رومیوں 10 - کِتاب مُقدّس سرائیکی ترجمہ

¹ بِھراؤ! اِسرائیلی قوم کیتے میڈی دِلی خواہش تے خُدا کنُوں میڈی دُعا ہے جو او نجات پاوݨ۔

² کیوں جو مَیں اُنہاں دا گواہ ہاں جو او خُدا کیتے غیرت تاں رکھیندے ہِن پر سمجھ نال نئیں۔

³ او اُوں راستبازی کنُوں واقف نہ ہَن جیہڑی خُدا دی طرفوں ہے بلکہ خود آپنڑی راستبازی کُوں قائم کرݨ دی کوشش کریندے ریہے، اِیں واسطے او خُدا دی راستبازی دے تابع نہ تھئے۔

⁴ کیوں جو مسیح شریعت دی تکمیل ہے تے نتیجے ءچ ہر اِیمان گِھن آوݨ آلا راستباز کھڑایا ویندے۔

نجات ساریاں کیتے

⁵ کیوں جو مُوسیٰ اُوں راستبازی دے بارے ءچ جیہڑی شریعت کنُوں ہے ایہ لِکھیا ہے جو ”جیہڑا اُنہاں حُکماں اُتے عمل کریندے او اُنہاں دے وسیلے زندہ راہسی۔“

⁶ پر جیہڑی راستبازی اِیمان تُوں حاصل تھیندی ہے او ایہ آدھی ہے جو آپنڑے دل ءچ ایہ نہ آکھ جو ”اسمان اُتے کوݨ چڑھسی؟“ (یعنی مسیح کُوں تلے گِھن آوݨ کیتے،)

⁷ یا ”کوݨ تلے گہراؤ ءچ لہسی؟“ (یعنی مسیح کُوں مُردیاں ءچوں زندہ کر تے اُتے گِھن آوݨ کیتے۔)

⁸ تاں کیا آدھی ہے؟ ایہ جو ”کلام تیڈے کولھ ہے بلکہ تیڈے مُنہ ءچ تے تیڈے دل ءچ ہے۔“ ایہ اِیمان دا اُوہو کلام ہے جیندی اساں تبلیغ کریندے ہیں جو،

⁹ جے تُوں آپنڑی زبان نال اِقرار کریں جو یسُوع خُداوند ہے تے آپنڑے دل نال اِیمان گِھن آویں جو خُدا اُونکُوں مُردیاں ءچوں زندہ کیتے تاں نجات پا گِھنسیں۔

¹⁰ کیوں جو راستباز کھڑائے ونجنڑ کیتے دل نال اِیمان گِھن آونڑاں ہوندے تے نجات حاصل کرݨ کیتے اِقرار مُنہ کنُوں کیتا ویندے۔

¹¹ اِیں واسطے خُدا دا کلام ایہ آدھے جو ”جیہڑا کوئی اُوندے اُتے اِیمان گِھن آسی او کڈھائیں شرمندہ نہ تھیسی۔“

¹² کیوں جو یہُودی تے غیریہُودی ءچ کوئی فرق نئیں اِیں واسطے جو اُوہو خُداوند سبھ دا خُداوند ہے تے سبھ کُوں جیہڑے اُوندے تُوں دُعا کریندن فیاضی نال برکت ڈیندے۔

¹³ کیوں جو ”جیہڑا وی رب دا ناں گِھنسی نجات پیسی۔“

¹⁴ پر او اُوندا ناں کِینویں گِھننڑ جیندے اُتے او اِیمان نہ گِھن آئے؟ تے اُوندے اُتے اِیمان کِینویں گِھن آوݨ جیندے بارے ءچ نئیں سُنڑیا؟ تے کِینویں سُنڑݨ جئیں تئیں کوئی اُنہاں کُوں خوشخبری نہ سُنڑاوے؟

¹⁵ تے خوشخبری کِینویں سُنڑاوݨ جئیں تئیں کوئی اُنہاں کُوں نہ بھیجے ؟ اِیں واسطے لِکھیا ہے جو ”اُنہاں دے پیر کیجھے بختاں آلے ہِن جیہڑے خوشخبری سُنڑیندن۔“

¹⁶ پر ساریاں اُوں خوشخبری کُوں قبول نئیں کیتا۔ اِیں واسطے یسعیاہ آدھے جو ”یا رب، ساڈے پیغام اُتے کوݨ اِیمان گِھن آئے ؟“

¹⁷ بس اِیمان پیغام سُنڑݨ تُوں پیدا تھیندے یعنی مسیح دا کلام سُنڑݨ تُوں۔

¹⁸ پر مَیں پُچھدا ہاں، کیا اُنہاں نئیں سُنڑیا؟ بے شک سُنڑیا، جِینویں لِکھیا ہے جو ”اُنہاں دی اواز پُوری زمین تئیں تے اُنہاں دا پیغام دُنیا دی اِنتہا تئیں پُج گِیا۔“

¹⁹ مَیں ولا پُچھدا ہاں، کیا بنی اِسرائیل نئیں سمجھیا؟ پہلے تاں مُوسیٰ آدھا ہے جو ”مَیں اُنہاں کنُوں جیہڑے قوم وی کائنی تُہاکُوں غیرت ڈیویساں ہِک نادان قوم کنُوں تُہاکُوں کاوڑ ڈیویساں ۔“

²⁰ وَل یسعیاہ بہُوں دلیری نال ایہ آدھے جو ”جیہڑے میکُوں نہ گولھیندے ہَن، اُنہاں میکُوں گولھ گِھدا تے جیہڑے میڈے طالب نہ ہَن، مَیں اُنہاں اُتے ظاہر تھی گِیا۔“

²¹ پر بنی اِسرائیل دے بارے ءچ او فرمیندا ہے جو ”سارا ڈینہہ مَیں باغی تے ضِدی قوم کیتے آپنڑے ہتھ ودھائی ریہا۔“