مُکاشفہ 21 - کِتاب مُقدّس سرائیکی ترجمہ

نواں اسمان تے نوِیں زمین

¹ وَل مَیں ہِک نواں اسمان تے ہِک نوِیں زمین ڈِٹھی کیوں جو پہلا اسمان تے پہلی زمین چلی گئی ہئی تے کوئی سمندر نہ ریہا۔

² وَل مَیں مُقدّس شہر نویں یروشلیم کُوں خُدا کنُوں اسمان تُوں لہندے ڈِٹھا۔ او اُوں کُنوار وانگُوں سجایا گِیا ہا جئیں آپنڑے پئے کیتے سنگھار کیتا ہووے۔

³ تے مَیں تخت ءچوں کہیں کُوں اُچی اواز نال ایہ آدھے سُنڑیا جو ”ڈیکھ خُدا دی سکونت گاہ ہُنڑ اِنساناں دے وچال ہے تے او اُنہاں نال سکونت کریسی۔ او اُوندے لوک ہوسن تے خُدا خود اُنہاں نال راہسی تے اُنہاں دا خُدا ہوسی۔

⁴ او اُنہاں دے اکھیں دے سارے ہنجُو پُونجھ ڈیسی۔ وَل نہ موت باقی راہسی نہ ماتم، نہ رووݨ تے نہ کوئی درد باقی راہسی کیوں جو پہلیاں چیزاں ویندیاں ریہیاں۔“

⁵ وَل اُوں جیہڑا تخت اُتے بیٹھا ہا آکھیا، ”ڈیکھ مَیں ساریاں چیزاں کُوں نواں بنڑیندا پِیا ہاں۔“ وَل آکھیا جو ”لِکھ کیوں جو ایہ گالھیں اعتماد دے لائق تے سچے ہِن۔“

⁶ وَل اُوں میکُوں آکھیا جو ”مکمل تھی گِیا! مَیں الفا تے اومیگا، ابتدا تے اِنتہا ہاں۔ مَیں ترِسّے کُوں زندگی دے پانڑی دے چشمہ ءچوں مُفت پِلیساں۔

⁷ جیہڑا غالب آسی او اِنہاں چیزاں دا وارث ہوسی۔ مَیں اُوندا خُدا ہوساں تے او میڈا پوتر ہوسی۔

⁸ پر بُزدلاں، غیر اِیمانداراں، گندے کم کرݨ آلیاں، قاتلاں، حرام کاراں، جادُوگراں، بُت پرستاں تے سبھ کُوڑیاں دی جاہ بھاہ تے گندھک نال سڑن آلی جھیل ہوسی۔ ایہ ڈُوجھی موت ہے۔“

نواں یروشلیم

⁹ وَل اُنہاں سَت فرشتیاں ءچوں جِنہاں دے کولھ آخری سَت آفتاں نال بھرے سَت مُنگر ہَن، ہِک آ تے میکُوں آکھیا جو ”آ، مَیں تیکُوں کُنوار، یعنی لیلے دی ذال ڈِکھیساں۔“

¹⁰ تے او میکُوں رُوح ءچ ہِک وڈے، اُچے پہاڑ اُتے گِھن گِیا تے میکُوں مُقدّس شہر یروشلیم ڈِکھایا جیہڑا خُدا کنُوں اسمان تُوں تلے لہندا پِیا ہا۔

¹¹ او شہر خُدا دے جلال نال روشن ہا تے اُوندی چمک بہُوں ای قیمتی پتھر یعنی یشب وانگُوں ہئی تے بَلّور وانگُوں بالکل صاف۔

¹² اُوندی چاردیواری بہُوں وڈی تے اُچی ہئی تے اُوندے بارہاں پھاٹک ہَن۔ تے ہر پھاٹک اُتے ہِک فرشتہ ہئی۔ اُنہاں پھاٹکاں اُتے بنی اِسرائیل دے بارہاں قبیلیاں دے ناں لِکھے ہوئے ہَن۔

¹³ ترے پھاٹک مشرق دو، ترے شمال دو، ترے جنُوب دو تے ترے مغرب دو ہَن۔

¹⁴ اُوں شہر دی چاردیواری دی بنیاد بارہاں پتھراں اُتے قائم ہئی جِنہاں اُتے لیلے دے بارہاں رسُولاں دے ناں لِکھے ہَن۔

¹⁵ جیہڑا فرشتہ میڈے نال گالھ کریندا پِیا ہا، اُوندے کولھ شہر تے اُوندے پھاٹکاں تے چاردیواری کُوں ناپنڑ کیتے سونے دا گز ہا۔

¹⁶ او شہر چورس ہا یعنی اُوندی لمبائی تے چوڑائی برابر ہئی۔ اُوں گز نال شہر کُوں ناپیا تاں او چوڈھاں سو (1,400) مِیل ہا۔ اُوندی لمبائی، چوڑائی تے اُچائی برابر ہئی۔

¹⁷ وَل اُوں چاردیواری کُوں اِنسانی ناپ دے مطابق ناپیا تاں او ہِک سو چوتالیہہ (144) ہتھ ہئی، جیہڑا فرشتے اِستعمال کیتا۔

¹⁸ او دیوار یشب پتھر نال بنڑی ہئی تے شہر بالکل صاف شیشے وانگُوں خالص سونے دا بنڑیا ہویا ہا۔

¹⁹ شہر دی چاردیواری دیاں بنیاداں ہر قِسم دے قیمتی پتھر نال سجیاں ہوئیاں ہَن۔ پہلی بنیاد یشب پتھر نال بنڑی ہئی، ڈُوجھی نیلم نال، تریجھی شب چراغ نال، چوتھی زمُرد نال۔

²⁰ پنجویں عقیق نال، چِھینویں لعل نال، ستویں سنہرے پتھر نال، اٹھوِیں فیروزہ نال، نانویں زبر جد نال، ڈاہویں یمنی پتھر نال، یارہویں سُنبلی پتھر نال تے بارہویں یاقُوت نال۔

²¹ او بارہاں پھاٹک بارہاں موتیاں دے ہَن یعنی ہر پھاٹک سالم موتی دا ہا۔ شہر دی سڑک بالکل صاف شیشہ وانگُوں خالص سونے دی ہئی۔

²² مَیں شہر ءچ کوئی ہیکل نہ ڈِٹھی کیوں جو خُداوند، قادر ِ مُطلق خُدا تے لیلا اُوندی ہیکل ہِن۔

²³ او شہر سِجھ تے چَن دا مُتھاج نئیں، کیوں جو او خُدا دے نُور نال روشن ہے تے لیلا اُوندا چراغ ہے۔

²⁴ قوماں اُوندی روشنی ءچ ٹُرسن تے زمین دے بادشاہ اُوندے ءچ آپنڑا شاندار سامان گِھن آسن۔

²⁵ تے اُوندے پھاٹک ڈینہہ ویلے کڈھائیں وی بند نہ ہوسن کیوں جو اُتھاں رات نہ ہوسی۔

²⁶ قوماں دی شان تے دولت اُوندے ءچ گِھن آئی ویسی۔

²⁷ کوئی ناپاک چیز یا کوئی گندے کم کرݨ آلا یا کُوڑ گھڑن آلا اُوندے ءچ کڈھائیں داخل نہ تھیسی، پر صرف اُوہو جِنہاں دے ناں لیلے دی کتاب ِ حیات ءچ لِکھے گئے ہِن۔