رومیوں 6 - کِتاب مُقدّس سرائیکی ترجمہ

گُناہ دے اعتبار تُوں مُردہ پر مسیح دے اعتبار تُوں زندہ

¹ بس اساں کیا آکھوں؟ کیا گُناہ کریندے رہ ونجُوں تاں جو ساڈے اُتے فضل زیادہ تھیوے؟

² ہرگز نئیں! اساں جیہڑے گُناہ دے اعتبار کنُوں مر گئے ہیں تاں ہُنڑ کِینویں گُناہ آلی زندگی گُزار سگدے ہیں؟

³ کیا تُساں نئیں جانڑدے جو ساڈے ءچوں جیہڑے لوکاں مسیح یسُوع ءچ شامل تھیوݨ دا بپتسمہ گِھدے تاں اُوندی موت ءچ شامل تھیوݨ دا بپتسمہ گِھدے؟

⁴ بس بپتسمہ دے وسیلہ اساں اُوندی موت ءچ شامل تھی تے اُوندے نال دفن تھئے تاں جو جِینویں مسیح اسمانی باپ دی جلالی قُدرت دے وسیلے نال مُردیاں ءچوں زندہ کیتا گِیا، اُونویں ای اساں وی نوِیں زندگی گُزاروں۔

⁵ کیوں جو جڈاں اساں مسیح دی موت ءچ شامل تھی گئے ہیں، تاں بے شک اُوندے مُردیاں ءچوں زندہ تھیوݨ ءچ وی شامل تھی ویسوں۔

⁶ تے اساں جانڑدے ہیں جو ساڈی پُرانڑی اِنسانیت مسیح دے نال صلیب اُتے چڑھائی گئی تاں جو ساڈے بدن ءچوں گُناہ دی طاقت ختم تھی ونجے تے اساں اگُوں تے گُناہ دی غُلامی ءچ نہ راہوں۔

⁷ کیوں جو جیہڑا مر گِیا او گُناہ تُوں وی ازاد تھی گِیا۔

⁸ جڈاں اساں مسیح دے نال مر گئے تاں ساکُوں یقین ہے جو اُوندے نال زندہ وی تھی ویسوں۔

⁹ کیوں جو ساکُوں پتا ہے جو جڈاں مسیح مُردیاں ءچوں زندہ کیتا گِیا تاں ولا کڈھائیں نہ مرسی۔ موت دا اُوندے اُتے کوئی اِختیار نئیں۔

¹⁰ جِیں ویلے او مویا تاں ہمیشاں کیتے گُناہ دی طاقت کُوں ختم کرݨ کیتے مویا، پر ہُنڑ جڈاں او زندہ ہے، تاں خُدا دے جلال کیتے زندہ ہے۔

¹¹ اِینویں ای تُساں وی آپنڑے آپ کُوں گُناہ دے لحاظ نال تاں مُردہ، پر خُدا دے جلال کیتے یسُوع مسیح ءچ زندہ سمجھو۔

¹² بس گُناہ کُوں آپنڑے فانی جِسم اُتے حکُومت نہ کرݨ ڈیؤ تاں جو او تُہاکُوں آپنڑی خواہشاں دے تابع نہ رکھ سگے۔

¹³ آپنڑے جِسم دے انگاں کُوں بدی دے ہتھیار بنڑݨ کیتے گُناہ دے سپُرد نہ کرو بلکہ آپنڑے آپ کُوں مُردیاں ءچوں زندہ سمجھ تے خُدا دی خدمت کیتے پیش کرو تے آپنڑے جِسم دے انگاں کُوں راستبازی دے ہتھیار بنڑݨ کیتے خُدا دے سپُرد کرو۔

¹⁴ کیوں جو تُساں شریعت دے ماتحت نئیں بلکہ فضل دے ماتحت ہیوے، اِیں واسطے گُناہ دا تُہاڈے اُتے اِختیار نہ ہوسی۔

راستبازی دے غُلام

¹⁵ وَل کیا کرُوں؟ کیا اساں اِیں واسطے گُناہ کریندے راہوں جو اساں شریعت دے ماتحت نئیں بلکہ فضل دے ماتحت ہیں؟ ہرگز نئیں۔

¹⁶ کیا تُساں نئیں جانڑدے جو تُساں جیندی فرمانبرداری کرݨ کیتے آپنڑے آپ کُوں غُلاماں وانگُوں سپُرد کر ڈیندے ہیوے، اُوندے ای غُلام ہیوے؟ یا تُساں گُناہ دے غُلام ہیوے، جِیندا انجام موت ہے، یا خُدا دے، جِیندا انجام راستبازی ہے۔

¹⁷ پر خُدا دا شُکر ہے جو بےشک پہلے تُساں گُناہ دے غُلام ہَوے پر ہُنڑ دل نال اُوں تعلیم دے تابع تھی گئے ہیوے جیہڑی تُہاڈے سپُرد کیتی گئی۔

¹⁸ تُساں گُناہ دی غُلامی کنُوں آزاد تھی تے راستبازی دے غُلام تھی گئے۔

¹⁹ مَیں تُہاڈی اِنسانی کمزوری دی وجہ کنُوں، غُلامی دی ایہ مثال ڈیندا پِیا ہاں۔ جِینویں تُساں آپنڑے انگاں کُوں بدکاری کرݨ کیتے ناپاکی تے بدکاری دی غُلامی ءچ ڈے ڈِتا ہا، ہُنڑ آپنڑے انگاں کُوں پاک تھیوݨ کیتے راستبازی دی غُلامی ءچ ڈے ڈیؤ۔

²⁰ جِیں ویلے تُساں گُناہ دے غُلام ہَوے تاں راستبازی کنُوں آزاد ہَوے۔

²¹ پر جیہڑے گالھیں کنُوں تُساں ہُنڑ شرمندہ ہیوے، اُنہاں کنُوں تُہاکُوں کیا مِلیا؟ کیوں جو اُنہاں دا انجام موت ہے۔

²² پر ہُنڑ گُناہ دی غُلامی کنُوں آزاد تھی تے خُدا دی غُلامی ءچ آ گئے ہیوے۔ تے تُہاکُوں اِیندا پھل مِلدا پئے جئیں تُوں پاکیزگی حاصل تھیندی ہے تے جِیندا انجام ہمیشاں دی زندگی ہے۔

²³ کیوں جو گُناہ دی مزدُوری موت ہے پر خُدا دی نعمت ساڈے خُداوند یسُوع مسیح ءچ ہمیشاں دی زندگی ہے۔