مُکاشفہ 9 - کِتاب مُقدّس سرائیکی ترجمہ

پنجواں نرسِنگا

¹ جِیں ویلے پنجویں فرشتے آپنڑا نرسِنگا وجایا تاں مَیں ہِک تارہ ڈِٹھا جیہڑا اسمان کنُوں تروٹ تے زمین اُتے ڈھٹھا ہا۔ اُوں تارے کُوں بے تَل کھڈے دی کُنجی ڈِتی گئی۔

² جِیں ویلے اُوں کھڈے کُوں کھولیا تاں اُوندے ءچوں دُھوواں اِینویں نِکلیا جِینویں ہِک بہُوں وڈی بٹھی ءچوں دُھوواں نِکلدے۔ کھڈے دے دُھوئیں دی وجہ کنُوں سِجھ تے ساری ہوا اندھارا تھی گئی۔

³ اُوں دُھوئیں ءچوں زمین اُتے ٹِڈیاں نِکل پئیاں۔ اُنہاں کُوں زمین دے وِٹھوویاں وانگُوں لڑن دی طاقت ڈِتی گئی۔

⁴ تے اُنہاں کُوں آکھیا گِیا جو ”زمین دی گھاہ تے کہیں ساوے بُوٹے یا درخت کُوں نُقصان نہ پُچائے، بلکہ صرف اُنہاں لوکاں کُوں جِنہاں دے متھے اُتے خُدا دی مُہر نئیں۔“

⁵ ٹِڈیاں کُوں جان کنُوں مارݨ دا نئیں بلکہ صرف لوکاں کُوں پنج مہینے تئیں ایجھی اذیت ڈیوݨ دا اِختیار ڈِتا گِیا ہا جیہڑی اِنسان کُوں وِٹھوویاں دے لڑن نال تھیندی ہے۔

⁶ اُنہاں ڈینہاں ءچ لوک موت گولھیسن پر اُنہاں کُوں نہ مِلسی۔ او مرݨ دی خواہش کریسن تے موت اُنہاں کنُوں بھجسی۔

⁷ اُنہاں ٹِڈیاں دے جِسم ایجھے گھوڑیاں وانگُوں ہَن جیہڑے جنگ کیتے تیار کیتے گئے ہووݨ۔ اُنہاں دے سِراں اُتے سونے دے تاجاں جِیہیاں چیزاں ہَن تے اُنہاں دیاں شکلاں اِنسانی شکلاں وانگُوں ہَن۔

⁸ اُنہاں دے وال عورتاں دے والاں وانگُوں ہَن تے ڈند ببرشیر دے ڈنداں وانگُوں۔

⁹ اُنہاں دے سینے اُتے لُوہے آلی کار سینے بند ہَن، تے اُنہاں دے کھمباں دی اواز ایجھی ہئی جِینویں جنگ دے میدان ءچ بے شمار گھوڑیاں تے رتھاں دے بھجنڑ نال تھیندی ہے۔

¹⁰ اُنہاں دیاں پُچھاں تے ڈنگ وِٹھوویاں وانگُوں ہَن تے اُنہاں دیاں پُچھاں ءچ پنج مہینے تئیں لوکاں کُوں تکلیف ڈیوݨ دی طاقت ہئی۔

¹¹ کھڈے دا فرشتہ اُنہاں دا بادشاہ ہا۔ اُوندا ناں عبرانی ءچ ”ابدّون“ تے یُونانی ءچ ”اپُلّیون“ یعنی ہلاک کرݨ آلا ہے۔

¹² پہلا افسوس تاں تھی گِیا، اِیندے بعد ڈُو افسوس تھیوݨ آلے ہِن۔

چِھینواں نرسِنگا

¹³ جِیں ویلے چِھینویں فرشتے آپنڑا نرسِنگا وجایا تاں مَیں خُدا دے سامنڑے آلی سنہری قُربان گاہ دے چارے سینگاں کنُوں ہِک اواز آندی سُنڑی۔

¹⁴ او اُوں چِھینویں فرشتے کُوں جیہڑا نرسِنگا گِھدی کھڑا ہا ایہ آدھی پئی ہئی جو ”اُنہاں چارے فرشتیاں کُوں جیہڑے وڈے دریا فرات دے کولھ بدھے پئے ہِن، کھول ڈے۔“

¹⁵ او چارے فرشتے جیہڑے خاص کر اُونہئی سال تے اُونہئی مہینے تے اُونہی ڈینہہ تے اُونہئی لاحظے کیتے تیار کیتے گئے ہَن، کھول ڈِتے گئے تاں جو ہِک تِہائی اِنساناں کُوں مار سٹنڑ۔

¹⁶ میکُوں سُنڑائی ڈِتا جو گُھڑسوار فوجاں دی تعداد وِیہہ کروڑ ہئی۔

¹⁷ او گھوڑے تے اُنہاں دے سوار جِنہاں کُوں مَیں آپنڑی رویا ءچ ڈِٹھا ہا، ایجھے سینے بند پاتی ودے ہَن جیہڑے بھاہ وانگُوں رتّے، سُنبل وانگُوں نیلے تے گندھک وانگُوں پِیلے ہَن۔ تے اُنہاں گھوڑیاں دے سر ببرشیر وانگُوں ہَن۔ اُنہاں دے مُنہ کنُوں بھاہ، دُھوواں تے گندھک نِکلدی پئی ہئی۔

¹⁸ اِنہاں ترے آفتاں یعنی بھاہ، دُھوئیں تے گندھک دی وجہ کنُوں جیہڑیاں اُنہاں دے مُنہ ءچوں نِکلدیاں پئیاں ہَن، اِنساناں دی ہِک تِہائی آبادی ہلاک تھی گئی۔

¹⁹ اُنہاں گھوڑیاں دی طاقت اُنہاں دے مُنہ تے پُچھاں ءچ ہئی۔ ایہ پُچھاں نانگاں وانگُوں ہَن جِنہاں دے سر نُقصان پُچیندے ہَن۔

²⁰ باقی لوکاں جیہڑے اِنہاں آفتاں کنُوں نہ مرے، آپنڑے ہتھاں دے کماں کنُوں توبہ نہ کیتی۔ او اُنہاں بدرُوحاں دی تے سونے، چاندی، پِتّل تے لکڑ دے بنڑے ہوئے بُتاں دی عبادت کرݨ تُوں باز نہ آئے جیہڑے نہ تاں ڈیکھ سگدے ہِن، نہ سُنڑ سگدے ہِن تے نہ ٹُر سگدے ہِن۔

²¹ تے اُنہاں قتل، جادُوگری، حرام کاری تے چوری کرݨ تُوں توبہ نہ کیتی۔