مرقس 9 - کِتاب مُقدّس سرائیکی ترجمہ

¹ یسُوع شاگرداں کُوں آکھیا، ”مَیں تُہاکُوں سچ آدھا ہاں جو جیہڑے اِتھاں کھڑے ہِن، اُنہاں ءچوں کُجھ ایجھے ہِن جو جئیں تئیں خُدا دی بادشاہی کُوں قُدرت نال ظاہر تھیندا نہ ڈیکھ گِھننڑ، ہرگز نہ مرسن۔“

یسُوع دا جلال

² چِھی ڈینہہ بعد یسُوع پطرس، یعقُوب تے یُوحنّا کُوں نال گِھدا تے اُنہاں کُوں ہِک اُچے پہاڑ اُتے کلھیپے ءچ گِھن گِیا۔ اُتھاں اُنہاں دے سامنڑے اُوندی صورت بدل گئی۔

³ اُوندا لباس نُورانی تے بالکل چِٹّا تھی گِیا، ایجھا چِٹّا جو دُنیا دا کوئی دھوبی نئیں کر سگدا۔

⁴ اُنہاں کُوں ایلیّاہ تے مُوسیٰ نظر آئے تے ڈوہائیں یسُوع نال گالھیں کریندے ہَن۔

⁵ پطرس یسُوع کُوں آکھیا، ”ربّی، ساڈا اِتھاں راہنڑ چنگا ہے۔ بس اساں ترے خیمے بنڑاؤں۔ ہِک تُہاڈے کیتے، ہِک مُوسیٰ کیتے، ہِک ایلیّاہ کیتے۔“

⁶ کیوں جو او نہ جانڑدا ہا جو کیا آکھے، اِیں واسطے جو او بہُوں ڈر گئے ہَن۔

⁷ وَل ہِک بدّل اُنہاں اُتے چھاں کر ڈِتی تے اُوں بدّل ءچوں اواز آئی جو ”ایہ میڈا پیارا پوتر ہے، اِیندی سُنڑو۔“

⁸ اُنہاں فوراً چارے پاسُوں نِگاہ ماری پر اُنہاں یسُوع دے علاوہ آپنڑے نال کہیں بئے کُوں نہ ڈِٹھا۔

⁹ جِیں ویلے او پہاڑ کنُوں لہندے پئے ہَن تاں یسُوع اُنہاں کُوں حُکم ڈِتا جو ”جئیں تئیں اِبنِ آدم مُردیاں ءچوں زندہ نہ تھی ونجے، جیہڑا کُجھ تُساں ڈِٹھے کہیں کُوں نہ ڈسائے۔“

¹⁰ اُنہاں اِیں کلام کُوں یاد رکھیا پر آپس ءچ تکرار کریندے ہَن جو ”مُردیاں ءچوں جی اُٹھنڑ“ دا کیا مطلب ہے؟

¹¹ وَل اُنہاں اُوں کنُوں پُچھیا جو ”شریعت دے عالم کیونکر آدھے ہِن جو ایلیّاہ دا مسیح تُوں پہلے آوݨ ضرور ہے؟“

¹² اُوں اُنہاں کُوں آکھیا جو ”ایلیّاہ تاں پہلے آ تے سبھ کُجھ بحال کریسی، پر کلام ءچ اِبنِ آدم دے بارے ءچ کیوں لِکھیا ہے جو ’او بہُوں ڈُکھ چیسی تے حقیر کیتا ویسی؟‘

¹³ پر مَیں تُہاکُوں آدھا ہاں جو ایلیّاہ تاں آ گِیا ہے تے جِینویں اُوندے بارے ءچ لِکھیا ہے اُنہاں اُوندے نال جِینویں چاہیا اُونویں ای کیتا۔“

یسُوع ہِک بدرُوح گرفتہ چھوہر کُوں شِفا ڈیندے

¹⁴ جِیں ویلے او باقی شاگرداں دے کولھ آئے تاں ڈِٹھا جو اُنہاں دے آسُوں پاسُوں وڈی بِھیڑ ہے تے شریعت دے عالم اُنہاں نال بحث کریندے پئے ہِن۔

¹⁵ ساری بِھیڑ یسُوع کُوں ڈیکھ تے بہُوں حیران تھئی تے اُوندے دو بھج تے اُونکُوں سلام کیتا۔

¹⁶ اُوں اُنہاں کنُوں پُچھیا، ”تُساں اُنہاں نال کیا بحث کریندے ہیوے؟“

¹⁷ بِھیڑ ءچوں ہِک جواب ڈِتا، ”اُستاد! مَیں آپنڑے پوتر کُوں جیندے ءچ گُونگا کرݨ آلی بدرُوح ہے، تُہاڈے کولھ گِھن آیا ہم۔

¹⁸ او جِتھاں اُونکُوں قابو کر گِھندی ہے، سَٹ ڈیندی ہے تے اُوندے مُنہ کنُوں جَھگ نِکلدی ہے، تے او ڈند پِیہندے تے سُکدا ویندے۔ مَیں تُہاڈے شاگرداں کُوں آکھیا ہا جو بدرُوح کُوں کڈھ ڈیوݨ پر او نہ کڈھ سگے۔“

¹⁹ یسُوع جواب ءچ اُنہاں کُوں آکھیا، ”بےاعتقادو! مَیں کڈݨ تئیں تُہاڈے نال راہساں؟ کڈݨ تئیں تُہاڈی برداشت کریساں؟ اُونکُوں میڈے کولھ گِھن آؤ۔“

²⁰ بس او چھوہر کُوں اُوندے کولھ گِھن آئے۔ جِیں ویلے بدرُوح یسُوع کُوں ڈِٹھا تاں اُوں فوراً چھوہر کُوں مروڑیا۔ او زمین اُتے ڈھٹھا تے لیٹنڑیاں مارݨ لگا تے اُوندے مُنہ کنُوں جَھگ نِکلنڑ لگ پئی۔

²¹ یسُوع اُوندے پِیُو کنُوں پُچھیا، ”اِیندا ایہ حال کڈݨ تُوں ہے؟“ اُوں آکھیا، ”چھوٹے لا کنُوں۔

²² اُوں اُونکُوں ہلاک کرݨ کیتے کئی پھیری بھاہ تے پانڑی ءچ سٹیا پر جے تُساں کُجھ کر سگدے ہیوے تاں ساڈے اُتے ترس کھا تے ساڈی مدد کرو۔“

²³ یسُوع اُونکُوں آکھیا، ”کیا! جے تُساں کر سگدے ہیوے؟ جیہڑا اِیمان رکھیندے اُوندے کیتے سبھ کُجھ تھی سگدے۔“

²⁴ اُوں چھوہر دے پِیُو فوراً چیخ تے آکھیا، ”مَیں اِیمان رکھیندا ہاں، تُساں میڈی بےاعتقادی دا علاج کرو۔“

²⁵ جِیں ویلے یسُوع ڈِٹھا جو لوک بھج بھج تے جمع تھیندے پئے ہِن تاں اُوں بدرُوح کُوں دَڑکا ڈے تے آکھیا، ”گُونگی ڈوری بدرُوح، مَیں تیکُوں حُکم ڈیندا ہاں، اِیں ءچوں نِکل آ تے ولا کڈھائیں اِیندے ءچ داخل نہ تھیویں۔“

²⁶ بدرُوح چیخ مار تے، تے چھوہر کُوں بہُوں مروڑ تے نِکل گئی۔ چھوہر مُردے وانگُوں تھی گِیا ایہ تئیں جو بہُوں سارے آکھنڑ پے گئے جو ”او مر گئے۔“

²⁷ پر یسُوع اُوندا ہتھ پکڑ تے اُونکُوں چاتا تے او اُٹھی کھڑا تھیّا۔

²⁸ جِیں ویلے یسُوع گھر ءچ داخل تھیّا تاں اُوندے شاگرداں کلھیپے ءچ اُوں کنُوں پُچھیا جو ”اساں اُونکُوں کیوں نہ کڈھ سگے؟“

²⁹ یسُوع جواب ڈِتا، ”ایہ قِسم دُعا دے علاوہ کہیں بئے طریقے نال نئیں نِکل سگدی۔“

یسُوع دوبارہ آپنڑی موت دی گالھ کریندے

³⁰ وَل او اُتھوں کنُوں روانہ تھئے تے گلیل دے علاقے کنُوں لنگھدے پئے ہَن۔ یسُوع نہ چاہندا ہا جو کہیں کُوں خبر تھیوے،

³¹ اِیں واسطے جو او آپنڑے شاگرداں کُوں تعلیم ڈیندا تے اُنہاں کُوں اکھیندا ہا جو ”اِبنِ آدم بندیاں دے حوالے کیتا ویسی تے او اُونکُوں قتل کریسن تے او قتل تھیوݨ دے ترے ڈینہہ بعد زندہ تھی ویسی۔“

³² پر او اِیں گالھ کُوں نہ سمجھدے ہَن تے اُونکُوں پُچھنڑ تُوں ڈر دے ہَن۔

سبھ کنُوں وڈا کوݨ ہے؟

³³ وَل او کفرنحُوم ءچ آئے تے جیہڑے ویلے او گھر ءچ ہا تاں اُوں اُنہاں کنُوں پُچھیا جو ”تُساں رستے ءچ کیا بحث کریندے ہَوے؟“

³⁴ او چُپ ریہے کیوں جو رستے ءچ آپس ءچ ایہ بحث کریندے ہَن جو وڈا کوݨ ہے؟

³⁵ وَل یسُوع بہہ تے اُنہاں بارہاں کُوں سڈیا تے اُنہاں کُوں آکھیا جو ”جے کوئی اوّل درجہ پاوݨ چاہندے تاں ساریاں کنُوں چھیکڑ تے ساریاں دا خادم بنڑے۔“

³⁶ تے ہِک بال کُوں گِھن تے اُنہاں دے اَدھ ءچ کھڑا کیتا۔ وَل اُونکُوں جھولی ءچ گِھن تے اُنہاں کُوں آکھیا،

³⁷ ”جیہڑا کوئی میڈے ناں ءچ ایجھے بال کُوں قبول کریندے او میکُوں قبول کریندے، تے جیہڑا کوئی میکُوں قبول کریندے او میکُوں نئیں بلکہ میڈے بھیجنڑ آلے کُوں قبول کریندے۔“

جیہڑا ساڈے خلاف نئیں او ساڈے نال ہے

³⁸ یُوحنّا اُونکُوں آکھیا، ”اُستاد! اساں ہِک بندے کُوں تُہاڈے ناں ءچ بدرُوحاں کڈھیندے ڈِٹھا تے اساں اُونکُوں منع کرݨ لگے کیوں جو او ساڈی پیروی نئیں کریندا۔“

³⁹ پر یسُوع آکھیا، ”اُونکُوں منع نہ کرائے کیوں جو ایجھا کوئی نئیں جیہڑا میڈے ناں ءچ معجزے ڈِکھاوے تے جلدی نال میکُوں بُرا آکھ سگے۔

⁴⁰ کیوں جو جیہڑا ساڈے خلاف نئیں او ساڈے نال ہے۔

⁴¹ تے جیہڑا کوئی تُہاکُوں اِیں واسطے ہِک پیالہ پانڑی پِلیندے جو تُساں المسیح دے ہیوے، مَیں تُہاکُوں سچ آدھا ہاں جو او آپنڑا اجر ہرگز نہ ونجیسی۔

گُناہ کرݨ دی ازمائش

⁴² پر جیہڑا کوئی اِنہاں چھوٹیاں ءچوں جیہڑے میڈے اُتے اِیمان گِھن آئے ہِن، کہیں کیتے اِیمان تُوں گُمراہ تھیوݨ دا سبب بنڑدے، اُوندے کیتے اِیہو چنگا ہے جو چکّی دا پُڑ اُوندی گِچی ءچ پا تے اُونکُوں سمندر ءچ سَٹ ڈِتا ونجے۔

⁴³ جے تیڈا ہتھ تَیں کنُوں گُناہ کراوے تاں اُونکُوں کپ سَٹ کیوں جو ٹُنڈا تھی تے زندگی ءچ داخل تھیوݨ، ڈُو ہتھاں نال دوزخ دی اُوں بھاہ ءچ سٹے ونجنڑ کنُوں چنگا ہے جیہڑی کڈھائیں وی نئیں وِسمدی۔

⁴⁴ [جِتھاں اُنہاں دا کیڑا نئیں مردا تے بھاہ نئیں وِسمدی۔]

⁴⁵ تے جے تیڈا پیر تَیں کنُوں گُناہ کراوے تاں اُونکُوں کپ سَٹ کیوں جو تیڈے کیتے مَنڈا تھی تے زندگی ءچ داخل تھیوݨ، ڈُو پیراں نال دوزخ ءچ ونجنڑ کنُوں چنگا ہے۔

⁴⁶ [جِتھاں اُنہاں دا کیڑا نئیں مردا تے بھاہ نئیں وِسمدی۔]

⁴⁷ تے جے تیڈی اکھ تَیں کنُوں گُناہ کراوے تاں اُونکُوں کڈھ سَٹ کیوں جو کانڑاں تھی تے خُدا دی بادشاہی ءچ داخل تھیوݨ، ڈُو اکھیں رکھیندے ہوئے دوزخ ءچ ونجنڑ کنُوں چنگا ہے۔

⁴⁸ جِتھاں اُنہاں کُوں کھاوݨ آلے کیڑے نئیں مردے تے بھاہ نئیں وِسمدی۔

⁴⁹ کیوں جو ہر بندہ بھاہ نال نمکین کیتا ویسی۔ [تے ہر قُربانی نمک نال نمکین کیتی ویسی۔]

⁵⁰ نمک چنگا ہے پر جے اُوندا مزہ ویندا راہوے تاں اُونکُوں کیہڑی چیز نال نمکین کریسو؟ آپنڑے ءچ نمک رکھو تے آپس ءچ میل مِلاپ نال راہو۔“