رومیوں 4 - کِتاب مُقدّس سرائیکی ترجمہ

شریعت تے اِیمان دے بارے ءچ ابرہام دی مثال

¹ اساں ابرہام دے بارے ءچ جیہڑا جِسمانی لحاظ نال ساڈا پِیُو ہے، کیا آکھوں؟ اِیندے بارے ءچ اُونکُوں کیا پتہ لگیا؟

² جے او آپنڑے اعمال دی وجہ کنُوں راستباز کھڑدا تاں اُونکُوں فخر کرݨ دا حق ہوندا پر خُدا دے حضُور ءچ نئیں۔

³ کیوں جو خُدا دا کلام آدھے جو ”ابرہام خُدا اُتے اِیمان گِھن آیا تے ایہ اُوندے کیتے راستبازی شمار کیتا گِیا۔“

⁴ کم کرݨ آلے دی مزدُوری کوئی تحفہ نئیں بلکہ اُوندا حق سمجھی ویندی ہے۔

⁵ پر جیہڑا بندہ کم نئیں کریندا بلکہ بدکاراں کُوں راستباز بنڑاوݨ آلے خُدا اُتے اِیمان رکھیندے، اُوندا اِیمان اُوندے کیتے راستبازی شمار کیتا ویندے۔

⁶ بس جئیں بندے کُوں خُدا اُوندے اعمال دے بغیر راستباز آدھے، داؤد وی اُوں بندے کُوں اِینویں مُبارک اکھیندے،

⁷ جو ”مُبارک او ہِن جِنہاں دیاں بدکاریاں بخش ڈِتیاں گئیاں، تے جِنہاں دے گُناہاں اُتے پڑدہ پاتا گِیا۔

⁸ مُبارک ہے او بندہ جیندے گُناہاں دا رب حساب نہ کریسی۔“

⁹ بس کیا ایہ مُبارک بادی صرف ختنہ تھئے ہوئیاں کیتے ای ہے یا ختنہ نہ تھئے ہوئیاں کیتے وی ہے؟ کیوں جو اساں آدھے ہیں جو ابرہام دا اِیمان اُوندے کیتے راستبازی شمار کیتا گِیا۔

¹⁰ پر او کیہڑی حالت ءچ راستباز شمار کیتا گِیا؟ ختنہ کرواوݨ تُوں بعد ءچ یا پہلے؟ ایہ اُوندے ختنہ کرواوݨ تُوں پہلے دی گالھ ہئی نہ جو بعد دی۔

¹¹ تے اُونکُوں ختنہ دا نشان اُوں راستبازی اُتے مُہر دے طور تے مِلیا، جیہڑی اُونکُوں ختنہ کرواوݨ تُوں پہلے اِیمان رکھنڑ دے سببّوں مِلی۔ اِینویں او اُنہاں ساریاں دا پِیُو ہے جیہڑے اِیمان گِھن آندے ہِن تے بھانویں اُنہاں دا ختنہ نئیں تھیّا، راستبازاں ءچ شمار کیتے ویندے ہِن۔

¹² تے او اُنہاں ختنہ کرواوݨ آلیاں دا وی پِیُو ہے جِنہاں نہ صرف ختنہ کروایا بلکہ ساڈے پِیُو ابرہام دے اُوں اِیمان دی وی پیروی کریندے ہِن جیہڑا اُونکُوں ختنہ کرواوݨ تُوں پہلے حاصل ہا۔

خُدا دا وعدہ اِیمان دے وسیلے نال مؤثر تھیندے

¹³ کیوں جو خُدا ابرہام تے اُوندی نسل نال وعدہ کیتا ہا جو او دُنیا دے وارث ہوسن، پر ایہ وعدہ شریعت دے سببّوں نہ کیتا گِیا ہا بلکہ اُوں راستبازی دے سببّوں جیہڑی اِیمان دے وسیلے نال مِلدی ہے۔

¹⁴ کیوں جو جے صرف شریعت آلے ای دُنیا دے وارث ہووݨ تاں اِیمان بے فائدہ ہوندا تے خُدا دا وعدہ وی بے مقصد ہوندا۔

¹⁵ کیوں جو شریعت غضب گِھن آندی ہے تے جِتھاں شریعت نئیں اُتھاں حُکم عدُولی وی نئیں۔

¹⁶ اِیں واسطے ایہ وعدہ اِیمان دے سببّوں مِلدے تاں جو فضل دے طور تے ہووے تے ابرہام دی یکی نسل کیتے ہووے، صرف اُنہاں کیتے نئیں جیہڑے شریعت دے مننڑ آلے ہِن بلکہ اُنہاں کیتے وی جیہڑے ابرہام وانگُوں اِیمان رکھیندے ہِن۔ کیوں جو ابرہام اساں ساریاں دا پِیُو ہے،

¹⁷ جِینویں لِکھیا ہے جو ”مَیں تیکُوں بہُوں ساریاں قوماں دا پِیُو مقرر کیتے۔“ ابرہام خُدا دی نِگاہ ءچ ساڈا پِیُو ہے جیندے اُتے او اِیمان رکھیندا ہا تے جیہڑا مُردیاں کُوں زندہ کریندے تے غیر موجود چیزاں کُوں اِینویں سڈ گِھندے جِینویں او موجود ہِن۔

¹⁸ ابرہام نا اُمیدی ءچ وی اِیمان رکھیندا ہا تے بہُوں ساریاں قوماں دا پِیُو بنڑیا جِینویں جو اُونکُوں آکھیا گِیا ہا جو ”تیڈی نسل اِینویں ای ہوسی۔“

¹⁹ ابرہام تقریباً سو سال دا ہا تے جانڑدا ہا جو اُوندا جسم مُردے آلی کار ہے تے سارہ دا رِحم وی مُردے آلی کار ہے، وَل وی اُوندا اِیمان کمزور نہ تھیّا۔

²⁰ اُوں اِیمان دی کمی دے سببّوں خُدا دے وعدہ اُتے شک نہ کیتا بلکہ اِیمان ءچ مضبوط تھی تے خُدا دی تمجید کیتی۔

²¹ اُونکُوں پکا یقین ہا جو جِیں خُدا وعدہ کیتے او اُونکُوں پُورا کرݨ دی وی قُدرت رکھیندے۔

²² اِیں واسطے ابرہام دا اِیمان اُوندے کیتے راستبازی شمار کیتا گِیا۔

²³ ایہ گالھ جو ”اِیمان اُوندے کیتے راستبازی شمار کیتا گِیا،“ صرف اُوندے کیتے نئیں لِکھیا گِیا

²⁴ بلکہ ساڈے کیتے وی جِنہاں کیتے اِیمان راستبازی شمار کیتا ویسی۔ کیوں جو اساں اُوں خُدا اُتے اِیمان گِھن آئے ہیں جئیں ساڈے خُداوند یسُوع کُوں مُردیاں ءچوں زندہ کیتا۔

²⁵ او ساڈے گُناہاں کیتے موت دے حوالے کیتا گِیا تے ساکُوں راستباز بنڑاوݨ کیتے زندہ کیتا گِیا۔