یەکم قورنتییل 7 - کتاب مقدس به زبان کردی جنوبی - گویش کلهوری

له باوەت هاوسەردارێ

¹ ئێرنگه له باوەت ئەو چشتیلی که ئەڕام نویساینه، ئویشین: «خاس نیه پیا دەس بیده قێ ژنێگ.»

² وەلێ وەبونەێ خێزیێلێ که هەس، هەر پیاێگ باێه ژن خوەێ بیاشتود و هەر ژنێگ شوی خوەێ.

³ پیا باێه دێنی که وه مل ژنەگەێ دێرێ وه جێ بارێ و ژنەگەیش ئەڕا شویەگەێ.

⁴ ژن دەسڵاتی وه سەر جەسەێ خوەێ نێری بەڵکەم هن شویەگەێه، جا پیایش دەسڵاتی وه سەر جەسەێ خوەێ نێری بەڵکەم هن ژنەگەیه.

⁵ جا یەکترەکی له حەق ژن شویی بی‎بەش مەکەن، مەر وه رزایەت یەکترەکی و ئەڕا ماوەێ کەمێگ، تا خوەدان خەریک دوعا بکێن. ئمجا وەدواره وەگەرد یەکترەکی جفت بوین، نەخواێ شەیتان وەبونەێ ئیه که وەسەرخوەدان زاڵ نیەوین، بخەڵەتنێدەدان.

⁶ ئی قسیه که کەم فەرمانێگ نیه، بەڵکەم تەنیا رەوای زانم.

⁷ ئەزرەت ئیه داشتم که گشتدان جور من بویاتیان، وەلێ هەر کەس خەڵاتی وه تایبەتی له خودا گردێه؛ یەکی یە خەڵاتی دێرێ و یەکیگتر خەڵاتێگتر.

⁸ وه ئەوانە که هاوسەر نەگردنه و ئەڕا بیوەيل ئویشم خاس بی ئەوانیش هەر جور مه ئازەو بمێنیان.

⁹ وەلێ ئەگەر وەسەرخوێان زاڵ نیەون، باێه هاوسەر بگرن، ئەڕا ئیه که هاوسەرگیری خاستره له سزیاین وەناو ئاگر شاوەت.

¹⁰ حوکمم ئەڕا ژن و شوییل ئیەسه - هەڵبەت نه حوکم مه، بەڵکەم حوکم خوداوەند - که ژن نەبایه له شویەگەێ جیاوه بود.

¹¹ وەلێ ئەگەر جیاوه بی، دی نەبایه شوی بکێ یا ئیه که باێه وەگەرد شویەگەێ ئاشتی بکێ. پیایش نەبایه ژنەگەێ تەڵاق بێی.

¹² وه ئەو باقیدان ئویشم - مه ئویشم نه خوداوەند - که ئەگەر براێگ ژنەگەێ بی ئیمان بود و ئەو ژنه بتواێ وەگەردیەو زنەیی بکێ، ئەو برا نەبایه ژنەگەێ تەڵاق بێی.

¹³ هەر ئیجوره ئەگەر ژنێگ شویەگەێ بی ئیمان بود و ئەو پیا بتواێ وەگەردیەو زنەیی بکێ، ئەو ژنه نەبایه شویەگەێ تەڵاق بێی.

¹⁴ ئەڕا ئیه که شوی بی ئیمان وه بونەێ هاوسەرەگەێ پاکەو بود جا ژن بی ئیمان وه بونەێ شویەگەێ. ئەگەر نه، مناڵیلدان ناپاکەو بویان؛ وەلێ ئیجوره نیه، بەڵکەم ئەوانه پاکن.

¹⁵ وەلێ ئەگەر ئەوه که بی ئیمانه بتواێ جیاوه بود، بیل ئیجوره بکێ. وەناو ئی لەون چشتیله شوی یا ژن ئیماندار ناچار نیه وەگەردیەو زنەیی بکێ. وەلێ خودا ئەڕا ئاشتی و سڵامەتی دەنگمان کردێه.

¹⁶ چوینکه ئێ ژن، له کوره زانید که بایس نیەوێد که شویەگەد نجات پەێا بکێ؟ جا ئێ پیا، له کوره زانید که بایس نجات ژنەگەد ‎نیەویدن؟

¹⁷ تەنیا بیلێن هەر کەس ئەوجورە که خوداوەند ئەڕاێ دیاری کردێه و خودا ئەڕا ئەوه دەنگێ کردێه زنەیی بکێ. ئیه یاساێگه که من وەناو گشت کلیسایل حوکمه پێ کەم.

¹⁸ ئێ کەسێگ بیه که له وەخت دەنگ کردنەگەێ لەلاێ خودا، وەرجەوە خەتەنه بویه؟ خەتەنه بێنی نەشاریدەو؛ ئێ کەسێگ بیه که له وەخت دەنگ کردنەگەێ لەلاێ خودا، خەتەنه نویه؟ با ئەویش خەتەنه نود.

¹⁹ ئەڕا ئیه که خەتەنه کردن یا نەکردنی گرنگ نیه، بەڵکەم وه جێ هاوردن حوکمیل خودا گرنگه.

²⁰ هەر کەس وه هەر وەزیگ که خودا دەنگێ کردێه با هەر ئەوجورە بمینێ.

²¹ ئێ وەختێ که دەنگ کریایده، خوڵام بیده؟ خەمد نود. وەلێ ئەگەر تویەنێ ڕزگاری خوەد وه دەس بارێ، ئی دەرفەته له دەس مەێه.

²² چوینکه ئەوه که خوڵام بوی وەختێ خوداوەند دەنگێ کردێه، بوده ڕزگار کریاێ خوداوەند؛ هەر ئیجوره ئەوه که ڕزگار بی و دەنگ کریاس بیەسه خوڵام مەسیح.

²³ وه نرخ گرانێگ سەنریاینه، جا خوڵام ئنسانیل نەون.

²⁴ جا ئێ برایل، هەر کەس وه هەر وەزوحالێگ که دەنگ کریاس، هەر ئەوجورە لەلاێ خوداوه بمینێد.

²⁵ وەلێ له باوەت دویەتیلێگ که وەخت شوی کردنێانه، حوکمێگ له خوداوەند نێرم؛ وەلێ وه جیگەێ کەسێگ که له ڕێ بەزەیی خوداوەند شایسەێ دڵنیاییه، باوەڕ خوەم ئویشم.

²⁶ من ئیجوره فکر کەم که وەبونەێ زامەتیل ئی زەمانه ئەڕا ئنسان خاسه هەر ئەوجورە که هەس، بمینێ.

²⁷ ئەگەر ژن خوازیده، داواێ جیاوه بوینەلێ مەکه. ئەگەر ژن نەخوازیده، وەشون ژن خوازین نەو.

²⁸ وەلێ ئەگەر ژن خوازیده، گونا نەکردیده؛ جا ئەگەر دویەتازەوێگ که دیاری کریاس شوی بکێ، گونا نەکردێه. وەلێ ئەوانەێ که هاوسەر گرن، وەناو ئی ژیانه تویش سەختی تیەن و من نیەتوام تویش ئی رەنجیله باین.

²⁹ برایل، مەبەستم ئیەسه وەخت کەمه. له ئیەودویا، تەنانەت ئەوانه که ژن دێرن جوری زنەیی بکەن که چماێ ژن نێرن و

³⁰ ئەوانه که ئازیەتبارن، جوری بون که چماێ ئازیەتبار نین؛ ئەوانه که شادن، جوری بون که چماێ شاد نین؛ ئەوانه که چشتێ سێنن، جوری بون که چماێ خاون ئەو چشته نین و

³¹ ئەوانه که سودێان له ئی جهانەسه، جوری بون که چماێ دڵ نەوەسانەسەپێ. چوینکه وێنەێ ئی جهانه دێرێ له بین چود.

³² خاست من ئیەسه که له هەر نگرانیگ دویر بوین. کوڕێگ که ژن نەخوازیه نگران کاروبار خوداوەنده، نگران ئیه که چوی خوداوەند خوەشنودەو بکێ؛

³³ وەلێ پیاێ ژن دار نگران کاروبار ئی جهانەسه، نگران ئیه که چوی ژنەگەێ خوەشنودەو بکێ و

³⁴ ویجوره دڵی بین خودا و ژنەگەێ بەشبەشەو بود. هەر ئەوجورە، ژن بێ شوی یا دویەت ئازەو، نگران کاروبار خوداوەنده، نگران ئیه که چوی وه جەسەوه وەناو روح خودا، موقەدەس بود؛ وەلێ ژن شوی دار نگران کاروبار ئی جهانەسه، نگران ئیه که چوی شویەگەێ خوەشنودەو بکێ.

³⁵ من ئی قسیەیله ئەڕا خێریەت خوەدان ئویشم، نه که تویش زنجیردان بکەم. مەبەستم ئیەسه که وه شایسەی زنەیی بکێن و هویچ نگرانیگ نوادان ئەڕا سەرسپاردن وه خوداوەند نەگری.

³⁶ ئەگەر کەسێگ فکرێ ئیجورەسه که وەگەرد دەزویرانەگەێ خوەێ که دویەت ئازەوه وه درسی ڕێ رەوشت نیەکێ و هەستەگەێ وه ئەنازەیگه که باێه ژن بخوازێ، خاستره که ئەوانه وه پێ مێلەگەیان یەکترەکی بخوازن؛ وەگەرد ئی کاره گونا نیەکەن.

³⁷ وەلێ ئەگەر پیاێگ وه قوڕن دڵەو بتواێ و وه ژێر فشار نود، بەڵکەم دەسڵات وه سەر خاستەگەێ بیاشتود و پشت ئەڕاێ بەساس که دەزویرانەگەێ خوەێ که دویەت ئازەوه جارێ نەخوازیدەێ، ئەو پیایشێ کار خاسێگ کێ.

³⁸ جا ئەوه که دەزویرانەگەێ خوەێ وه هاوسەری گری، کار خاسێ کێ؛ وەلێ ئەوه که هاوسەر نیەگری، کار خاسترێگ کێ.

³⁹ ژن تا وەختێگ شویەگەێ زنیه، بەسریایەسه ملێەو. وەلێ ئەگەر شویەگەێ بمرێ، ڕزگاره وه هەر کەسێگ که بتواێ شوی بکێ، تەنیا وه مەرج ئیه که وه خوداوەند ئیمان بیاشتود.

⁴⁰ وەلێ وه باوەڕ من بەختەوەرتره ئەگەر شوی نەکێ و فکر کەم که منیش روح خودا دێرم!