یەکم قورنتییل 8 - کتاب مقدس به زبان کردی جنوبی - گویش کلهوری

له باوەت خواردەمەنی پیشکەشی وه بتیل

¹ له باوەت خواردەمەنی پیشکەشی وه بتیل: زانیمن که «گشتمان ئایەمیل زاناێگیم.» وەلێ زانایی بوده بایس لویتبەرزی، وەلێ مابەت، بنیاد نێ.

² ئەو کەسه که گومان کێ چشتێگ زانی، هێمراێ ئەوجورە که باێه بزانێ، نیەزانێ.

³ وەلێ ئەوه که خودا دوس دێرێ، له لاێ خودا ناسیاس.

⁴ جا له باوەت خواردن خواردەمەنیێلێ که پیشکەش بتیل بود، زانیمن که «بت هەر هویچ نیه،» و «بێجگه یە خودا، خوداێگ تر نیه.»

⁵ چوینکه هەر چەن هەن ئەوانه که خوداییل خوەنریەن، چ وەبان زەوی و چ وەناو ئاسمان - ئەوجورە که وه ڕاسیش ئەڕا مەردمیل ’خوداییل‘ فرەێگ و ’خوداوەندیل‘ فرەێگ هەس -

⁶ وەلێ ئیمه تەنیا یە خودا دێریم، یانێ باوگ ئاسمانی، که گشت چشت له ئەیوه و ئیمه هن ئەویمنه؛ تەنیا یە خوداوەند هەس، یانێ عیسا مەسیح، که گشت چشتێگ له ڕێ ئەیو وه دی هات و ئیمه له ڕێ ئەیو هیمن.

⁷ وەئی حاڵەو گشتیەکی ئیه نیەزانن. ئەڕا ئیه که بڕێگ تا ئێرنگه ئەوقره چشکیانەسە بتیل که هێمراێ ئەگەر له ئی خوراردەمەنییلی که وه ڕاسی وه بتیل پیشکەش بینه بخوەن، وژدانێان چەپەڵەو بود، ئەڕا ئیه که بی هازن.

⁸ «خواردەمەنی، ئیمه وه خودا نزیکەو نیەکێ»؛ نه وەگەرد نەخواردن بەترەو بویمن و نه وەگەرد خواردن خاستر.

⁹ وەلێ هوشدان بود که ئی حەقدانه، نوده کوچگیگ وه نوای پاێ بی هازیل.

¹⁰ ئەڕا ئیه که ئەگەر یەکیگ که وژدانێ بی هاز بود و بوینی تو که زانایی و وەناو بتخانه نیشتیدەسە خواردن، ئێ هانی نێرێید تا له خواردەمەنی پیشکەشی وه بتیل بخوێ؟

¹¹ جا ویجوره، زاناییەگەد بوده بایس نابودی ئەو براێ بی هازه که مەسیح وەبونەێ مرد.

¹² هناێ ئیجوره وه زد برایلدان گونا کین و وژدان بی هازیان زامدار کین، هەر ئەوجورە وه مەسیح گونا کین.

¹³ وه ئی بونه، ئەگەر خواردەمەنی بایس کەفتن براگەم بود، تا سەرم زنیه گوشت نیەخوەم تا نەومه ئەو کوچگه که بایس کەفتنێ بود.