یەکم قورنتییل 15 - کتاب مقدس به زبان کردی جنوبی - گویش کلهوری

زنیەو بوین مەسیح

¹ ئێرنگه ئێ برایلم، توام ئەو ئینجیله که وەپێدان بانگەوازی کردم و قەبوڵێ کردین، بارمه هویردان که وەناوێ هاینه سەر پا و

² له ڕێ ئەوه نجات پەێا کین، ئەگەر وه ئەو کەڵامه که ئەڕادان بانگەوازی کردم چنگ بێین. مەر ئیه که، وه هویچ پەتی ئیمان هاوردوین.

³ چوینکه ئەو چشته که گرنگترینه، جار دامەسه پێدان: ئیه که مەسیح وه پێ نویسریایل موقەدەس ئەڕا گونایل ئیمه مرد و

⁴ ئیه که دەفن کریا و ئیه که وه پێ هەر ئی نویسریایله له ڕوژ سێیەم له مردگیل زنیەو بی و

⁵ ئیه که خوەێ وه کیفا و وەشونێ وه ئەو دوانزه نەفەره ئاشکراوه کرد.

⁶ جا وەشون ئەوه، یەێ جار وه فرەتر له پانسەد نەفەر له برایل ئاشکراوه بی که قێر فرەێگ لەليان هێمراێ زنین، هەر چەن بڕێگیان مردنه.

⁷ ئمجا وه یاقوب ئاشکراوه بی و لەشونی وه گشت ڕەسولەیل،

⁸ دەس ئاخر وه منیش ئاشکراوه بی، جور مناڵه کوڕپەێگ نەوەواێه.

⁹ چوینکه من وەناو ڕەسولەیل له گشتێان کەمترم و شایسەێ ئەوه نیم وه ڕەسول ناوم بوەن، ئەڕا ئیه که وه کلیساێ خودا ستەم کردیام.

¹⁰ وەلێ وه فیز خودا من ئەوەمه که هەم، هەر ئیجوره فیز ئەیو ئەڕا من بێ سود نوی. وه چەواشەوه، من له گشت ئەوانه فرەتر کار کردم، هەر چەن وەڕاسی خوەم نویم، بەڵکەم ئەو فیز خودا بی که ها گەردما.

¹¹ وە هەر حاڵێگەو، چ من چ ئەوانه، هەر ئی پێخامه بانگەوازی کەیمن و ئیوەیش وەپێ ئیمان هاوردین.

زنیەو بوین مردگیل

¹² ئێرنگه ئەگەر بانگەوازی بود که مەسیح له مردگیل زنیەو بی، ئێ چوینه که بڕێگ لەلێدان ئویشن مردگیل زنیەو نیەون؟

¹³ وەلێ ئەگەر مردگیل زنیەو نیەون، جا مەسیحیش زنیەو نویه.

¹⁴ جا ئەگەر مەسیح زنیەو نویه، هەم بانگەوازی ئیمه پویچه، هەم ئیمان ئیوه.

¹⁵ بێجگه ئیه، ئەڕا خودا شاێەتیل دروەکانی وەحساو تێیمن، چوینکه له باوەت خودا شاێەتی دایمنه که مەسیح له مردگیل زنیەو کرد، ئێرنگه ئەگەر زنیەو بوین له مردگیل نیه، جا خودا ئەیو زنیەو نەکردیه.

¹⁶ چوینکه ئەگەر مردگیل زنیەو نیەون، جا مەسیحیش زنیەو نویه.

¹⁷ جا ئەگەر مەسیح زنیەو نویه، ئیماندان پویچه و ئیوه هێمراێ هاینه ناو گونایلدان.

¹⁸ بەڵکەم ئەو ئیمانداریل وه مەسیحه که مردنه، له دەس چینه.

¹⁹ ئەگەر تەنیا هەر وەناو ئی ژیانه وه مەسیح ئمید دێریم، ئەوسا ئیمه له گشت ئایەمیل بەێ بەختتریم.

²⁰ وەلێ مەسیح وه ڕاسی له مردگیل زنیەو بیه و نەوبەر کەسیلێگه که له ناو مردگیل زنیەو کریاس.

²¹ چوینکه هەر ئەوجورە که مەرگ وه پێ یە ئنسان هات، زنیەو بوین مردگیلیش وه پێ یە ئنسان دیار دا.

²² چوینکه هەر ئەوجورە که وەناو ئایەم گشتیەکی مرن، وەناو مەسیحیش گشتیەکی زنیەو بون.

²³ وەلێ هەر کەس وه نوەی خوەێ: یەکم جار مەسیح که نەوبەر بی؛ وەشونێ، له وەخت هاتنێ، ئەوانه که هن مەسیحن.

²⁴ ئمجا ئاخر زەمان رەسێد، وەختێ که مەسیح وەشون له بین بردن هەر فەرمانرەوایی و دەسڵات و هێز، پادشایی سپارێده دەس خوداێ باوگ.

²⁵ چوینکه ئەیو باێه پادشایی بکێ تا وەختێ که گشت دشمەنیلێ بخێده ژێر پاێ خوەێ.

²⁶ دشمەن ئاخر که له بین چود، مەرگه.

²⁷ چوینکه خودا «گشت چشتێگ ناسه ژێر پایلێ.» وەلێ وەختێگ ئویشریێ ’گشت چشتێگ‘ نریاسه ژێر پایلێ، دیاره که ئیه خود خودا نیەگریدەوەر که گشت چشتێگ ناسه ژێر پایل مەسیح.

²⁸ وەختێ که گشت چشتێگ چیه ژێر فەرمانێ، کوڕەگەیش خوەێ چوده ژێر فەرمان ئەو کەسه که گشت چشتێگ ناسه ژێر پایلێ، تا خودا بوده گشت چشتێگ وەناو گشت چشتێگ.

²⁹ ئەگەر مردگیل زنیەو نیەون، ئەڕا چه بڕێگ وه جیاێ مردگیل خوسڵ تەعمید گرن؟ ئەگەر مردگیل زنیەو نیەون، ئێ ئەڕا وه جێ ئەوانه تەعمید گرن؟

³⁰ ئەڕا چه ئیمه هەر سات گیان خوەمان خیمنه خەتەر؟

³¹ ئێ برایل، قەسەم وه ئەو شانازیه که وەناو خوداوەندمان عیسا مەسیح له باوەت ئیوه دێرم، هەر چی ڕوژه مەرگ قویرتم دەێ.

³² ئەگەر وەگەرد گیانەوەریل دڕنه وەناو ئەفسوس تەنیا وەبونەێ مدویل ئنسانی جەنگیم، چ سودێگ داسه دەسمەو؟ ئەگەر زنیەو بوین له مردگیل نیه، «بان تا بخوەیمن و بنوشیم چوینکه سو مریمن.»

³³ فریو مەخوەن: «دوس گەن، ڕێ رەوشت خاس گەننێد.»

³⁴ بانه سەر خوەدان و دیتر گونا مەکەن؛ چوینکه بڕێگ هەن که خودا نیەناسن. ئیه ئەڕا شەرمزاریدان ئویشم.

زنیەو بوین جەسه

³⁵ وەلێ هاتێ یەکیگ بپرسێ: «مردگیل چوی زنیەو بون و وەگەرد چ جور جەسەێگ تیەن؟»

³⁶ ئێ گیلگەوج! ئەو چشته که کالیەد، زنیە‎و نیود تا نەمری.

³⁷ ئەو چشته که کالیەد، ئەو جەسه نیه که وەشونێ کەفێده دەیشت، بەڵکەم تەنیا دەنگێگه، هاتێ گەنم بود هاتێ دەنگیل تر.

³⁸ وەلێ خودا جەسەێگ دەێده پێ که خوەێ دیاری کردێه، جا وه هەر جور دەنگێگ جەسەێ ئەڕا خوەێ دەێده پێ.

³⁹ گشت جەسەیل جور یەک نین. ئایەمیل یە جور جەسه دێرن، گیانەوەریل یەێ جورتر و باڵەندەیل یەێ جورتر؛ ماسیێلیش یە جورتر جەسه دێرن.

⁴⁰ هەر ویجوره، جەسەیل ئاسمانی و جەسەیل زەویی هەس. وەلێ جەڵاڵ جەسەیل ئاسمانی له یە جورن و جەڵاڵ جەسەیل زەوی یەێ جورتر.

⁴¹ خوەر جەڵاڵ خوەێ دێرێ، مانگ جەڵاڵ خوەێ و هەسارەیلیش جەڵاڵ خوێان؛ جەڵاڵ هەر هەسارەێگیش وەگەرد جەڵاڵ هەسارەێگ تر جیاوازیان هەس.

⁴² زنیەو بوین مردگیلیش ئیجورەسه. هەرچێ کالیەد، له بین چود؛ ئەو چشته که زنیەو بود، نەمره.

⁴³ وەناو زەلیلی کالیەد، وەناو جەڵاڵ زنیەو بود. وەناو بی هازی کالیەد، وەناو هێز زنیەو بود.

⁴⁴ یەێ جەسەێ سریشتی کالیەد، جەسەێ روحانی زنیەو بود. ئەگەر جەسەێ سریشتی هەس، جەسەێ روحانییش هەس.

⁴⁵ ئەوجورە که وەناو تەورات نویسریاس: «ئنسان یەکم، یانێ ئایەم، بیه گیانێگ زنی»؛ ئایەم ئاخر، بیه روحێگ زنەیی دەر.

⁴⁶ وەلێ یەکم جار روحانیەگه نات بەڵکەم سریشتیەگه هات، جا وەشون ئەوه روحانیەگه هات.

⁴⁷ ئنسان یەکم له خوڵ زەویه؛ ئنسان دویم له ئاسمانه.

⁴⁸ ئەوانه که له خوڵن، وێنەێ ئەو کەسنه که له خوڵ هاتوی؛ جا ئاسمانیێلیش وێنەێ ئەو کەسنه که له ئاسمانەو هاتوی.

⁴⁹ جا هەر ئەوجورە که وێنەێ ئنسانێگ که له خوڵ بود وه خوەمان گردیم، وێنەێ ئنسان ئاسمانییش وه خوەمان گریمن.

⁵⁰ ئێ برایل، ئیه وەپێدان ئویشم: که جەسه و خوین نیەتویەنی بوده میراتیخوەر پادشاێ خودا، جا ئەو چشته که مرێ، نیەتویەنی بوده میراتیخوەر ئەو چشته که نەمره.

⁵¹ گوش بگرن تا رازێگ ئەڕادان بویشم: ئیمه گشتمان نیەمریمن، بەڵکەم گشتمان گوڕێیمن.

⁵² زویزی و وه چرپەێ چەوێگ، ئەو وەخته که پف کریەده ئاخرین شەیپورەگه، ئیه هەڵکەفێ. چوینکه شەیپورەگه تێدە دەنگ و مردگیل هەر ئەوجورە که نەگەنیانه زنیەو بون و ئیمه گوڕێیمن.

⁵³ چوینکه ئی جەسه که له بین چود باێه جەسەێ که له بین نیەچود بکێده وەر و ئی جەسه که مرێ باێه جەسەێگ بکێده وەرێ که نەمره.

⁵⁴ وەختێ ئیه که له بین چود، له بین نەچین کرده وەر و ئی جەسەێ که مرێ، نەمری کرده وەر، ئمجا ئەو کەڵام نویسریایه تێیده دی که ئویشێ: «سەرکەفتن، مەرگ وه تەمامی قویرت داس.»

⁵⁵ «ئێ مەرگ، سەرکەفتنەگەد ها کو؟ جا ئێ مەرگ، چزەگەد ها کو؟»

⁵⁶ چز مەرگ گوناس و هێز گونایش، شەریعەته.

⁵⁷ وەلێ سپاس ئەڕا خودا که له ڕێ خوداوەندمان عیسا مەسیح سەرکەفتن بەخشیەسه پێمان.

⁵⁸ جا، برایل عەزیزم، قورس و بەردەوام بون، هەمویشه وه قوڕن دڵ خەریک کار خوداوەند بون، چوینکه زانين زامەتەگەدان وەناو خوداوەند هویچ پەتی نیه.