رومیوں 9 - کِتاب مُقدّس سرائیکی ترجمہ

خُدا تے اُوندے لوک

¹ مَیں مسیح ءچ سچ آدھا ہاں، کُوڑ نئیں بُولیندا بلکہ میڈا ضمیر وی رُوح القُدس دے تابع تھی تے گواہی ڈیندے،

² جو مَیں بہُوں غمگین ہاں تے میڈا دل ہر ویلے ڈُکھدا راہندے۔

³ کاش اِینویں تھی سگدا جو آپنڑے بِھرانواں دی خاطر جیہڑے میڈی قوم دے لوک ہِن، مَیں مسیح کنُوں جُدا تھی ویندا۔

⁴ او بنی اِسرائیل ءچوں ہِن تے لےپالک تھیوݨ دا حق تے جلال تے یکے عہد تے شریعت تے عبادت تے وعدے وی اُنہاں کیتے ای ہِن۔

⁵ قوم دے بزُرگ اُنہاں دے ای ہِن تے المسیح وی جِسمانی طور تے اُنہاں ءچوں ہے، جیہڑا ساریاں اُتے حکُومت کرݨ آلا خُدا ہے۔ اُوندی حمد ہمیشاں تئیں تھیندی راہوے۔ آمین۔

⁶ اِیندا ایہ مطلب نئیں جو خُدا دا وعدہ کُوڑا تھی گئے کیوں جو جِتّی اِسرائیل دی نسل ءچوں ہِن او سارے اصلی اِسرائیلی نئیں۔

⁷ تے نہ ابرہام دی یکی نسل اُوندی اولاد ہے بلکہ خُدا آکھیا ہے، ”اِضحاق تُوں ای تیڈی نسل اکھویسی۔“

⁸ یعنی جِسمانی فرزند خُدا دے فرزند نئیں بلکہ صرف وعدہ دے فرزند نسل ءچ شمار کیتے ویندے ہِن۔

⁹ کیوں جو وعدہ دا قول ایہ ہے جو ”مَیں مقررہ ویلے تے واپس آساں تے سارہ دے پوتر ہوسی۔“

¹⁰ صرف اِیہو نئیں بلکہ رِبقہ وی ہِک بندے یعنی ساڈے پِیُو اِضحاق کنُوں حاملہ ہئی۔

^11-12 تے اجنڑ تئیں نہ تاں چھوہر جائے ہَن تے نہ ای اُنہاں کُجھ نیکی یا بدی کیتی ہئی، خُدا رِبقہ کُوں آکھیا جو وڈا چھوٹے دی خدمت کریسی، تاں جو خُدا ایہ ظاہر کرے جو اُوندا مقصد قائم راہندے کیوں جو او آپنڑی مرضی نال لوکاں کُوں چُنڑدے نہ جو اُنہاں دے اعمال نال۔

¹³ جِینویں لِکھیا ہے جو ”مَیں یعقُوب نال تاں محبت رکھی پر عیسو نال نفرت۔“

¹⁴ وَل اساں کیا آکھوں؟ کیا خُدا بے اِنصاف ہے؟ ہرگز نئیں!

¹⁵ کیوں جو او مُوسیٰ کُوں آدھے، ”مَیں جیندے اُتے چاہندا ہاں ترس کھاندا ہاں تے جیندے اُتے چاہندا ہاں رحم کریندا ہاں ۔“

¹⁶ اِیں واسطے اِیندا تعلق نہ تاں اِنسان دی خواہش نال ہے تے نہ ای اُوندی بھج دھروک نال بلکہ خُدا دے رحم نال ہے۔

¹⁷ کیوں جو کلام ءچ خُدا فرعون کُوں آکھیا، ”مَیں تیکُوں اِیں واسطے کھڑا کیتے جو تیڈے سببّوں آپنڑی قُدرت ظاہر کراں تے اِینویں ساری دُنیا ءچ میڈا ناں مشہور تھی ونجے۔“

¹⁸ بس خُدا جئیں اُتے چاہندے رحم کریندے تے جِینکُوں چاہندے اُونکُوں سخت کریندے۔

خُدا دا غضب تے رحمت

¹⁹ ہُنڑ تُوں میکُوں اکھیسیں ”وَل خُدا ساکُوں کیوں قصُوروار آدھے؟ کوݨ اُوندی مرضی دے خلاف کھڑا تھی سگدے؟“

²⁰ اِنسان! تُوں کوݨ ہیں جیہڑا خُدا کُوں جواب ڈیندیں؟ کیا کوئی بنڑی ہوئی چیز آپنڑے بنڑاوݨ آلے کُوں آکھ سگدی ہے جو ”تَیں میکُوں اِینویں کیوں بنڑائے؟“

²¹ کیا کُمہار کُوں اِختیار نئیں جو لوئی ہوئی مِٹی کنُوں ہِک تھاں عزت آلے کماں کیتے بنڑاوے تے ڈُوجھا ذِلت آلے کماں کیتے۔

²² بس حیرانگی دی کیا گالھ ہے، جے خُدا آپنڑے غضب تے آپنڑی قُدرت کُوں ظاہر کرݨ دے اِرادے نال اُنہاں کُوں جِنہاں اُتے غضب تھیسی، جیہڑے ہلاکت کیتے تیار کیتے گئے ہَن، بہُوں صبر نال برداشت کریندا ریہا،

²³ تاں جو آپنڑے جلال دی دولت اُنہاں دے ذریعے ظاہر کرے جِنہاں اُتے رحم تھیسی، جیہڑے جلال کیتے پہلے کنُوں تیار کیتے ہَن۔

²⁴ یعنی ساڈے ذریعے جِنہاں کُوں اُوں نہ صرف یہُودیاں ءچوں بلکہ غیریہُودیاں ءچوں وی سڈیا۔

²⁵ جِینویں ہوسِیع نبی دی کتاب ءچ خُدا فرمیندے جو ”جیہڑی میڈی قوم نہ ہئی اُونکُوں مَیں آپنڑی قوم اکھیساں تے جیہڑی محبوبہ نہ ہئی اُونکُوں محبوبہ اکھیساں۔“

²⁶ تے اِینویں تھیسی جو ”جِتھاں اُنہاں کُوں آکھیا گِیا جو تُساں میڈی قوم کائنی اُتھاں او زندہ خُدا دے پوتر اکھویسن۔“

²⁷ تے یسعیاہ نبی وی اِسرائیل دے بارے ءچ اواز ڈے تے آدھا ہے، ”بھانویں بنی اِسرائیل دی تعداد سمندر دی ریت آلی کار ہے وَل وی اُنہاں ءچوں تھوڑے ای بچسن۔

²⁸ کیوں جو رب آپنڑے کلام کُوں زمین اُتے مکمل طور تے، تے بہُوں تیزی نال پُورا کریسی۔“

²⁹ تے جِینویں یسعیاہ پیشن گوئی کیتی ”جیکر لشکراں دا رب ساڈی نسل کُوں زندہ نہ چُھوڑیندا تاں اساں سدُوم آلی کار تھی ویندے تے عمُورہ وانگُوں ختم تھی ویندے۔“

اِسرائیل تے خوشخبری

³⁰ بس اساں کیا آکھوں؟ ایہ جو غیریہُودی جیہڑے راستبازی دے طالب نہ ہَن راستبازی حاصل کیتی یعنی او راستبازی جیہڑی اِیمان نال ہے۔

³¹ پر بنی اِسرائیل جیہڑے شریعت دے ذریعے راستبازی دے طالب ہَن، اُونکُوں حاصل نہ کر سگے۔

³² کیوں؟ اِیں واسطے جو اُنہاں اِیمان نال نئیں بلکہ اعمال دے ذریعے اُونکُوں گولھیا تے تُھڈا لگنڑ آلے پتھر کنُوں تُھڈا کھادا۔

³³ جِینویں لِکھیا ہے جو ”ڈیکھ مَیں صِیُّون ءچ تُھڈا لواوݨ دا ہِک پتھر تے ٹھوکر کھواوݨ دی ہِک چٹان رکھیندا ہاں پر جیہڑا اُوندے اُتے اِیمان گِھن آسی او کڈھائیں شرمندہ نہ تھیسی۔“