یەکم یوحەنا 3 - کتاب مقدس به زبان کردی جنوبی - گویش کلهوری

¹ بنوڕن که باوگ ئاسمانی چ مابەتێ و ئیمه کردێه، تا وەپێمان بویشن ڕوڵەیل خودا! جا ئیجوریشه هەیم! وه ئی بونەسه جهان نیەناسیدەمان، چوینکه ئەیو نەناسیه.

² ئێ عەزیزەیل، ئێرنگه ڕوڵەیل خودایم، هێمراێ ئاشکرا نویه بویمنه چه. وەلێ زانیمن وەختێ ئەیو ئاشکرا بود بویمنه وێنەێ ئەیو، چوینکه ئەیو هەر ئەوجورە که هەس، دوینیمنێ.

³ هەر کەس وه ئەیو ئیجور ئمیدێگ دێرێ، خوەێ پاکەو کەی، هەر ئەوجورە که ئەیو پاکه.

⁴ هەر کەسێگ وەناو گونا زنەیی کەی وه زد شەریعەتیش کار کەی، گونا وه زد شەریعەت کار کردنه.

⁵ ئیوه زانین که ئەیو ئاشکرا بی تا گونایل لا بوی. وەناو ئەیو هویچ گوناێگ نیه.

⁶ هەر کەسێگ وەناو ئەیو نیشتەجێه، وه گونا کردن بەردەوام نیەمینێ. هەر کەسێگ وەناو گونا بەردەوام بمینێ، نه ئەیو دیه و نه ناسیەسێ.

⁷ ئێ ڕوڵەیل ورد، با کەس گومڕادان نەکێ. هەر کەسێگ ئەو چشته که درسه وەجێ بارێ، سالحانه. هەر ئەوجورە که ئەیو سالحانه.

⁸ هەر کەسێگ وەناو گونا زنەیی بکێ له ئبلیسه، چوینکه ئبلیس هەر له سەرەتا گونا کردیاد و گونا کەی. کوڕ خودا وه ئی بونه ئاشکرا بی تا کاریل ئبلیس نابود بکێ.

⁹ هەر کەسێگ له خوداوه هاتیەسه دنیا، وەناو گونا زنەیی نیەکێ، چوینکه توخمتەرەکەێ خودا وەناوێ نیشتەجێه. جا ئەوه نیەتویەنی وەناو گونا بەردەوام بمینێ چوینکه له خوداوه هاتیەسه دنیا.

¹⁰ ڕوڵەیل خودا و ڕوڵەیل ئبلیس ئیجوره مالوم بون: هەر کەسێگ ئەو چشته که درسه وەجێ نارێ و یا براێ خوەێ دوس نیاشتود، له خودا نیه.

یەکترەکی دوس بیاشتون

¹¹ چوینکه ئیه هەر ئەو پێخامەسه که له سەرەتا شنەفتینه، که باێه یەکترەکی دوس بیاشتویم.

¹² ئیمه نەبایه جور قائن بویمن، ئەوه که هن ئەو شەڕئاشوه بی و براگەێ خوەێ کوشت. ئەڕا چه کوشتی؟ چوینکه کاریل خوەێ خراو بی و کاریل براگەێ درس بی.

¹³ ئێ برایل، ئەڵاجویدان نای له ئیه که جهان قینێ له لێدان تێ.

¹⁴ ئیمه زانیمن که له مەرگ گوزەریایمنه و رەسیمنەسه ژیان، چوینکه دوس برایل دێریم. هەر کەسێگ که مابەت نیەکێ، وەناو مەرگ نیشتەجێه.

¹⁵ هەر کەسێگ قینێ له براێ خوەێ باێ، خوینکەره، ئیوه زانین که زنەیی ئەبەدی وەناو هویچ خوینکەرێگ نیشتەجێ نیه.

¹⁶ وه ئیجوره مابەت ناسیم که مەسیح زنەیی خوەێ ئەڕا ئیمه دا و ئیمەیش باێه زنەیی خوەمان ئەڕا برایل بێیم.

¹⁷ وەلێ ئەگەر کەسێگ دارایی و ماڵ دنیا داشتوی و براێ خوەێ وه نەداری بوینی وەلێ بەزەیێه پێ نای، ئێ چوی مابەت خودا وەناو ئیجور کەسێگ نیشتەجێ بود؟

¹⁸ ئێ ڕوڵەیل ورد، بان مابەت بکێم، نه وه وتار و زوان، بەڵکەم وه کردەوه و ڕاسی.

¹⁹ له ئیه تویەنیم بزانیم که وه ڕاسی تالوق دێریم و تویەنیمن دڵ خوەمان وه لاێ خودا دڵنیاوه بکێم.

²⁰ چوینکه وەختێ دڵمان ماکوممان بکێ، خودا له دڵمان گەوراتره و له گشت چشتێگ ئاگاداره.

²¹ ئێ عەزیزەیل، ئەگەر دڵمان ماکوممان نەکێ، وه لاێ خودا دڵنیایمن

²² و هەر چی له لێ داوا بکێم وه دەس تیەرێم، چوینکه حوکمیلێ وه جێ تیەرێمن و ئەو کاره کەیمن که بوده بایس خوەشنودی ئەیو.

²³ حوکمەگەیشێ ئیەسه که، وه ناو عیسا مەسیح کوڕێ ئیمان باریم و یەکترەکی مابەت بکێم، هەر ئەوجورە که وەپێمان حوکم کردێه.

²⁴ هەر کەسێگ حوکمیل ئەیو وه جێ بارێ، وەناو خودا نیشتەجێه، هەر ئیجوریشه خودا وەناوێ. له ڕێ روح خوەێ که بەخشیەسه پێمان، زانیمن که ئەیو وەناومان نیشتەجێه.