یەکم قورنتییل 13 - کتاب مقدس به زبان کردی جنوبی - گویش کلهوری

گرنگ بوین ڕێ مابەت

¹ ئەگەر وه زوانیل ئایەمیل و فریشتەیل قسیه بکەم، وەلێ مابەت نیاشتوم، دێوڵ ناوڕاس چوڵ و سەنجێگ پڕ قرموقاڵم.

² ئەگەر هێز نەبوەت بیاشتوم و گشت رازیل خودا و ماریفەت بزانم و ئەوجورە ئیمان تەمامێگ بیاشتوم که بتویەنم کویەیل جاوەجا بکەم، وەلێ مابەت نیاشتویم، هویچ نیم.

³ ئەگەر گشت دارایی خوەم سەدەقه بێەم و ئەگەر جەسەم بیەمه دەسەو تا لەناو ئاگر بسزننێ، وەلێ مابەت نیاشتوم، هویچ سودێگ ئەڕام نێرید.

⁴ مابەت سەور دێرێ و مێرەبانه؛ مابەت حەسویی نیەکێ و وه خوەێ شانازی نیەکێ، مابەت لوەیتبەرز نیه،

⁵ مابەت بی ئەدەو نیه، مابەت وەشون نەف خوەێ نیه، مابەت وه ئی ئاسانیه توڕه نیود و قینه دڵ نیەگرێ؛

⁶ مابەت له خراوی خوەشاڵ نیود، وەلێ له ڕاسی دڵشاد بود.

⁷ مابەت وەگەرد گشت چشتێگ کەفێه یەک، مابەت گشت چشتێگ باوەڕ کێ، مابەت هەمویشه ئمید دێرێ، مابەت وەناو گشت چشتێگ تاموڵ دێرێ.

⁸ مابەت هەراێهەر بنێ نیەتێی. له باوەت نەبوەتیل، ئەوانه له بین چن و زوانیل بنێان تێد و ماریفەت له بین چود.

⁹ چوینکه ماریفەتمان یەێ قرتکه و نەبوەتمانیش یەێ قرتک؛

¹⁰ وەلێ وەختێ کامڵەگه باێ، قرتکەگه له بین چود.

¹¹ ئەوسا که مناڵ بیم، قسیەیل مناڵانه کردیام و مناڵانه فکر کردیام هەر ئیجوره مناڵانه شاێەتی هاوردیام. وەلێ وەختێ بیمه پیا، وازه کاریل مناڵانه هاوردم.

¹² ئەو چشته که ئێرنگه دوینیم هەر جور وێنەێ نادیاریگه وەناو جامەک؛ وەلێ دەورانێ رەسد که ڕوی وه ڕوی دوینیمن. ئێرنگه قرتکیگ زانم؛ وەلێ دەورانێ رەسێ که وه تەمامی زانم، جوری که وه تەمامیش ناسیامه.

¹³ جا ئێرنگه، ئی سێ چشته مینێدەو: ئیمان، ئمید و مابەت. وەلێ گەوراترەگەێان مابەته.