طِطُس 2 - کِتاب مُقدّس سرائیکی ترجمہ

صحیح تعلیم

¹ پر تُوں او سِکھا جیہڑا صحیح تعلیم دے مطابق ہے۔

² بزُرگ مرداں کُوں سِکھا جو او پرہیزگار، شریف تے مُتّقی ہووݨ تے اِیمان رکھنڑ ءچ تے محبت تے صبر کرݨ ءچ مضبوط ہووݨ۔

³ اِینویں ای بزُرگ عورتاں کُوں سِکھا جو او خُدا پرست زندگی گُزارݨ۔ او تُہمت لاوݨ آلیاں تے شرابی نہ ہووݨ بلکہ نیک گالھیں سِکھاوݨ آلیاں ہووݨ،

⁴ تاں جو او جوان عورتاں کُوں سمجھا سگنڑ جو او آپنڑے پایاں تے بالاں کُوں پیار کرݨ،

⁵ تے مُتّقی، پاک دامن، گھر دا کم کرݨ آلیاں تے مہربان ہووݨ تے آپنڑے پایاں دے تابع راہوݨ تاں جو خُدا دے کلام دی بدنامی نہ تھیوے۔

⁶ اِینویں ای جوان مرداں کُوں وی نصیحت کر جو او مُتّقی بنڑݨ۔

⁷ تُوں خود سارے گالھیں ءچ نیک کم کر تے اُنہاں کیتے نمونہ بنڑ۔ تیڈی تعلیم ءچ صاف دِلی تے شرافت نظر آوے،

⁸ تے تیڈا کلام ایجھا صحیح ہووے جو کوئی بندہ اُوندے اُتے انگل نہ چا سگے تاں جو مخالفاں کُوں ساڈے اُتے اِلزام لاوݨ دا موقع نہ مِلے تے او شرمندہ تھی ونجنڑ۔

⁹ غُلاماں کُوں سِکھا جو آپنڑے مالکاں دے تابع راہوݨ، اُنہاں کُوں ہر گالھ ءچ راضی کرݨ تے بحث کیتے بغیر گالھ مننڑ،

¹⁰ چوری نہ کرݨ بلکہ ہر کم پُوری اِیمانداری نال کرݨ تاں جو اُنہاں دے سارے کم ساڈے نجات ڈیوݨ آلے خُدا دی تعلیم کُوں پُرکشش بنڑاوݨ۔

¹¹ کیوں جو خُدا دا او فضل ظاہر تھی گِیا ہے جیہڑا یکے اِنساناں دی نجات دا سبب ہے۔

¹² او فضل ساکُوں تربیت ڈیندے جو اساں بے دینی تے دُنیاوی خواہشاں کُوں چھوڑ تے اِیں موجودہ جہان ءچ پرہیزگاری، راستبازی، تے دینداری نال زندگی گُزاروں،

¹³ تے نال نال اُوں مُبارک اُمید یعنی آپنڑے عظیم خُدا تے نجات ڈیوݨ آلے یسُوع مسیح دے جلال ظاہر تھیوݨ دے اِنتظار ءچ راہوں۔

¹⁴ مسیح آپنڑے آپ کُوں ساڈی خاطر ڈے ڈِتا تاں جو ساڈا فِدیہ ڈے تے ساکُوں ہر طرحاں دی بدکاری کنُوں چُھڑا گِھنے، تے ساکُوں پاک کر تے آپنڑے کیتے ہِک ایجھی اُمت بنڑا گِھنے جیہڑی نیک کم کرݨ ءچ سرگرم راہوے۔

¹⁵ تُوں ایہ گالھیں سِکھا، تے پُورے اِختیار نال نصیحت تے تنبیہ کریندا رہ۔ کوئی وی تیکُوں حقیر نہ سمجھے۔