رومیوں 11 - کِتاب مُقدّس سرائیکی ترجمہ

اِسرائیل اُتے خُدا دا رحم

¹ اِیں واسطے مَیں پُچھدا ہاں، کیا خُدا آپنڑی قوم کُوں رَد کر ڈِتے؟ ہرگز نئیں! کیوں جو مَیں وی اِسرائیلی تے ابرہام دی نسل ءچوں ہاں تے بِنیمِین دے قبیلہ ءچوں ہاں۔

² خُدا آپنڑی قوم کُوں جِینکُوں او پہلے کنُوں جانڑدا ہا، رَد نئیں کیتا۔ کیا تُساں نئیں جانڑدے جو خُدا دا کلام ایلیّاہ دے بارے ءچ کیا فرمیندے، جو او کِینویں خُدا کُوں اِسرائیل دے خلاف ایہ فریاد کریندے جو

³ ”یا رب، اُنہاں تیڈے نبیاں کُوں قتل کیتے تے تیڈیاں قُربان گاہیں کُوں ڈھا ڈِتے۔ ہُنڑ مَیں کلھا ای بچیا ہاں تے او میکُوں وی مارݨ چاہندے ہِن۔“

⁴ پر خُدا اُونکُوں جواب ڈِتا، ”مَیں آپنڑے کیتے سَت ہزار بندے بچا گِھدے ہِن جِنہاں بعل دے بُت کُوں سجدہ نئیں کیتا۔“

⁵ اِیں طرحاں اِیں زمانے ءچ وی فضل نال چُنڑے ہوئے کُجھ باقی ہِن۔

⁶ تے جے فضل کنُوں چُنڑے گئے ہِن تاں وَل اعمال کنُوں نئیں، نہ تاں فضل، فضل نہ راہندا۔

⁷ تاں نتیجہ کیا نِکلیا؟ بنی اِسرائیل کُوں او چیز نہ مِلی جِینکُوں او گولھیندا ریہا۔ پر او خُدا دے چُنڑے ہوئے لوکاں کُوں مِل گئی جڈاں جو باقی سارے سخت دل کر ڈِتے گئے۔

⁸ جِینویں جو لِکھیا ہے جو ”خُدا اُنہاں کُوں سُست طبیعت ڈِتی تے ایجھے اکھیں جیہڑیاں نہ ڈیکھنڑ تے ایجھے کَن جیہڑے نہ سُنڑݨ تے اَج تئیں او اِینویں ای ہِن۔“

⁹ تے داؤد آدھے جو ”اُنہاں دا دسترخوان اُنہاں کیتے جال تے پھندا تے تُھڈا کھاوݨ تے سزا دا سبب بنڑ ونجے۔

¹⁰ اُنہاں دے اکھیں اندھے تھی ونجنڑ تاں جو ڈیکھ نہ سگنڑ تے اُنہاں دیاں کمراں ہمیشاں جُھکیاں راہوݨ۔“

¹¹ مَیں وَل اکھیندا ہاں، کیا اُنہاں ایجھا تُھڈا کھادے جو ڈھے پووݨ؟ ہرگز نئیں! بلکہ اُنہاں دی گُمراہی دے سببّوں غیریہُودیاں کُوں نجات حاصل کرݨ دا موقع مِلیا تاں جو یہُودیاں کُوں غیرت آوے۔

¹² جڈاں یہُودیاں دی گُمراہی دُنیا دی برکت دا سبب بنڑی تے اُنہاں دا رُوحانی زوال غیریہُودیاں کیتے بےحد برکت دا سبب بنڑیا تاں اُنہاں دی مکمل بحالی کیجھی زیادہ برکت دا سبب ہوسی۔

غیر قوماں کیتے نجات

¹³ ہُنڑ مَیں تُساں غیریہُودیاں کُوں آدھا ہاں۔ مَیں غیریہُودیاں کیتے رسُول مقرر تھیّا ہاں اِیں واسطے آپنڑی خدمت دی تعریف کریندا ہاں،

¹⁴ تاں جو کہیں طرحاں وی مَیں آپنڑی قوم آلیاں کُوں غیرت ڈیوا تے اُنہاں ءچوں بہُوں کُوں نجات ڈیوا سگاں۔

¹⁵ کیوں جو جِیں ویلے اُنہاں دا رَد تھی ونجنڑ، دُنیا کیتے خُدا نال صُلح دا سبب بنڑ گِیا تاں اُنہاں دا ولا قبول تھی ونجنڑ مُردیاں ءچوں زندہ تھی ونجنڑ الی کار نہ ہوسی؟

سبھ اِنساناں اُتے خُدا دی رحمت زیتون دا درخت خُدا دے چُنڑے ہوئے لوک یعنی بنی اِسرائیل ہے۔ پیوست تھی تے جنگلی زیتون یعنی غیر یہُودی خُدا دے لوکاں ءچ شامل تھی گئے تے اُنہاں برکتاں ءچ شریک تھی گئے جیہڑیاں پِیُو ڈاڈا کُوں وعدہ دے طور تے مِلیاں ہَن

¹⁶ جے نذر دا پہلا پیڑا پاک ہووے تاں سارا مَلیا ہویا اٹّا وی پاک ہوسی تے جے جڑھ پاک ہے تاں اُوندیاں لڑیاں وی پاک ہوسن۔

¹⁷ بے شک کُجھ لڑیاں کپ ڈِتیاں گئیاں تے تُوں جنگلی زیتون ہوندے ہوئے اُنہاں دی جاہ پیوند تھی گِیا، تے زیتون دے درخت دی جڑھ دے روغن ءچ حصہ دار تھی گِیا۔

¹⁸ پر تُوں اُنہاں تروٹیاں لڑیاں دے مُقابلہ ءچ فخر نہ کر۔ جے فخر کریں تاں یاد رکھ جو تُوں جڑھ کُوں نئیں بلکہ جڑھ تیکُوں سنبھالی کھڑی ہے۔

¹⁹ تُوں ضرور ایہ اکھیسیں جو ”او لڑیاں اِیں واسطے کپ ڈِتیاں گئیاں جو مَیں پیوند تھی وَنجاں۔“

²⁰ ٹھیک ہے۔ پر او اِیمان نہ گِھن آوݨ دے سببّوں کپ ڈِتیاں گئیاں تے تُوں تاں اِیمان گِھن آوݨ دی وجہ کنُوں قائم ہیں۔ بس مغرُور نہ تھی بلکہ ڈردا رہ،

²¹ کیوں جو جِیں ویلے خُدا اصلی لڑیاں کُوں نہ چھوڑیا تاں او تیکُوں وی نہ چھوڑیسی۔

²² اِیں واسطے خُدا دی مہربانی تے سختی ڈوہائیں اُتے غور کر، سختی اُنہاں اُتے جیہڑے ڈھے پئے، تے مہربانی تَیں اُتے۔ پر شرط ایہ ہے جو تُوں اُوندی مہربانی اُتے قائم راہویں نہ تاں تُوں وی کپ ڈِتا ویسیں۔

²³ تے جے یہُودی وی ضد چھوڑ تے اِیمان گِھن آوݨ تاں پیوند کیتے ویسن کیوں جو خُدا اُنہاں کُوں ولا پیوند کرݨ دی قُدرت رکھیندے۔

²⁴ تُوں خود زیتون دے اُوں درخت کنُوں جیہڑا قُدرتی طور تے جنگلی ہے، قُدرت دے خلاف چنگے زیتون دے درخت ءچ پیوند کیتا گِیا ہیں، تاں وَل ایہ جیہڑیاں اصل لڑیاں ہِن آپنڑے ای زیتون دے درخت ءچ ضرور پیوند کیتیاں ویسن۔

²⁵ بِھراؤ! مَیں اِیں راز کُوں تُہاکُوں سمجھاونڑاں چاہندا ہاں تاں جو تُساں آپنڑے آپ اُتے فخر نہ کرو۔ گالھ ایہ ہے جو اِسرائیل دا ہِک حصہ سخت دل تھی گِیا ہے تے جئیں تئیں غیر قوماں مکمل طور تے داخل نہ تھی ونجنڑ او اِینویں ای راہسی۔

²⁶ وَل پُوری قوم اِسرائیل کُوں نجات مِلسی۔ کیوں جو لِکھیا ہے ”چُھڑاوݨ آلا صِیُّون ءچوں نِکل سی او بدکاراں کُوں یعقُوب کنُوں کڈھیسی۔

²⁷ تے اُنہاں نال میڈا ایہ عہد ہوسی جِیں ویلے مَیں اُنہاں دے گُناہ دُور کر ڈیساں۔“

²⁸ بنی اِسرائیل دے بہُوں سارے لوک خوشخبری دے دُشمنڑ ہِن تے اِیندے نال تُہاکوں فائدہ ہے پر ہُنڑ وی او خُدا دے چُنڑے ہوئے لوک ہِن تے پِیُو ڈاڈا دی وجہ کنُوں خُدا دے پیارے ہِن۔

²⁹ کیوں جو خُدا دیاں نعمتاں تے اُوندا بُلاوا کڈھائیں تبدیل نئیں تھیندا۔

³⁰ جِینویں تُساں غیریہُودی پہلے نافرمان ہَوے پر ہُنڑ یہُودیاں دی نافرمانی دے سببّوں تُہاڈے اُتے خُدا دا رحم تھیّا ہے،

³¹ اِینویں ای ہُنڑ یہُودی نافرمانی کریندے ہِن تاں جو تُہاڈے اُتے رحم تھیوݨ دی وجہ کنُوں اُنہاں اُتے وی رحم تھیوے۔

³² کیوں جو خُدا ساریاں کُوں نافرمانی ءچ گرفتار تھیوݨ ڈِتے تاں جو او ساریاں اُتے رحم کرے۔

خُدا دی حمد

³³ واہ! خُدا دی دولت، اُوندی حِکمت تے اُوندا علم بہُوں گہرا ہے! اُوندے فیصلے سمجھ کنُوں اصلُوں باہر ہِن، تے اُوندیاں راہاں کوݨ گولھ سگدے!

³⁴ ”رب دی سوچ کُوں کوݨ جاݨ سگدے؟ یا کوݨ اُوندا صلاح کار بنڑ سگدے؟

³⁵ یا کئیں اُونکُوں پہلے کُجھ ڈِتا، جِیندا صِلہ اُونکُوں ڈِتا ونجے ؟“

³⁶ کیوں جو ساریاں چیزاں اُوندی طرفوں، اُوندے وسیلے نال تے اُوندے کیتے ہِن۔ اُوندی تمجید ہمیشاں تئیں تھیندی راہوے۔ آمین۔