یەکم قورنتییل 10 - کتاب مقدس به زبان کردی جنوبی - گویش کلهوری

ئاگادار کردن له باوەت بتپەرەسی

¹ ئێ برایل، نیەتوام بی خەوەر بوین که باپیریلمان گشتێان وه ژێر هەور بین و گشتێان له ناو دەریا ڕەد بین و

² گشتێان وەناو ئەو هەور و دەریا خوسڵ تەعمید گردن و ویجوره نیشان دان که توان بکەفنه شون موسای پەێخەمەر و

³ گشتێان هەر له ئەو خواردەمەنی روحانی خواردن و

⁴ هەر له ئەو ئاو روحانی نوشان؛ چوینکه له ئەو تاش کەمەر روحانیه نوشیان که وەشونێانەو هاتیاد و ئەو تاش کەمەره مەسیح بی.

⁵ وەئی هەمگه، خودا له قێر فرەێگێان خوەشنود نوی، جا جنازەیلێان وه سەرئانسەر بیاوان تەفرتوینا بی.

⁶ ئێرنگه، ئی چشتیله هەڵکەفت تا بوده نمونەێگ ئەڕا ئیمه، تا ئیمه جور ئەوانه وەشون خراوی نویمن.

⁷ جا بتپەرەس نەون جور بڕێگ له ئەوانه؛ وه لەونی که وەناو کتاو تەورات نویسریاس: «قەوم نیشتنه خواردن و نوشاین و ئەڕا هەڵپەڕگه هەڵسانه سەر پا.»

⁸ ئیمه نەبایه جور بڕێگ لەليان داوانپێسی بکێم، ئەوجورە که وەناو یە ڕوژ بیس و سێ هەزار نەفەر مردن.

⁹ ئیمه نەبایه مەسیح ئەزمون بکێم، هەر ئەوجورە که بڕێگ لەلێان ئی کاره کردن و وه وەسلەێ ماریل کوشریان.

¹⁰ خوتەخوت نەکێم، جوری که بڕێگ لەليان ئیجوره کردن و فریشتەێ مەرگ کوشتێان.

¹¹ ئێرنگه ئی چشتیله جور نمونەێگ هاته سەریان و نویسریا تا بوده عبرەتێگ ئەڕا ئیمه، چوینکه وەناو ڕوژگاریل ئاخر زنەیی کەیمن.

¹² ئمجا ئەوه که گومان کێ ها سەرپاوه، هوشێ بود که نەکەفێ!

¹³ تویش هویچ ئەزمونێگ ناتینه که ئەڕا بەشەر مناسو نود. جا خودا ئەمینە؛ ئەیو نێیلی فرەتر له تویەنایدان ئەزمون بوین، بەڵکەم وەگەرد ئەزمون ڕێ دەر چینیش گورجەو کێ تا تویەناێ تاموڵی بیاشتوین.

¹⁴ جا ئێ عەزیزەیلم، له بتپەرەسی دەر بچن.

¹⁵ وەگەرد زانایل قسیه کەم؛ خوەدان له باوەت ئەو چشته که ئویشم داوەری بکەن.

¹⁶ ئێ جام بەەرکەته که ئەڕاێ سپاس ئویشیمن، هاوبەشی وەناو خوین مەسیح نیه؟ ئێ نانێگ که لەت کيمن، هاوبەشی وەناو جەسەێ مەسیح نیه؟

¹⁷ له ئەوره که نان یەکێگە، گشتمان که فرەیم، یە جەسەیم، چوینکه گشتمان له یە نان خویمن.

¹⁸ بنوڕنه قەوم ئێسرائیل: ئێ ئەوانه که له قوروانیيل خواردیان وەناو قوروانگا بەشدار نویان؟

¹⁹ ئێ مەبەستم چەس؟ ئێ خواردەمەنی که ئەڕا بت پیشکەش بود چشتێگه، یا بت چشتێگه؟

²⁰ نه، مەبەستم ئیەسه ئەو چشته که بتپەرەسیل قوروانی کەن، وه دێویل پیشکەش کەن، نه وه خودا، جا من نیەتوام وەگەرد دێویل بەشدار بوین.

²¹ نیەتویەنین هەم له جام خوداوەند بنوشین هەم له جام دێویل؛ نیەتویەنین هەم له سفرەێ خوداوەند بخوین و هەم له سفرەێ دێویل.

²² ئێ توایم غیرەت خوداوەند هەڵگڕنیم؟ ئێ ئیمه له ئەیو تویەناتریم؟

²³ «گشت چشتێگ ڕەواس» - وەلێ گشت چشتێگ فایده نێری. «گشت چشتێگ ڕەواس» - وەلێ گشت چشتێگ بنیادنەر نیه.

²⁴ هویچکەس خێرخواز خوەێ نود، بەڵکەم باێه خێرخواز مەردم بود.

²⁵ هەر گوشتێگ که وەناو بازار فروشیەد بخوەن، بی ئەوه که له ڕوی وژدان پرسیارێگ بکێن،

²⁶ چوینکه «زەوی و هەر چی که ها ناوێ هن خوداوەنده.»

²⁷ ئەگەر ئایەم بی ئیمانێگ ئەڕا نان خواردن دەنگدان کەێد و ئیوەیش خوەشدان تێ بچین، هەر چێ هیشته نوادان بخوەین بی ئەوه که له ڕوی وژدان پرسیارێگ بکێن،

²⁸ وەلێ ئەگەر کەسێگ وەپێدان وەت: «ئی گوشته پیشکەش بیەسه بتیل.» جا وەبونەێ کەسێگ که خەوەر داسه پێدان و وەبونەێ وژدان، له لێ نەخوەین.

²⁹ هەڵبەت مەبەستم وژدان ئەو ئایەمەسه نه وژدان ئیوه. چوینکه ئەڕا باێه وژدان یەکیگتر حوکم بکێ که ڕزگاری مه چەنێگه؟

³⁰ ئەگەر خواردەمەنێگ وه سپاسەو خوەم، ئەڕا باێه وەبونەێ ئەو چشته که خودا ئەڕاێ سپاس کەم، ماکومم بکەن؟

³¹ جا هەرچێ کین چ خواردن و چ نوشان، یا هەر کارێگ‎تر، گشتێ ئەڕا جەڵاڵ خودا بکێن.

³² هویچکەس مەرەنجنن، چ جویلەکە چ یونانی چ کلیساێ خودا،

³³ هەر ئەوجورە که منیش تەقالا کەم تا گشتیەکی وه هەر لەونێگ که تویەنم خوەشنود بکەم. چوینکه نیمه شون سود خوەم، بەڵکەم هامه شون سود قێر فرەێگ، تا نجات پەێا بکەن.