رومیوں 13 - کِتاب مُقدّس سرائیکی ترجمہ

مُلکی حکُومت تے ساڈے فرائض

¹ ہر بندہ اِختیار آلیاں حکومتاں دی تابعداری کرے، کیوں جو کوئی حکُومت ایجھی نئیں جیہڑی خُدا دی طرفوں نہ ہووے۔ جیہڑیاں حکومتاں موجود ہِن، خُدا ای دی طرفوں مقرر تھئیاں ہِن۔

² اِیں واسطے جیہڑا کوئی حکُومت دی مخالفت کریندے او خُدا دے قائم کیتے ہوئے اِنتظام دی مخالفت کریندے، اُونکُوں سزا مِلسی۔

³ کیوں جو نیک کم کرݨ آلا حاکماں کنُوں نئیں ڈردا۔ پر بُرے کم کرݨ آلا ڈردے۔ جے تُوں حاکم کنُوں بے خوف راہوݨ چاہندیں تاں نیکی کیتا کر، وَل اُوندی طرفوں تیکُوں شاباش مِلسی۔

⁴ حاکم تیڈی بھلائی کیتے خُدا دا خادم ہے۔ پر جے تُوں غلط کم کریں تاں ڈر کیوں جو اُوندے ہتھ ءچ تلوار اِینویں نئیں ڈِتی گئی۔ او خُدا دا خادم ہے تے ہر مُجرم کُوں سزا ڈے تے خُدا دا غضب ظاہر کریندے۔

⁵ اِیں واسطے نہ صرف سزا کنُوں بچنڑ کیتے بلکہ آپنڑے ضمیر کُوں صاف رکھنڑ کیتے وی حکُومت دے تابع راہو۔

⁶ تُساں ٹیکس وی اِیں وجہ تُوں ڈیندے ہیوے، کیوں جو حکُومت کرݨ آلے خُدا دے خادم ہِن تے آپنڑے کم ءچ مصروف راہندے ہِن۔

⁷ ہر ہِک کُوں اُوندا حق ڈِتا کرو۔ جِینکُوں ٹیکس ڈیونڑا چاہیدے اُونکُوں ٹیکس ڈیؤ، جِینکُوں محصُول ڈیونڑا ہووے اُونکُوں محصُول ڈیؤ، جئیں کنُوں ڈرنڑا چاہیدے، اُوں کنُوں ڈرو تے جِیندا احترام کرنڑا چاہیدے، اُوندا احترام کرو۔

ساڈے مشترکہ فرائض

⁸ آپس دی محبت دے سِوا کہیں چیز دے قرضدار نہ راہو کیوں جو جیہڑا ڈُوجھے نال محبت رکھیندے او شریعت اُتے عمل کریندے۔

⁹ کیوں جو ایہ سارے حُکم جو ”زِنا نہ کر، خون نہ کر، چوری نہ کر، لالچ نہ کر“ تے اِنہاں دے علاوہ جیہڑے وی حُکم باقی ہِن، اُنہاں ساریاں دا خلاصہ اِیں ہِک حُکم ءچ موجود ہے جو ”آپنڑے ہمسائے نال آپنڑے وانگُوں محبت رکھ۔“

¹⁰ محبت آپنڑے ہمسائے نال بُرائی نئیں کریندی اِیں واسطے محبت کرݨ شریعت کُوں پُورا کرݨ ہے۔

¹¹ وقت کُوں پچھانڑو تے اِینویں ای کرو، کیوں جو نیندر کنُوں جاگنڑ دا ویلا آ گِیا ہے۔ جِیں ویلے اساں اِیمان گِھن آئے ہسے، اُوں وقت دی نسبت ہُنڑ ساڈی نجات بہُوں نیڑے ہے۔

¹² رات تقریباً لنگھ گئی ہے تے ڈینہہ نِکلنڑ آلا ہے، اِیں واسطے اساں اندھارے دے کماں کُوں چھوڑ تے نُور دے ہتھیار بَدھ گِھنوں۔

¹³ اساں حیادار زندگی گُزاروں جِینویں لوک ڈینہہ دی روشنی ءچ کریندے ہِن۔ اِیں واسطے ساڈے ءچ نچنڑ ٹپنڑ، نشہ بازی، زِناکاری، شہوت پرستی، جھیڑے تے حسد وغیرہ نہ ہووے۔

¹⁴ بلکہ خُداوند یسُوع المسیح کُوں پا گِھنو تے جِسم دیاں بُریاں خواہشاں کُوں پُورا کرݨ ءچ نہ لگے راہو۔