رومیوں 2 - کِتاب مُقدّس سرائیکی ترجمہ

خُدا دی عدالت

¹ اِیں واسطے اِلزام لاوݨ آلے، تُوں جیہڑا کوئی وی ہونویں تیڈے کولھ کوئی بہانہ نئیں۔ کیوں جو جڈاں تُوں ڈُوجھے اُتے اِلزام لیندیں تے خود اُوہو کم کریندیں تاں اِینویں آپنڑے آپ کُوں مُجرم بنڑیندیں۔

² اساں جانڑدے ہیں جو خُدا ایجھے کم کرݨ آلے دی عدالت حق دے مطابق کریندے۔

³ اِنسان! تُوں جیہڑا ایجھے کم کرݨ آلیاں اُتے اِلزام لیندیں تے خود اُوہو کم کریندیں، کیا ایہ سمجھدیں جو تُوں خُدا دی عدالت کنُوں بچ ویسیں؟

⁴ کیا تُوں خُدا دی مہربانی، برداشت تے صبر کُوں نا چیز سمجھدیں؟ تے کیا ایہ نئیں جانڑدا جو خُدا تیکُوں توبہ کرݨ دو گِھن ونجنڑ کیتے تیڈے اُتے مہربانی کریندے؟

⁵ پر تُوں آپنڑے سخت تے توبہ نہ کرݨ آلے دل دے سببّوں آپنڑے کیتے غضب جمع کریندا پِیا ہیں، خُدا دے غضب دے ڈینہہ کیتے جڈاں خُدا دا سچا اِنصاف ظاہر تھیسی۔

⁶ او ”ہر بندے کُوں اُوندے اعمال دے مطابق بدلہ ڈیسی۔“

⁷ جیہڑے نیک کماں ءچ قائم رہ تے جلال، عزت تے ختم نہ ہووݨ آلی زندگی دے طالب ہِن اُنہاں کُوں ہمیشاں دی زندگی ڈیسی۔

⁸ پر جیہڑے خود غرض ہِن تے سچائی کُوں چھوڑ تے بُرائی دے پِچُھوں چلدے ہِن اُنہاں اُتے قہر تے عذاب نازل تھیسی۔

⁹ ہر اِنسان اُتے جیہڑا بُرائی کریندے، مُصیبت تے پریشانی آسی، پہلے یہُودی اُتے ولا غیریہُودی اُتے۔

¹⁰ پر ہر اُوں بندے کُوں جیہڑا نیکی کریندے جلال، عزت تے سکون مِلسی، پہلے یہُودی کُوں ولا غیریہُودی کُوں۔

¹¹ کیوں جو خُدا کہیں دی طرفداری نئیں کریندا۔

¹² جیہڑے لوکاں کُوں شریعت نئیں مِلی تے گُناہ کریندے ہِن، او شریعت دے بغیر ہلاک تھیسن تے او جِنہاں کولھ شریعت ہے تے گُناہ کریندے ہِن، اُنہاں کُوں شریعت دے مطابق سزا مِلسی۔

¹³ کیوں جو شریعت کُوں سُنڑݨ آلے خُدا دی نِگاہ ءچ راستباز نئیں ہوندے بلکہ شریعت اُتے عمل کرݨ آلے ای راستباز کھڑائے ویسن۔

¹⁴ ہاں او قوماں جِنہاں کولھ شریعت نئیں جڈاں او فطرتی طور تے شریعت دے مطابق کم کریندیاں ہِن تاں شریعت نہ ہوندے ہوئے وی او خود آپنڑے کیتے ہِک شریعت ہِن۔

¹⁵ او ایہ ظاہر کریندے ہِن جو شریعت دے حُکم اُنہاں دے دِلاں اُتے لِکھے ہوئے ہِن تے اُنہاں دا ضمیر وی اِیں گالھ دی گواہی ڈیندا ہے، کیوں جو اُنہاں دے خیال کہیں ویلے اُنہاں اُتے اِلزام لیندن تے کہیں ویلے اُنہاں کُوں بےقصُور آدھن۔

¹⁶ ایہ اُوں ڈینہہ تھیسی جڈاں خُدا یسُوع مسیح دے وسیلے اِنساناں دیاں لُکیاں گالھیں دا اِنصاف کریسی جِینویں مَیں خوشخبری سُنڑیندا ہاں۔

یہُودی تے شریعت

¹⁷ پر جے تُوں یہُودی اکھویندیں تے شریعت اُتے بھروسہ کریندیں تے خُدا اُتے فخر کریندیں،

¹⁸ تے اُوندی مرضی جانڑدیں تے شریعت دی تعلیم گِھن تے چنگے گالھیں پسند کریندیں،

¹⁹ تے جے تیکُوں اِیں گالھ اُتے وی یقین ہے جو تُوں اندھیاں دا راہنما تے اندھاریاں ءچ راہنڑ آلیاں کیتے روشنی ہیں،

²⁰ تے احمقاں کُوں سِکھاوݨ آلا تے بالاں دا اُستاد ہیں کیوں جو تیڈے کولھ شریعت ءچ علم تے حق دا نمونہ ہے،

²¹ تاں وَل تُوں جیہڑا بئیاں کُوں سکھیندیں، آپنڑے آپ کُوں کیوں نئیں سکھیندا؟ تُوں جیہڑا وعظ کریندیں جو چوری نہ کر، خود کیوں چوری کریندیں؟

²² تُوں جیہڑا آدھیں جو زِنا نہ کر، خود کیوں زِنا کریندیں؟ تُوں جیہڑا بُتاں کنُوں نفرت کریندیں، خود بُت خانیاں کُوں کیوں لُٹ گِھندیں؟

²³ تُوں جیہڑا شریعت اُتے فخر کریندیں، تُوں خود کیوں شریعت دی نافرمانی کر تے خُدا دی بے عزتی کریندیں؟

²⁴ اِیہو وجہ ہے جو پاک کلام ءچ لِکھیا ہے جو ”تُہاڈی وجہ کنُوں غیر قوماں ءچ خُدا دے ناں دی توہین کیتی ویندی ہے۔“

²⁵ ختنہ دا فائدہ تاں ہے پر شرط ایہ ہے جو تُوں شریعت اُتے عمل کریں۔ پر جے تُوں شریعت دی نافرمانی کریندیں تاں تُوں اُنہاں دے برابر ہیں جیہڑے ختنہ نئیں کریندے۔

²⁶ جے او بندہ جِیندا ختنہ نہ تھیّا ہووے، شریعت دے حُکماں اُتے عمل کریندے تاں کیا او ختنہ تھئے ہوئے لوکاں دے برابر نہ سمجھیا ویسی؟

²⁷ بلکہ کیا او جِیندا ختنہ نہ تھیّا ہووے پر شریعت اُتے عمل کریندے، تیکُوں جِیندا ختنہ تھیّا تے جیندے کولھ شریعت ہے، پر اُوندے اُتے عمل نئیں کریندا، قصُوروار نہ کھڑیسی؟

²⁸ کیوں جو او یہُودی نئیں جیہڑا ظاہری طور تے ہووے تے نہ ای او ختنہ ہے جیہڑا ظاہری تے جِسمانی ہے۔

²⁹ بلکہ یہُودی اُوہو ہے جیہڑا دِلی طور تے یہُودی ہے تے ختنہ اُوہو ہے جیہڑا دل دا تے رُوحانی ہے نہ جو لِکھے ہوئے حُکم دا۔ ایجھے اِنسان دی تعریف آدمیاں دی طرفوں نئیں بلکہ خُدا دی طرفوں ہوندی ہے۔