مُکاشفہ 22 - کِتاب مُقدّس سرائیکی ترجمہ

¹ وَل اُوں فرشتے میکُوں زندگی دے پانڑی دا دریا ڈِکھایا جیہڑا بَلّور آلی کار بالکل صاف ہا۔ او خُدا تے لیلے دے تخت کنُوں نِکل تے

² شہر دی وڈی سڑک دے اَدھ ءچوں واہندا ہا۔ اُوں دریا دے ڈوہائیں پاسُوں حیات دا درخت ہا۔ او درخت پھلاں دیاں بارہاں فصلاں ڈیندا ہا یعنی ہر مہینہ پھل ڈیندا ہا تے اُوندے پتیاں کنُوں قوماں کُوں شِفا مِلدی ہئی۔

³ اُتھاں کوئی چیز نہ ہوسی جِیندے اُتے لعنت ہوسی۔ خُدا تے لیلے دا تخت اُوں شہر ءچ ہوسی تے اُوندے بندے اُوندی عبادت کریسن۔

⁴ او اُوندا مُنہ ڈیکھسن تے اُوندا ناں اُنہاں دے متھیاں اُتے لِکھیا ہوسی۔

⁵ وَل کڈھائیں رات نہ تھیسی تے او چراغ تے سِجھ دی روشنی دے مُتھاج نہ ہوسن کیوں جو خُداوند خُدا خود اُنہاں کُوں روشن کریسی تے او ہمیشاں تئیں بادشاہی کریندے راہسن۔

یسُوع مسیح دی ڈُوجھی آمد

⁶ اُوں فرشتے میکُوں آکھیا، ”ایہ گالھیں اعتماد دے قابل تے سچے ہِن۔ خُداوند جیہڑا نبیاں دیاں رُوحاں دا خُدا ہے، آپنڑا فرشتہ اِیں غرض نال بھیجیا ہے جو او آپنڑے بندیاں اُتے او گالھیں ظاہر کرے جِنہاں دا جلدی واقع تھیوݨ ضرور ہے۔“

⁷ ”ڈیکھ، مَیں جلدی آوݨ آلا ہاں۔ مُبارک ہے او جیہڑا اِیں نبُوّت دے گالھیں اُتے عمل کریندے۔“

⁸ مَیں یُوحنّا اُوہو ہاں جئیں اِنہاں گالھیں کُوں سُنڑیا تے ڈِٹھا۔ جِیں ویلے مَیں ایہ گالھیں سُنڑ تے ڈیکھ گِھدیاں تاں میں سجدہ ءچ اُوں فرشتے دے پیراں ءچ ڈھے پِیا جئیں میکُوں ایہ گالھیں ڈِکھائیاں ہَن۔

⁹ پر اُوں میکُوں آکھیا، ”خبردار! اِینویں نہ کر۔ مَیں وی تیڈے نال، تیڈے بِھرانواں نال جیہڑے نبی ہِن تے اُنہاں ساریاں نال جیہڑے اِیں کتاب دی نبُوّت دے گالھیں منیندے ہِن، خدمت کرݨ آلا ہاں۔ خُدا کُوں ای سجدہ کر۔“

¹⁰ وَل اُوں میکُوں آکھیا، ”تُوں اِیں کتاب دی نبُوّت دے گالھیں کُوں مُہر لا تے بند کر تے نہ رکھ، کیوں جو وقت نزدیک ہے۔

¹¹ جیہڑا بُرائی کریندے، او بُرائی ای کریندا راہوے۔ جیہڑا ناپاک ہے، او ناپاک ای راہوے۔ جیہڑا راستبازی کریندے، او راستبازی ای کریندا راہوے۔ تے جیہڑا پاک ہے، او پاک ای راہوے۔“

مسیح دا اعلان

¹² ”ڈیکھ، مَیں جلدی آوݨ آلا ہاں۔ تے ہر ہِک دے کم دے مطابق ڈیوݨ کیتے اجر میڈے کولھ ہے۔

¹³ الفا تے اومیگا، اوّل تے آخر، ابتدا تے اِنتہا مَیں ہاں۔

¹⁴ مُبارک ہِن او جیہڑے آپنڑے چولے دھوندے ہِن کیوں جو زندگی دے درخت تئیں پُجنڑ دا حق پیسن تے اُنہاں پھاٹکاں کنُوں شہر ءچ داخل تھیسن۔

¹⁵ پر کُتے، جادُوگر، حرام کار، خونی، بُت پرست، کُوڑی گالھ گھڑن تے پسند کرݨ آلے باہر راہسن۔

¹⁶ مَیں یسُوع آپنڑا فرشتہ اِیں واسطے بھیجیا ہے جو او کلیسیاواں کیتے اِنہاں گالھیں دی تُہاڈے اگُوں گواہی ڈیوے۔ مَیں داؤد دی اصل تے نسل تے صُبح دا نُورانی تارہ ہاں۔“

¹⁷ رُوح تے کُنوار آدھی ہے، ”آ“ تے او وی جیہڑا سُنڑدا ہے، آکھے، ”آ۔“ جیہڑا ترِسّا ہووے تے جیہڑا زندگی دا پانڑی چاہوے او اُونکُوں مُفت ءچ گِھن گِھنے۔

آخری گالھیں

¹⁸ مَیں ہر ہِک بندے دے اگُوں جیہڑا اِیں کتاب دی نبُوّت دے گالھیں سُنڑدے، گواہی ڈیندا ہاں جو جے کوئی بندہ اُنہاں ءچ کُجھ ودھیسی تاں خُدا اِیں کتاب ءچ لِکھیاں ہوئیاں آفتاں اُوندے اُتے نازل کریسی۔

¹⁹ تے جے کوئی نبُوّت دی اِیں کتاب دے گالھیں ءچوں کُجھ کڈھیسی تاں خُدا اِیں کتاب ءچ ذِکر کیتے ہوئے حیات دے درخت تے مُقدّس شہر ءچوں اُوندا حصہ کڈھ ڈیسی۔

²⁰ اِنہاں گالھیں دی گواہی ڈیوݨ آلا فرمیندے، ”بے شک مَیں جلدی آوݨ آلا ہاں۔“ ”آمین! ہا، اے خُداوند یسُوع آ۔“

²¹ خُداوند یسُوع دا فضل مُقدّساں دے نال راہوے۔ آمین۔