یەکم قورنتییل 11 - کتاب مقدس به زبان کردی جنوبی - گویش کلهوری

¹ له منا نمونه بگرن، هەر ئەوجورە که مه له مەسیح نمونه گرم.

سەر پوشانن

² ئێرنگه تاریفه لێدان کەم ئەڕا ئیه که وەناو گشت چشتێگ مه تیەرێنه هویر و نەریتیل، هەر ئەوجورە که وەپێدان سپاردم، پارێزنێن.

³ وەلێ توام بزانین که سەر هەر پیاێگ مەسیحه، سەر ژن شویەگەێه و سەر مەسیح خوداس.

⁴ هەر پیاێگ که وه سەر داپوشریاێ دوعا یا نەبوەت بکێ، سەر خوەێ بی حرمەتەو کێ،

⁵ وەلێ هەر ژنی که وه سەر دانەپوشریای دوعا یا نەبوەت بکێ، سەر خوەێ بی حرمەتەو کردێه؛ ئەڕا ئیه که مینێده ئەوه که گیس خوەێ بوڕێید.

⁶ ئەڕا ئیه که ئەگەر ژنێگ سەر خوەێ دانیەپوشنێ، باێه قژ خوەێ کوڵەو بکێ؛ وەلێ له ئەوره که ئەڕا ژن شەرمزاریه که قژ خوەێ کوڵەو بکێ یا گیس خوەێ بوڕێید، بیل تا سەر خوەێ داپوشنێ.

⁷ ئەڕا ئیه که پیا نەبایه سەر خوەێ داپوشنێ، چوینکه ئەو وێنه و جەڵاڵ خوداس؛ وەلێ ژن، جەڵاڵ پیاس.

⁸ ئەڕا ئیه که پیا له ژن ناته دی، بەڵکەم ژن له پیا هاته دی.

⁹ جا پیا ئەڕا ژن وه دی ناتیه، بەڵکەم ژن ئەڕا پیا.

¹⁰ وی بونه و وەخاتر فریشتەیل، ژن باێه نیشانەیگ وه سەرێەو بیاشتود تا نیشان بێید که ها ژێر دەسڵات.

¹¹ وەئی حاڵە، وەناو خوداوەند، ژن وه پیا و پیا وه ژن هەوەجی دێرێ.

¹² ئەڕا ئیه که هەر ئەوجورە که ژن له پیا هاته دی، ئێرنگەیش پیا له ژن تێدە دنیا. جا گشت چشتێگ له خودا وه دی تێد.

¹³ خوەدان داوەری بکێن: ئێ ئەڕا ژن شایسەس که وه سەر دانەپوشریای وه دەرگاێ خودا دوعا بکێ؟

¹⁴ ئێ سریشتی خوەێ یاێدان نێی که ئەڕا پیا شەرمزاریه قژی دریژەو بکێ،

¹⁵ وەلێ ئەگەر ژنی قژی دریژەو بکێ ئەڕاێ شانازیه؟ چوینکه قژ دریژ دریاسه ژن تا سەر خوەێ داپوشنێ.

¹⁶ ئەگەر کەسێگ بتواێ له ئی باوەته مرافە بکێ، باێه بویشم که ئیمه و کلیسایل خودا بێجگه ئیه نەریتیگ تر نێریم.

خواردن نان ئێوارەێ خوداوەند

¹⁷ وەلێ وەناو ئی حوکمیله بێ گومان تاریفه لێدان نیەکەم، چوینکه هناێ وه دەور یەکەو گردە‎و بویندان، زیانەگەێ فرەتر له سودەگەێه.

¹⁸ ئەڕا ئیه که یەکم جار، شنەفم که وەختێ جور کلیسا گردە‎و بوین، دو دەسەیی کەفێه ناودان و ئیه تا ئەنازەێگ باوەڕه پێ دێرم.

¹⁹ چوینکه باێه دو دەسەیی وەناودان بود تا ئەوانه که وەناودان ڕاسەکانین بناسریەن.

²⁰ وەختێ وه دەور یەکەو گردە‎و بوین، ئەڕا خواردن نان ئێوارەێ خوداوەند نیه.

²¹ چوینکه وەخت نان خواردن، هەر کامدان بی ئەوه که چەوەڕێ کەسێگ تر بود، نان ئێوارەێ خوەێ، وه لەونی که یەکیگ ورسی مینێد، وەحالێگەو یەکیگتر مڕ و سەرخوەش بود.

²² ئێ ماڵێگ ئەڕا خواردن و نوشاین نێرین؟ یا ئیه که کلیساێ خودا وه سوک حساو کین و ئایەمیل دەستەنگ شەرمزارەو کین؟ چه وەپێدان بویشم؟ ئێ له ئی باوەته تاریفه لێدان بکەم؟ هەڕاێهەر تاریفه لێدان نیەکەم.

²³ چوینکه ئەو چشته که سپاردمه پێدان له خوداوەند گردمه، که عیسا خوداوەند وه شەوێگ که دانەێ دەس دشمەن، نانەگه هەڵگرد و

²⁴ وەختێ سپاس خودا کرد، لەتی کرد و فەرمایش کرد: «ئیەسه جەسەێ من ئەڕا ئیوه. ئیه وه یاد من وه جێ بارن.»

²⁵ هەر ویجوره، وەشون نان ئێواره، جامەگه هەڵگرد و فەرمایش کرد: «ئی جامه، پەێمان تازەس که وەگەرد خوین مه رەسمیەو بود. هەر جار که له لێ خوین، وه یاد مه ئیجوره بکەن.»

²⁶ ئەڕا ئیه که هەر وەخت ئی نانه بخوەین و ئی جامه بنوشین، مردن خوداوەند جار دین تا وەختێگ که باێدەو.

²⁷ جا هەر کەس وه شێوەێ ناشایسه نانەگه بخوێ و له جام خوداوەند عیسا بنوشێ، وه جەسه و خوین خوداوەند تاوانبار بود.

²⁸ با هەر کەس وەرجه ئەوه که له نانەگه بخوێ و له جامەگه بنوشێ، خوەێ ئەزمون بکێ.

²⁹ چوینکه هەر کەس بی ئەوه که ماناێ جەسەێ خوداوەند بزانێ، بخوێ و بنوشێ وه خوەێ ماکومیەت تیەرێ.

³⁰ وه ئی باوەتەسه که قێر فرەێگ لەلێدان بی هاز و نەخوەشن و قێرێگیش مردنه.

³¹ وەلێ ئەگەر وه خوەمان داوەری بکردیایم، وه ئیمه حوکم نویاتیاد.

³² وەلێ وەختێ که خوداوەند داوەریمان کێ، ئەدەو بویمن تا وەگەرد ئی جهانه ماکوم نویمن.

³³ جا ئێ برایلم، وەختێ ئەڕا خواردن وه دەور یەکا گردە‎و بوین، چەوەڕێ یەکترەکی بون.

³⁴ ئەگەر کەسێگ ورسێه، له ناو ماڵ خوەێ نان بوخوێ نەخواێ گردەو بویندان وه ماکومیەت برەسد. له باوەت چشتیل‎تر وەختێگ هاتمه ئەڕا لادان، وەپێدان ئویشم که باێه چه بکێن.