یەکم قورنتییل 5 - کتاب مقدس به زبان کردی جنوبی - گویش کلهوری

خیزی وەناو کلیسا

¹ وه ڕاسی خەوەر ڕەسیه که خیزی ها ناودان، ئەویش وه لەونی که ئی کاره ئەوقره گە‎نه تەنانەت بتپەرەسیلیش نیەتویەنن تاموڵی بکەن. شنەفتمه پیاێگ وەگەرد باوەژنێ خەفتیه.

² جا ئیوه شانازی کین! ئێ نەبایه ئازیەتبار بوین و کەسێگ که ئیجور کارێگ کردێه وەناو خوەدان دەرێ بکێن؟

³ ئەڕا ئیه که هەر چەن وه جەسەوه له لادان نیم، وەلێ وەناو روح هامه ئەوره و چماێ هامه گەرددان، وەرجەوە له باوەت کەسێگ که ئیجور کارێ کردێه، حوکم دامه.

⁴ وەختێ وه ناو خوداوەند عیسا گردەو بوین و منیش وه روح هامه ئەوره، وه هێز خوداوەندمان عیسا،

⁵ ئیوه باێه ئی پیا بێینی دەس شەیتان تا وەگەرد له بین چین جەسەگەێ، روحەگەێ له ڕوژ خوداوەند عیسا نجات پەێا بکێ.

⁶ شانازی‎کردنێدان له ئی باوەته هویچ درس نیه. ئێ نيەزانين که توزێگ خەویرترش تویەنێ گشت خەویرەگه هەڵ بارێ؟

⁷ جا خوەدان له خەویرترش کویەنه پاکەو بکێن تا بوینه خەویر تازه، ئەوجورە که ئیوه وه ڕاسی فەتیرەین. چوینکه مەسیح، وەرک پسەخ ئیمه، قوروانی بیه.

⁸ جا بان ئی جەشن پسەخه نه وەگەرد خەویرترش کویەنه، یانێ خەویرترش دڵپێسی و شەڕئاشویی، بەڵکەم وەگەرد فەتیرەێ ڕاسی و درسی وه جێ باریم.

⁹ وەناو ئەو نامەگەم، ئەڕادان نویسام که وەگەرد داوانپێسیل هات‎بچو نەکەن.

¹⁰ وەلێ مەبەستم ئیه نوی که وەگەرد داوانپێسیل ئی جهانه یا وەگەرد تەماکاریل یا فێڵبازیل یا بتپەرەسیل هات‎بچو نەکێن، چوینکه ئەو وەخته باێه ئی جهانه بیلێنه جێ و بچین.

¹¹ وەلێ ئێرنگه ئەڕادان نویسم که وەگەرد کەسێگ که خوەێ وه برا زانی، وەلێ خیز، یا تەماکار یا بتپەرەس یا خراودەر یا سەرخوەشکەر یا فێڵبازه، هاتبچو نەکێن و تەنانەت وەگەرد ئیجور کەسێگ هاوسفره نەون.

¹² چوینکه وه مه چه که له باوەت مەردم دەیشت کلیسا داوەری بکەم. وەلێ ئێ داوەری له باوەت ئەوانه که هانه ناو کلیسا، وه مل ئیوه نیه؟

¹³ خودا خوەێ له باوەت مەردمیل دەیشتەو داوەری کێ. جا «ئەو ئایەم خراوکاره وەناو خوەدان دەرێ بکەن.»