مُکاشفہ 10 - کِتاب مُقدّس سرائیکی ترجمہ

فرشتہ تے چھوٹا طُومار

¹ وَل مَیں ہِک بئے زور آور فرشتے کُوں ڈِٹھا جیہڑا اسمان کنُوں لہندا پِیا ہا۔ او بدّل کُوں ولھیٹی پِیا ہا تے اُوندے سر اُتے کمان ہئی۔ اُوندا چہرہ سِجھ وانگُوں ہا تے جنگھاں بھاہ دے تھمبیاں وانگُوں ہَن۔

² اُوندے ہتھ ءچ ہِک چھوٹا طُومار ہا جیہڑا کُھلا پِیا ہا۔ اُوں آپنڑا سجا پیر سمندر اُتے تے کھبا خشکی اُتے رکھیا،

³ تے اُچی اواز ءچ اِینویں بولیا جِینویں ببرشیر گجدے۔ جِیں ویلے او بولیا تاں نال نال گجکار دیاں سَت آوازاں سُنڑائی ڈِتیاں۔

⁴ اُنہاں گجکار دیاں آوازاں کُوں سُنڑ تے مَیں لِکھنڑ لگا ہم جو اسمان کنُوں ہِک اواز ایہ آدھے ہوئے سُنڑی جو، ”جیہڑا کُجھ گجکار دیاں سَت آوازاں آکھیا ہے اُونکُوں راز ءچ رکھ، تے نہ لِکھ۔“

⁵ وَل اُوں فرشتے، جِینکُوں مَیں سمندر تے خشکی اُتے کھڑے ڈِٹھا ہا، آپنڑا سجا ہتھ اسمان دو اُچا کیتا،

⁶ تے ہمیشاں تئیں زندہ راہوݨ آلے خالق دی جئیں اسمان، زمین، سمندر تے اُنہاں دے اندر دیاں ساریاں چیزاں کُوں خلق کیتا، قَسم چا تے آکھیا جو ”ہُنڑ مزید دیر نہ تھیسی۔

⁷ بلکہ اُنہاں ڈینہاں ءچ جڈاں ستواں فرشتہ آپنڑا نرسِنگا وجاوݨ آلا ہوسی تاں خُدا دا لُکیا ہویا راز، جِینویں اُوں آپنڑے خدمت گُزار نبیاں کُوں ڈِتا ہا، کُھل تے پُورا تھی ویسی۔“

⁸ وَل او اواز جیہڑی اسمان کنُوں سُنڑائی ڈِتی ہئی، اُوں میکُوں ولا آکھیا جو ”اگُوں ودھ تے او طُومار گِھن چا جیہڑا سمندر تے خشکی اُتے کھڑے ہوئے فرشتہ دے ہتھ ءچ کُھلیا پِیا ہے۔“

⁹ اِیں واسطے مَیں اُوں فرشتہ دے کولھ گِیا تے اُونکُوں آکھیا ”ایہ طُومار میکُوں ڈے چا۔“ اُوں آکھیا، ”اِینکُوں گِھن تے کھا گِھن۔ ایہ تیڈے ڈھیڈ کُوں کوڑا کر ڈیسی پر تیڈے مُنہ ءچ شہد وانگُوں مِٹھا لگسی۔“

¹⁰ مَیں او طُومار فرشتہ دے ہتھ کنُوں گِھن تے کھا گِھدا۔ او میڈے مُنہ ءچ تاں شہد وانگُوں مِٹھا لگیا پر کھاوݨ دے بعد میڈا ڈھیڈ کوڑا تھی گِیا۔

¹¹ تے میکُوں ڈسایا گِیا جو ”تیکُوں بہُوں ساریاں اُمتاں، قوماں، زباناں تے بادشاہاں دے بارے ءچ ولا کنُوں نبُوّت کرݨ ضرور ہے۔“