یەکم قورنتییل 1 - کتاب مقدس به زبان کردی جنوبی - گویش کلهوری

¹ له پولوس، که وه خاست خودا دەنگ کریایه تا بوده ڕەسول مەسیح عیسا، هەر ئیجوره له براگەمان سوستنس،

² وه کلیساێ خودا له شار قورنتوس، که وەناو مەسیح عیسا تەقدیس کریانه و دەنگ کریانه تا بونه قەوم موقەدەس خودا، وەگەرد گشت ئەوانه که وه هەر شون ترێگە‎و ناو خوداوەندمان عیسا مەسیح خوەنن، که خوداوەند ئیمه و خوداوەند ئەوانەسه:

³ فیز و ئاشتی و سڵامەتی له لاێ خودا، باوگ ئیمه و خوداوەند عیسا مەسیح وەگەرددانەو بود.

سپاس خودا

⁴ مه هەمویشه ئەڕا ئیوه سپاس خوداێ خوەم کەم، وەبونەێ فیز خودا که وەناو مەسیح عیسا بەخشریاسە پێدان.

⁵ چوینکه ئیوه وەناو مەسیح له هەر باوەتەو دەوڵەمەن بینه، وەناو هەر لەون وەتن و ماریفەتێگ -

⁶ تەنانەت هەر ئەوجورە که شاێەتی ئیمه لەباوەت مەسیح وەناودان مور کریاس -

⁷ وه لەونی که ئیوه له هویچ خەڵاتیێگ بی نسیو نين، هەر وەئەو حاڵه که چەوەڕێ ئاشکرا بوین خوداوەندمان عیسا مەسیحین.

⁸ ئەیو تا وه ئاخر بەردەوام پارێزنێدەدان، تا وەناو ڕوژ خوداوەندمان عیسا مەسیح بیتاوان بوین.

⁹ وەفاداره خوداێگ که ئیوه ئەڕا دوسی وەگەرد کوڕەگەێ خوەێ، خوداوەندمان عیسا مەسیح، دەنگ کردێه.

دودەسەیی وەناو کلیسا

¹⁰ ئێ برایل، وه ناو خوداوەندمان عیسا مەسیح لاڵکمه پێدان که بکەفینه یەکا و وەناودان دودەسەیی نود، بەڵکەم وەناو فکر و رأی پشت یەک بگرن.

¹¹ چوینکه ئێ برایلم، ئاڵ ماڵ خلوئه خەوەر دانەسه پێم که مرافه ها ناودان.

¹² مەبەستم ئیەسه که یەکیگدان ئویشێ، «من کەفتمەسە شون پولوس»؛ یەکیگتر ئویشێ، «من کەفتمەسە شون ئاپولوس»؛ یەکیگ ئویشێ، «من کەفتمەسە شون کیفا»؛ و یەکیگتر، که «من کەفتمەسە شون مەسیح.»

¹³ ئێ مەسیح بەشبەشەو بیه؟ ئێ پولوس بی که ئەڕادان وه سەلیب کیشریا؟ ئێ وه ناو پولوس خوسڵ تەعمید گردین؟

¹⁴ سپاس خودا کەم که بێجگه کریسپوس و گایوس، هویچکامدان تەعمید نیامه،

¹⁵ تا کەسێگ نەتویەنێ بویشی وه ناو مه تەعمید گردینه.

¹⁶ هەڵبەت خاوخێزان ئستفاناسیش تەعمید دامه؛ وەلێ وه هویرم نیه کەسێگ تر تەعمید داویم.

¹⁷ چوینکه مەسیح مه کل نەکرد تا تەعمید بێەم بەڵکەم تا مزگانی بێەم، وەلێ نه وه قسیەیل زیرەکانه و له ڕوی زانیاری، نەخواێ هێز سەلیب مەسیح پویچەو بود.

پێخام سەلیب و زانیاری جهان

¹⁸ چوینکه پێخام سەلیب ئەڕا ئەوانه که وەرەو نابودی چن گیلگەوجیه، وەلێ ئەڕا ئیمه که هایمنه ڕێ نجات هێز خوداس.

¹⁹ چوینکه وەناو کتاو ئەشعەیاێ پەێخەمەر نویسریاس: «زانیاری زانیاریل له بین بەم و فام فامداریل پویچەو کەم.»

²⁰ وه ڕاسی، زانیار ها کوره؟ ماموستاێ دین ها کوره؟ باسکەر ئی دەوره ها کوره؟ مەر خودا، زانیاری ئی جهانه پویچەو نەکردیه؟

²¹ چوینکه له ئەوره که بەنا وه زانیاری خودا، جهان نەتویەنست وه پێ زانیاری خودا بناسێ، خودا ئەوجورە سەلاح زانست که وەگەرد بانگەوازی گیلگەوجانه، کەسیلێ که ئیمان تیەرن، نجات بێی.

²² چوینکه جویلەکەیل داواێ نیشانه کەن و یونانیەگان هانه شون زانیاری،

²³ وەلێ ئیمه مەسیح وه سەلیب کیشریای بانگەوازی کەیمن که ئەڕا جویلەکەیل کوچگیگه که بوده بایس کەفتنێان و ئەڕا ناجویلەکەیل گیلگەوجیه،

²⁴ وەلێ ئەڕا دەنگ کریایەگان، چ جویلەکە و چ یونانی، مەسیح هێز خودا و زانیاری خوداس.

²⁵ چوینکه گیلگەوجی خودا له زانیاری ئنسان زانیارتره و بی هازی خودا له هێز ئنسان تویەناتره.

ئیمانداریل قورنتوس و زانیاری جهان

²⁶ ئێ برایل، وەزو حاڵ خوەدان ئەو وەخته که خودا دەنگدان کرد، بارنه وەر چەودان. فره له لێدان وەگەرد پەێمانەیل ئنسانی، زانا وه حساو ناتیاین و فره له لێدان له دەسڵاتداریل و نەجیمزاێیل نوین.

²⁷ وەلێ خودا ئەو چشته که وەناو ئی جهانه گیلگەوجیه، هەڵوژارد تا زانیاریل شەرمزارەو بکێ؛ خودا ئەو چشته که وەناو ئی جهانه بی هازه، هەڵوژارد تا هێزداریل شەرمزارەو بکێ؛

²⁸ خودا ئەو چشته که وەناو ئی جهانه پایەنزم و سوکه و تەنانەت وه هویچ و پویچن، هەڵوژارد تا چشتیلی که هەن، پویچەڵ بکێ،

²⁹ تا هویچ بەشەرێگ له لاێ خودا شانازی نەکێ.

³⁰ جا وەبونەێ ئەیوه که ئیوه وەناو عیسا مەسیح‎ بینەسه یەکی، که له لاێ خوداوه ئەڕاێ ئیمه بیەسه زانیاری، یانێ سالح بوین، قودوسیەت و ڕزگاریمان.

³¹ جا هەر ئەوجورە که وەناو کتاو ئرمیای پەێخەمەر نویسریاس: «هەر کەس شانازی کێ، وه خوداوەند شانازی بکێ.»