رومیوں 16 - کِتاب مُقدّس سرائیکی ترجمہ

شخصی سلام

¹ مَیں تُہاکُوں ساڈی بھینڑ فیبے دی جیہڑی کِنخریہ دی کلیسیا دی خادمہ ہے سفارش کریندا ہاں،

² جو جِینویں مُقدّساں کُوں چاہیدے تُساں اُونکُوں خُداوند ءچ خوشی نال قبول کرو۔ جِیں کم ءچ اُونکُوں تُہاڈی مدد دی لوڑ ہووے، اُوندی مدد کرو کیوں جو او وی بہُوں ساریاں دی مددگار ریہی ہے بلکہ میڈی وی۔

³ پرسِکہ تے اَکوِلہ کُوں میڈا سلام آکھو۔ او مسیح یسُوع ءچ میڈے ہم خدمت ہِن۔

⁴ اُنہاں میڈی خاطر آپنڑے آپ کُوں خطرے ءچ پاتا ہویا ہا۔ نہ صرف میں بلکہ غیر قوماں دیاں سبھ کلیسیاواں وی اُنہاں دیاں شُکر گُزار ہِن۔

⁵ اُوں کلیسیا کُوں وی سلام آکھو جیہڑی اُنہاں دے گھر ءچ ہے۔ میڈے عزیز اِپینِتُس کُوں سلام آکھو جیہڑا آسِیہ ءچ مسیح اُتے سبھ تُوں پہلے اِیمان گِھن آوݨ آلا ہا۔

⁶ مریم کُوں سلام آکھو، جئیں تُہاڈے واسطے بہُوں محنت کیتی۔

⁷ اندرُنِیکُس تے یُونِیاس کُوں سلام آکھو۔ او میڈے رشتہ دار ہِن تے میڈے نال قید ہَن تے رسُولاں ءچ مشہور ہِن تے مَیں کنُوں پہلے مسیح ءچ شامل تھئے۔

⁸ اَمپلیاطُس کُوں سلام آکھو جیہڑا خُداوند ءچ میڈا عزیز ہے۔

⁹ اُربانُس کُوں جیہڑا مسیح ءچ ساڈا ہم خدمت ہے تے میڈے عزیز استخُس کُوں سلام آکھو۔

¹⁰ اَپلِّیس کُوں سلام آکھو جیہڑا مسیح ءچ مقبول ہے۔ اَرسِتُبُولُس دے گھر آلیاں کُوں سلام آکھو۔

¹¹ میڈی قوم آلے ہیرودیون کُوں سلام آکھو۔ نَرکِسُس دے اُنہاں گھر آلیاں کُوں سلام آکھو جیہڑے خُداوند دے لوک ہِن۔

¹² ترُوفَینہ تے ترُوفوسہ کُوں سلام آکھو جیہڑیاں خُداوند کیتے محنت کریندیاں ہِن۔ میڈی عزیز پرسِس کُوں سلام آکھو جئیں خُداوند کیتے بہُوں محنت کیتی ہے۔

¹³ رُوفُس جیہڑا خُداوند دا چُنڑیا ہویا ہے تے اُوندی ماء جیہڑی میڈی ماء وانگُوں ہے، ڈوہائیں کُوں سلام آکھو۔

¹⁴ اَسُنکرِتُس، فلِگون، ہِرمیس، پترُباس، ہرماس تے اُنہاں بِھرانواں کُوں جیہڑے اُنہاں دے نال ہِن، سلام آکھو۔

¹⁵ فِلُلگُس، یُولیہ، نیریُوس تے اُوندی بھینڑ تے اُلُمپاس تے اُنہاں سبھ مُقدّساں کُوں جیہڑے اُنہاں دے نال ہِن، سلام آکھو۔

¹⁶ آپس ءچ پاک بوسہ گِھن تے ہِک ڈُوجھے کُوں سلام کرو۔ مسیح دیاں ساریاں کلیسیاواں تُہاکُوں سلام آدھیاں ہِن۔

آخری ہدایات

¹⁷ ہُنڑ بِھراؤ! مَیں تُہاڈی مِنت کریندا ہاں جو اُنہاں لوکاں تُوں خبردار راہو جیہڑے پارٹی بازی کرویندن تے اُوں تعلیم دے خلاف جیہڑی تُہاکُوں مِلی ہے، تعلیم ڈے تے تُھڈا کھواوݨ دا سبب ہِن۔ اُنہاں تُوں دُور راہو۔

¹⁸ کیوں جو ایجھے لوک ساڈے خُداوند مسیح دی نئیں بلکہ آپنڑے پیٹ دی خدمت کریندے ہِن۔ او آپنڑے مِٹھے تے خوشامد دے گالھیں نال اُنہاں لوکاں کُوں دوکھا ڈیندے ہِن، جیہڑے کُجھ نئیں جانڑدے۔

¹⁹ تُہاڈی فرمانبرداری ساریاں ءچ مشہور تھی گئی ہے، اِیں واسطے مَیں تُہاڈے بارے ءچ خوش ہاں، پر ایہ چاہندا ہاں جو تُساں نیکی کرݨ دے بارے ءچ سمجھدار بنڑ ونجو تے بدی کرݨ دے بارے ءچ بھولے بنڑ ونجو۔

²⁰ خُدا جیہڑا اِطمینان دا سرچشمہ ہے، شیطان کُوں تُہاڈے پیراں تلے جلد کُچلوا ڈیسی۔ ساڈے خُداوند یسُوع مسیح دا فضل تُہاڈے نال راہوے۔

²¹ میڈا ہم خدمت تِیمُتِھیُس تے میڈی قوم آلے لُوکِیُس، یاسون تے سوسِپطرُس تُہاکُوں سلام آدھے ہِن۔

²² مَیں تِرتیُس جئیں اِیں خط کُوں پولُس کیتے لِکھیا ہے، تُہاکُوں خُداوند ءچ سلام آدھا ہاں۔

²³ گِیُس، جیہڑا میڈی تے اِتھاں دی ساری کلیسیا دی مہمان نوازی کریندے، تُہاکُوں سلام آدھے۔ شہر دا خزانچی اِراستُس تے کوارتُس بِھرا تُہاکُوں سلام آدھے ہِن۔

²⁴ [ساڈے خُداوند یسُوع مسیح دا فضل تُہاڈے نال ہووے۔ آمین۔]

اِختتامی دُعا تے حمد

²⁵ خُدا دی تمجید ہووے جیہڑا تُہاکُوں میڈی خوشخبری یعنی یسُوع مسیح دی تبلیغ دے وسیلے مضبوط کر سگدا ہے، اُوں بھید دے مُکاشفہ دے مطابق جیہڑا ازل کنُوں لُکیا ریہا

²⁶ پر ہُنڑ ظاہر تھی گئے۔ او ازلی خُدا دے حُکم دے مطابق نبیاں دیاں کتاباں دے ذریعے ساریاں قوماں کُوں ڈسایا گِیا ہے تاں جو او اِیمان گِھن آ تے خُدا دے تابع تھی ونجنڑ۔

²⁷ تے ہُنڑ یسُوع مسیح دے وسیلے نال اُوں واحد تے حِکمت آلے خُدا دی ابد تئیں تمجید تھیندی راہوے۔ آمین۔