یەکم قورنتییل 2 - کتاب مقدس به زبان کردی جنوبی - گویش کلهوری

بانگەوازی وه سەلیب کیشریان مەسیح

¹ منیش ئێ برایل، وەختێ که هاتمه ئەڕا لادان، وەگەرد قسیەیل گەورا گەورا و زانیاری ئنسانی ناتم تا راز خودا وەپێدان جار بێەم.

² چوینکه پشت ئەڕاێ بەساویم وەناودان چشتێگ نەزانم بێجگه عیسا مەسیح ئەویش وه سەلیب کیشریاێ.

³ من وه بی‎هازی و زاورچین و لەرز فرەێگ لەلادانەو دامەێ سەر،

⁴ جا وتار و پێخامم وەگەرد کەلیمەیل قانێکەر زانیارانەێ جهان نەوەتم، بەڵکەم وەگەرد مدویل روح خودا و هێز خودا وەتمەێ،

⁵ تا ئیماندان نه وه مل زانیاری ئنسانی، بەڵکەم وه مل هێز خودا بود.

زانیاری له روحه

⁶ وه ئی حاڵەو، ئیمه ەوناو بازڵەێل، زانیاری جار دیمن، هەرچەن ئی زانیاریه هن ئی دەورانه یا فەرمانرەوایەێل ئی دەورانه نیه که ماکوم وه نابودین.

⁷ بەڵکەم باس زانیاری خودا کەیمن که وەناو رازێگ شاریایەو و خودایش ئەوه له ئەزەڵ، ئەڕا جەڵاڵ ئیمه دیاری کردێه.

⁸ هویچکام له فەرمانرەوایەێل ئی دەورانه ئی زانیاریه نەفامین، چوینکه ئەگەر ئەوه بفامیان، خوداوەند جەڵاڵ نیەکیشیانی سەلیب.

⁹ ئەوجورە که وەناو کتاو ئەشعەیاێ پەێخەمەر نویسریاس: «ئەو چشته که هویچ چەوێگ نێەسێ، هویچ گوشێگ نەشنەفتیەسێ و وه فکر هویچ ئایەمێگ نەرەسیه، خودا ئەڕا ئەوانه که دوسی دێرن گورجەو کردێه.»

¹⁰ ئی چشتیله خودا له ڕێ روح خوەێ ئەڕامان ئاشکراوه کردێه، ئەڕا ئیەک روح خودا گشت چشتێگ، تەنانەت قویلترین راز خودایش دەێدەیەکا.

¹¹ چوینکه کیه که له فکریل ئایەم ئاگادار بود، مەر روح ئەو کەسه که ها ناوێ؟ هەر ئیجوره هویچکەس بێجگه روح خودا فکریل خودا نیەتویەنی بزانێ.

¹² ئێرنگه ئیمه روح جهان نەگردیمنەسەوەر، بەڵکەم روحێگ که له لاێ خوداس، گردیمنەسەوەر تا ئەو چشتیلی که خودا وه دەسدڵوازی داسه پێمان، بزانیم.

¹³ جا ئیمه له ئیه قسیه کیم، ئەویشه نه وەگەرد کەلیمەیلێگ که وه وەسلەێ زانیاری ئنسانیه، بەڵکەم وەگەرد کەلیمەیلێگ که روح خودا تالیم دەێ؛ جا ویجوره حەقیقەتیل روحانی وەگەرد کەلیمەیل روحانی ئویشیمن.

¹⁴ ئایەم نەفسانی چشتیل روح خودا وەرنیەگرێ، چوینکه ئەڕا ئەوه گیلگەوجیه و نیەتویەنی بفامیدەێ، چوینکه زانستن خاس‎خراوی ئیجور چشتیلی هەوەجی وه دەرک روحانی دێرێ.

¹⁵ وەلێ ئایەم روحانی له باوەت گشت چشتێگ داوەری کێ، وەلێ هویچکەس تویەنایی داوەری له باوەت ئەوه نێرید.

¹⁶ «ئەڕا ئیه که کیه که فکر خوداوەند بزانێ تا مەشویرەت بیده پێ؟» وەلێ ئیمه فکر مەسیح دێریم.