ عەزیزەیل، بان تا یەکترەکی مابەت بکێم، چوینکه مابەت له خوداس و هەر کەسێگ که مابەت کەی، له خودا هاتیەسه دنیا و خودا ناسی.

⁸ ئەوه که مابەت نیەکێ، خودا نیەناسێ، چوینکه خودا مابەته.

⁹ وه ئیجوره مابەت خودا وەناومان ئاشکرا بی که خودا تەنیا کوڕەگەێ خوەێ کل کرده جهان تا له ڕێ ئەیو زنەیی بکێمن.

¹⁰ مابەت هەر ئیەسه، نه ئەوه که ئیمه خودا مابەت کردیمنه، بەڵکەم ئەیو ئیمه مابەت کرد و کوڕەگەێ خوەێ کل کرد تا بوده کەفارەت گونایلمان.

¹¹ ئێ عەزیزەیل، ئەگەر خودا ئیمه ئیجوره مابەت کرد، ئیمەیش باێه یەکترەکی مابەت بکێم.

¹² هویچکەس هەراێهەر خودا نێه. ئەگەر ئیمه یەکترەکی مابەت بکێم، خودا وەناومان نیشتەجێه و مابەتەگەێ وەناومان وه کەماڵ ڕەسیه.

¹³ له ئیه زانیمن که وەناو ئەیو نیشتەجێیم و ئەیویش وەناو ئیمه، چوینکه له روح خوەێ وه ئیمه بەخشاس.

¹⁴ ئیمەیش دیمنه و شاێەتی دەیم که باوگ ئاسمانی، کوڕەگەێ خوەێ کل کردێه تا بوده نجات دەر جهان.

¹⁵ ئەوه که ئێقرار کێ عیسا کوڕ خوداس، خودا وەناوێ نیشتەجێه و ئەویش وەناو خودا.

¹⁶ جا ئیمه مابەتێ که خودا وەپێمان دێرێ ناسیمنه و ئیمانه پێ هاوردیمنه. خودا مابەته، ئەوه که وەناو مابەت نیشتەجێ بود، وەناو خودا نیشتەجێه و خودایش وەناو ئەوه نیشتەجێه.

¹⁷ وه ئیجوره مابەت وەناومان وه کەماڵ ڕەسیه تا وەناو ڕوژ داوەری دڵنیا بویمن، چوینکه ئیمەیش وەناو ئی جهانه هەر ئەوجورەیمە که ئەیو هەس.

¹⁸ وەناو مابەت زاورچین نیه، بەڵکەم مابەت کامڵ، زاورچین کیه دەیشت. چوینکه زاورچین له سزا سەرچاوه گرید و ئەوه که زاورێ چود وەناو مابەت وه کەماڵ نەرەسیه.

¹⁹ ئیمه مابەت کەیمن چوینکه یەکم جار ئەیو مابەتمان کرد.

²⁰ ئەگەر کەسێگ بویشی ”خودا دوس دێرم“ و قینێ له براگەێ خوەێ باێ، ئەوه دروزنه. چوینکه کەسێگ که براگەێ خوەێ که وه چەو دیه، دوسی نیاشتود، نیەتویەنی خوداێگ که وه چەو نیه، دوس بیاشتود.

²¹ ئیمەیش ئی حوکمه له ئەیو گردیمنه که هەر کەسێگ که خودا دوس دێرێ، باێه براگەێ خویشێ دوس بیاشتود.