یەکم قورنتییل 4 - کتاب مقدس به زبان کردی جنوبی - گویش کلهوری

ڕەسولەیل مەسیح

¹ جا گشتیەکی باێه ئیمه جور خزمەتکاریل مەسیح و کاروەدەسیل رازیل خودا بوینن.

² جا ئێرنگه باێه کاروەدەس ئەمین بود.

³ وەلێ ئەڕا مه ئەوقره گرنگ نیه که وه دەس ئیوه یا هەر دادگای ئنسانی ترێگ داوەری بوم. مه تەنانەت خوەمیش له باوەت خوەم داوەری نیەکەم.

⁴ ئەڕا ئیه که هویچ نەخسێگ وەناو خوەم نیوینم، وەلێ ئیه مه بێ گونا نیەکێ. بەڵکەم خوداوەنده که له باوەت من داوەری کێ.

⁵ جا له باوەت هویچ چشتێگ وەرجه هاتن خوداوەند داوەری مەکەن. خوداوەندێگ که چشتیلی که ئێرنگه وەناو تیەریکی شاریاسەو، وەناو ڕوشنایی ئاشکرا کێ و نیەتیل دڵ ئاشکرا کێ. ئەوسا هەرکەس له لاێ خوداوه هان دریەد و تاریف کریەید.

⁶ ئێ برایل، گشت ئی نمونەیله ئەڕا خوەم و ئاپولوس وه کار بردم تا وه نەفدان بود، تا له ئیمه یاێ بگرن که له ئەو چشته که نویسریاس، نەچینه ئەولاتر. تا هویچکامدان خوەێ له کەسێگ بانتر وه حساو نارێ و سوکایەتی وه کەسێگ تر بکێ.

⁷ ئەڕا ئیه که کی توێ سەرتر درس کردێه؟ چه ديری که نەوەخشریاسه پێد؟ جا ئەگەر بەخشریاسە پێد، ئەڕا ئەوجورە شانازی کەی که چماێ نەگردیدەسێ؟

⁸ ئێرنگه ئیوه وه هەر چی تواسینه، ڕەسینه! ئێرنگه دەوڵەمەنەو بینه! بی ئیمه بینەسه پادشا! خوەزگه وە ڕاسی پادشایی بکردیاين تا ئیمه وەناو ئی پادشاییه وەگەرددان بەشدارەو بویایمن!

⁹ ئەڕا ئیه که من فکر کەم که خودا ئیمه ڕەسولەیل هەر جور گیرودەیل ماکوم وه مەرگ ڕز کیشاسه دویای ئەوانه که ڕژه چن و ناسەمانه ئەڕا نیشان داین. ئەڕا ئیه که گشت جهان، چ ئایەمیل و چ فریشتەیل تماشاکەرمانن.

¹⁰ ئیمه وەبونەێ مەسیح نەزانیم، وەلێ ئیوه وەناو مەسیح زانیارین! ئیمه بێهازیم، وەلێ ئیوه هێزدارین! ئیمه سوکیمن، وەلێ ئیوه وه حرمەتین!

¹¹ تا ئی ساته ورسی و تیەنیمن و دڵنگیلمان کویەنەس. کوتەڵ کو کریاێ و دەروەدەریم.

¹² زامەت کیشیمن و وه دەس خوەمان کار کەیمن. وەختێ نووڕمان بکەن، داواێ بەەرکەت کیم؛ جا وەختێ ئەزیەتمان بکەن، تاموڵ کيمن؛

¹³ وەختێ خراو دەنه پێمان، وه مێرەبانیەو جواو دیمن. هەر تا ئیسه، بیمنەسه جور سلپ جهان و گناڵخەێ گشت چشتێگ.

¹⁴ ئیانه نیەنویسم تا که شەرمزاردان بکەم، بەڵکەم تا جور ڕوڵەیل عەزیزم ئاموژیاریدان بکەم.

¹⁵ چوینکه تەنانەت ئەگەر وەناو مەسیح بی ئەنازه ماموستا بیاشتوین، وەلێ باوگیل فرەێگ نێرین، ئەڕا ئیەک من له ڕێ ئینجیل وەناو مەسیح عیسا بیمەسه باوگدان.

¹⁶ جا لاڵکمه پێدان له من نمونه بگرن.

¹⁷ هەر وه ئی مدوه تیموتاوس کل کردمه ئەڕا لادان، ئەوه که ڕوڵەێ عەزیزم و وەناو خوداوەند وەفاداره. ئەوه ڕێ رەوشت زنەیی مه وەناو عیسا مەسیح وەپێدان نیشان دێ، هەر ئەوجورە که وەناو گشت کلیسایل وه هەر کوره تالیم دەم.

¹⁸ بڕێگ لویتبەرزەو بوینه، وه ئی گومانه که مه دی نیەتیمه ئەڕا لادان.

¹⁹ وەلێ ئەگەر خودا بتواێ وه ئی زویه تیەمه ئەڕا لادان و نه تەنیا قسیەیل ئی لویتبەرزیله بەڵکەم وه هێزێانیش پێ بەم.

²⁰ چوینکه پادشایی خودا وه قسیه نیه، بەڵکەم وه هێزه.

²¹ کامێان پەسەندانه؟ وه کوتەک بامه ئەڕا لادان یا وه مابەت و روحێگ دڵنەرم؟