یەکم قورنتییل 14 - کتاب مقدس به زبان کردی جنوبی - گویش کلهوری

خەڵاتی نەبوەت کردن و زوانیل تر

¹ بکەفنه شون ڕێ مابەت و وه تاسەێ تەمام وەشون خەڵاتییل روحانی بوین، وه تایبەتی ئیەک نەبوەت بکێن.

² ئەڕا ئیه که ئەوه که وه زوانێگتر قسیه کێ، نه وەگەرد ئایەمیل بەڵکەم وەگەرد خودا قسیه کێ. ئەڕا ئیه که هویچکەس قسیەێ حالی نیود؛ وەلێ ئەوه له ڕێ روح رازیل ئویشێ.

³ وەلێ ئەوه که نەبوەت کێ وەگەرد مەردما قسیه کێ، تا وەناو ئیمان بنیادێان بنی، هانیان بێی و دڵنەواییان بێی.

⁴ ئەوه که وه زوانێگتر قسیه کێ ئیمان خوەێ بنیاد نی، وەلێ ئەوه که نەبوەت کێ بایس بنیاد ناین ئیمان کلیسا بود.

⁵ ئاوەختیم ئیەسه که گشتدان وه زوانیلتر قسیه بکێن، وەلێ فرەتر توام که نەبوەت بکێن. ئەوه که نەبوەت کێ، گەوراتر له ئەوەسه که وه زوانیلتر قسیه کێ، مەر ئیه که زوانەگه هەڵوگەردنێ تا بایس بنیاد ناین ئیمان کلیسا بود.

⁶ ئێرنگه ئێ برایل، ئەگەر بامه ئەڕا لادان و وه زوانیلتر قسیه بکەم، چ سودێگ ئەڕادان دێرم، مەر ئیه که وەحی یا ماریفەت یا نەبوەت یا تالیمێگ ئەڕادان بیاشتویم؟

⁷ ئەگەر تەنانەت سازیل بێ گیان، جور شمشاڵ و چەنگ ئەگەر خاس نەژەنیەن، چوی بو بزانێ چ بەیتێگ ژەنیێد؟

⁸ ئەگەر شەیپور دەنگ نەپوریگ بێید، کی ئەڕا شەڕ خوەێ گورجەو کێ؟

⁹ له باوەت ئیوەیش ئیجورەسه. ئەگەر وه زوان خوەدان کەلیمەیلێ بویشین که کەس نەفامیدێ، ئەگەر کەسێ له ئەوره بود چوی بو بزانێ که چه ئویشین؟ ئەو وەخته، مینێده ئیه که وەگەرد هەوا قسیه بکێن.

¹⁰ بێ گومان وەناو جهان زوانیل جورواجورێگ هەس، وەلێ هویچکام بی مانا نیه.

¹¹ جا ئەگەر نەتویەنم ماناێ زوان یەکیگتر بفامم، ئەڕا ئەوه بێگانەم و ئەویش ئەڕا مه.

¹² له باوەت ئیوەیش ئیجورەسه. له ئەوره که تاسەبار خەڵاتییل روح خوداین، تەقالا بکەن که وەناو بنیاد ناین کلیسا بکەفیه نوا.

¹³ وه ئی بونه، ئەوه که وه زوانێگتر قسیه کێ باێه دوعا بکێ تا قسیەگانی هەڵوگەردنێ.

¹⁴ چوینکه ئەگەر من وه زوانێگتر دوعا بکەم، روحم دوعا کێ، وەلێ عەقڵم سودێگ نیەوێ.

¹⁵ جا چه باێه بکەم؟ وه روح دوعا کەم و وه عەقڵیش دوعا کەم؛ وه روح بەیت خوەنم جا وه عەقڵیش خوەنم.

¹⁶ بێجگه ئیه، ئەگەر توی وەناو روح خەریک سپاس خودا بوید، چوی کەسێگ که زواند نیەفامێ وه سپاسەگەد ئامین بویشی؟ ئەڕا ئیه که نیەزانێ چه ئویشێ!

¹⁷ چوینکه هاتێ سپاسگوزاریەگەد خاس بود، وەلێ بایس بنیاد ناین یەکیگتر نیود.

¹⁸ سپاس خودا کەم که فرەتر له گشتدان وه زوانێگتر قسیه کەم؛

¹⁹ وەلێ وەناو کلیسا زانم خاسه پەنج کەلیمه وه عەقڵ خوەم ئەڕا تالیم مەردم قسیه بکەم، تا ئیه که هەزاران کەلیمه وه زوانێگ‎تر بویشم.

²⁰ ئێ برایل، وەناو دەرک و فام مناڵ نەون، بەڵکەم وەناو خراوی کردن مناڵ بوین. وه چەواشەوه، وەناو دەرک و فام بازڵه بوین.

²¹ وەناو تەورات نویسریاس: «خوداوەند فەرمایش کێ، ”وه زوانیل بێگانه و وه لێویل بیگانەێل وەگەرد ئی قەومه قسیه کەم. وه ئی هەمگه گوشە لێم نیەتەکنن.“»

²² جا زوانیلتر، نیشانەیگه نه له باوەت ئیمانداریل بەڵکەم له باوەت بی ئیمانیل؛ وەلێ نەبوەت نیشانەێگ ئەڕا ئیمانداریله نه ئەڕا بی ئیمانیل.

²³ جا، ئەگەر گشت کلیسا گردەو بون و گشتیەکی وه زوانیلتر قسیه بکەن، وه ئی وەخته کەسیلێگ که وه ئی چشتیله خەوەر نێرن یا بی ئیمانن بانه ناو جەم، ئێ نیویشن که ئیوه شێت بینه؟

²⁴ وەلێ ئەگەر کەس بی ئیمانێگ یا کەسێگ که له ئی چشتیله خەوەر نێری وەختێ که گشتیەکی دێرن نەبوەت کەن بچوده ناو جەمەگەیان، وه هەر کەلیمه که شنەفێ قانێ بود که گوناکاره و هەر کەلیمه دێرێ داوەری بود،

²⁵ رازیل دڵی ئاشکراوه بود. ئمجا ڕوی نێده بان زەوی، پەرەسش خودا کێ و جار دەێ که: «وه ڕاسی خودا ها ناو ئیوه.»

²⁶ جا ئێ برایل مەبەست چەس؟ وەختێ که وه دەور یەکەو گردە‎و بوین، هەر کەس بەیتێگ، تالیمێگ، وەحیێگ، قسیه کردن وه زوانێگتر یا هەڵوگەرداننێ دێرێ. ئیانه گشتێ باێه ئەڕا بنیاد ناین کلیسا وه کار بچود.

²⁷ ئەگەر کەسێگ وه زوانێگتر قسیه بکێ، دو یا ئاخرەگەێ سێ نەفەر بود، ئەویش وه نەوه قسیه بکەن و کەسێگیش هەڵیەوگەردنێ.

²⁸ وەلێ ئەگەر کەسێگ نود تا هەڵیەوگەردنێ، هەر کامێان باێه وەناو کلیسا بیدەنگ بمینن وەناو دڵیانەو وەگەرد خودا قسیه بکەن.

²⁹ جا له نەبوەتکەریل، دو یا سێ نەفەر نەبوەت بکەن و ئەو باقی وردەو بونه قسیەگانیان.

³⁰ جا ئەگەر یەکیگتر که وه ئەوره نيشتیه وەحیێگ بگرێد، با یەکمینەگه بیدەنگ بمینێد.

³¹ چوینکه گشتدان تویەنين وه نەوه نەبوەت بکێن تا گشت تالیم بگرن و هان بێریەن.

³² روح نەبوەتکەریل گوشه نەبوەتکەریل تەکنن.

³³ چوینکه خودا، نه خوداێ شل شێویایی، بەڵکەم خوداێ ئاشتی و سڵامەتیه، هەر جوره که له ناو گشت کلیسایل ئیمانداریل وه مەسیح، ئیجورەسه.

³⁴ ژنيلیش باێه وەناو کلیسا بیدەنگ بمینن. چوینکه ئەوانه نەبایه قسیه بکەن، بەڵکەم هەر ئەوجورە که شەریعەت ئویشێ، باێه وه ژێر فەرمان بون.

³⁵ ئەگەر چشتێگ هەس که بتوان یاێ بگرن، وەناو ماڵ له شویەگەێان بپرسن؛ چوینکه قسیەکردن ژن وەناو کلیسا شایسه نیه.

³⁶ ئێ کەڵام خودا له ئیوه سەرچەم گردێه یا تەنیا وه ئیوه ڕەسیه؟

³⁷ ئەگەر کەسێگ خوەێ وه نەبوەتکەر یا ئایەم روحانیگ زانێ، قەبوڵ بکێ که ئەو چشته که ئەڕا ئیوه نویسم فەرمانێگه که لەلاێ خوداوەند هاتێه.

³⁸ ئەگەر کەسێگ ئیه قەبوڵ نەکێ، خویشێ قەبوڵ نیەکرێی.

³⁹ جا ئێ برایلم، وه تاسەێ تەمامە‎و وەشون نەبوەت کردن بون و نوای قسیه کردن وه زوانیلتر مەگرن.

⁴⁰ وەلێ با گشت چشتێ وه خاسێ و ڕێکوپێکی بکرێید.