یەکم قورنتییل 9 - کتاب مقدس به زبان کردی جنوبی - گویش کلهوری

پولوس له حەق خوەێ گوزیشت

¹ ئێ مه ڕزگار نیم؟ ئێ مه ڕەسول نیم؟ ئێ خوداوەندمان عیسا نێیمه؟ ئێ ئیوه بەر کار من وەناو خوداوەند نین؟

² ئەگەر ئەڕا ئەو باقی مەردم ڕەسول نیم، بێ گومان ئەڕا ئیوه هەم؛ چوینکه ئیوه ئەو مورینه که نیشان دەێ من وەناو خوداوەند ڕەسولم.

³ مه لەنواێ ئەوانه که له باوەت من نیشنه داوەری، ئیجوره له خوەم دەفا کەم.

⁴ ئێ حەق نێریم بخوەیمن و بنوشیم؟

⁵ ئێ حەق نێریم جور ئەو باقی ڕەسولەیل و برایل خوداوەند و کیفا، هاوسەر ئیماندارێگ وەگەرد خوەمانەو بیاشتویمن؟

⁶ جا ئێ تەنیا من و بەرنابایمن که باێه ئەڕا گوزەران ژیانمان کار بکێم؟

⁷ کیه که وه خەرج خوەێ سەربازی بکێ؟ کیه که باخ ئەنگویرێگ بخێ و له میوەگەێ نەخوەێ؟ یا کیه که ڕیەنێگ شوانی بکێ و له شیرەگەێ بەشێگ نیاشتود؟

⁸ مەر مه ئی قسیەیله وه دەسڵات بەشەڕی ئویشم؟ ئێ شەریعەتیش ئیجوره نیویشی؟

⁹ چوینکه وەناو شەریعەت موسا نویسریاس: «گاێگ که خەرمان کوتی، دەمێ نەوەس.» ئێ خودا ها فکر گاێیل؟

¹⁰ ئێ ئیه له باوەت ئیمه نیویشی؟ وه ڕاسی، ئی کەڵامه ئەڕا ئیمه نویسریاس، ئەڕا ئیه که وەختێ کەسێگ زەوی جفت کێ، یا خەرمان کوتی، باێه ئمیدوار بود که له ئەو بەره بەشێگ بوید.

¹¹ ئەگەر ئیمه وەناودان تویەم روحانی وەشانیم، ئێ ئیه کار گەوراێگه که بەر ماڵی له لێدان بسێنیم؟

¹² ئەگەر کەسیل تر حەق دێرن که له لێدان سود بوەن، ئێ ئیمه فرەتر حەق نێریم؟ وەلێ ئیمه سودێگ له ئی حەقه نەگردیم، بەڵکەم هەر چشتێگ تاموڵ کردیمنه تا نوای ڕێ ئینجیل مەسیح نەگریمن.

¹³ ئێ نيەزانين ئەوانه که وەناو مابەد خەریک کارن، خواردەمەنیان له مابەد گرن، هەر ئیجوره خزمەتکاریل ناو قوروانگا له چشتیل بان ئەو شونه که قوروانی کەن بەشێگ بەن،

¹⁴ هەر ویجوره، خوداوەند دەستور داس، ئەوانه که ئینجیل بانگەوازی کەن، گوزەرانیان له سەر ئینجیل بود.

¹⁵ وەلێ من له هویچکام له ئی حەقیله بەشێگ نەوردمه، ئیەیشه نیەنویسم تا ئەڕا مه ئیجوره بکێن. بمرم خاستره که یەکیگ ئی شانازیه له لێم بگرێ.

¹⁶ ئەگەر مه ئینجیل بانگەوازی کەم، ئیه ئی حەقه نێیده پێم که شانازی بکەم، ئەڕا ئیه که ناچارم؛ بەڵکەم وای وه حاڵم ئەگەر بانگەوازی نەکەم!

¹⁷ چوینکه ئەگەر وه خاست خوەم ئی کاره بکردیام، دەسخوەشانەێگ داشتیام؛ وەلێ ئەگەر وه خاست خوەم نود، تەنیا ئەو چشته که ها کوڵمەو وه جێ تیەرم.

¹⁸ جا چ دەسخوەشانەێ تویەنم بیاشتوم؟ تەنیا ئیەک وه پەتی ئینجیل بانگەوازی بکەم و سودێگ له حەق خوەم هەڵنەگرم.

¹⁹ چوینکه هەرچەن له گشتیەکی ڕزگارم، خوەم خوڵام گشتیەکی کردم تا قێر فرەێگ وه مەسیح ئیمان بارن.

²⁰ له لاێ جویلەکەیل جور جویلەکە زنەیی کردم، تا جویلەکەیل وه ئیمان بارم. ئەڕا ئەوانه که هانه ژێر شەریعەت، خوەم جور کەسێگ کردم که ها ژێر شەریعەت، هەر چەن خوەم وه ژێر شەریعەت نویم - تا ئەوانه که هانه ژێر شەریعەت وه ئیمان بارم.

²¹ له لاێ ناجویلەکەیل که شەریعەت موسای پەێخەمەر نێرن بیمەسه جور ئەوانه، هەر چەن جیا له شەریعەت خودا نویم، بەڵکەم هامه ژێر شەریعەت مەسیح، تا بتوانم ئەوانه که وه ژێر شەریعەت نین وه ئیمان بارم.

²² وەگەرد بی هازیل، بی هازەو بیمه تا بی هازیل ئەڕا مەسیح وه ئیمان بارم. ئەڕا گشتیەکی بیمەسه گشت چشتێگ تا وه هەر شێوەێگ بتویەنم قێرێگ نجات بێەم.

²³ گشت ئی چشتیله وەبونەێ ئینجیل کەم، تا وەناو بەەرکەتەگەێ بەشدار بوم.

²⁴ ئێ نيەزانين وەناو مەێدان موسابقه، گشتیەکی دەون، وەلێ تەنیا یەکیگێان خەڵاتەگه بێدەو؟ جا جوری بدەون تا خەڵاتەگه وه دەس بارین.

²⁵ هەر کەس موسابقه دەێ، وەناو گشت چشتێگ سەختی دەێه خوەێ. ئەوانه ئیجوره کەن تا تاج گوڵیگ که له بین چود، وه دەس بارن؛ وەلێ ئیمه ئیجوره کيمن تا تاجێگ که له بین نیەچود وه دەس باریم.

²⁶ جا مه بی ئامانج دەو نیەکەم، مه جور کەسێگ که مشت کوتێدە هەوا، مشت نیەکوتم؛

²⁷ بەڵکەم سەختی دەمه لەشم و کەمێ خوڵام خوەم، نەخواێ وەشون بانگەوازی وه مەردم، خوەم ڕفوزه بوم.